超大農作（下）

(刊於2011年3月4日am730)

調理農務　種瓜得金

有幾多散戶，夠膽買超大(0682)呢隻中國第一農作股，唔知，不過機構投資者，好多今日仍然持重貨，尤其係戇居居唔知白菜幾錢斤之外國芬佬。

早兩日，超大公布半年業績後，攪咗個投資者電話會議，發問者幾乎清一色係老外，亦幾乎全部係對沖基金，少數SELL SIDE聲音，來自麥格理位老外分析員，條友舊年6月仲叫人增持超大，睇12蚊咁話。一兩年前同一場合，大部分問題圍繞超大業務經營，今個星期，個個關心超大財狀狀況，語氣仲相當唔客氣，有關轉變，反映芬佬對超大可能開始有介心，甚至關心短倉多過長倉，做定嘢沽空。

超大同你講，股本回報率，接近20%係咪？大陸銀行借一年短錢，息率個位數字，調理農業又有政策支持，唔似地產咁難借錢，俾你做大股東，諗都唔使諗，借短錢擴張業務，發過豬頭；超大又同你講，市帳率得60%係咪？股本回報率咁高，股價又咁殘，俾你做大股東，又係諗都唔使諗，用公司錢回購股票，即賺兩三成，又係發過豬頭。

超大老闆郭浩，唔借錢，唔回購，偏偏鐘意配股及可換股撲水，資金成本超貴，又難怪班芬佬嘈嘈閉，甚至有人兜口兜臉質問超大管理層，點解釋公司股價咁殘，跌到市盈率3倍。市盈率3倍咁可憐，如果呢個時候再配股集資，即係話大股東視公司股票如牛屎，超大個財務總監，喺投資者會議上面，代郭浩「再次」保證，三年內唔會發行新股，大家記住喇。

幾年前有二五仔向順叔展示過一堆咭片，包括超大、第一天然食品(1076)同浩倫農科(1073)三間公司高層，咭片上地址，全部集中灣仔華潤幾層樓，今日唔知有冇人搬咗，不過超大同浩倫內地總部，都喺福州西湖隔離，大家係福建老鄉，齊齊耕田搵食，又係鄰居，斷估好有計傾，我幫你買肥料，你幫我賣菜，成條調理農務供應鏈串埋一抽，盤生意好容易越做越大，第一天然已經爆咗煲，唔知對超大有冇影響。超大近年投資咗間亞洲果業(0073)，創香港掛牌第一日即被勒令停牌傳奇，又係神神怪怪。

大自然定律，種瓜得瓜；金融市場冇咁簡單，種金得乜，可以問吓馬多夫。

馬多夫個基金，玩咗十幾廿年，唔會由頭到尾都係老作，盤生意谷大咗，有錢在手，好多嘢可以由虛變實，不過連續十幾年超常理高回報，最後都被踢爆係個龐氏騙局，以錢滾錢。真又好假又好，馬多夫未爆煲之前，幫唔少人賺過錢，有條友叫Jeffrey Picower，仲聲稱馬多夫幫佢賺咗50億美金添。

關連文章:
1. 超大農作（上）｜（下）

伸延閱讀:
1. 超大2月28日投資者會議錄音 (資料來源: 超大網頁)
2. 湯財手記: 福建蠱票
3. Jeffry Picower Dead: Madoff Friend Found At Bottom Of Pool
4. 壹週刊: 農作變「老作」，超大現「袋」(嗱，咪話財經茄喱啡侵犯壹仔版權，壹仔撻「超大農作」條題都冇俾返CREDIT順叔呀...)