新界阿凡達（下）

(刊於2011年12月2日am730)

內有家鬼

上回講到，新界人惡地政亂，侵權當特權，政府隻眼開隻眼閉，扮睇唔到當時運高，令香港最多土地資源的新界，變成最容易出現利益輸送的無王管界域。

新界丁屋或其他私人建築，向天向橫僭健，最多砍你幾棵樹，霸你幾十呎官地。在一年前的大浪西灣，周大福掌櫃魯連城，在蒙古能源(276)食咗鋪爆崩勁糊之後，搣咗個零頭，在大浪西買咗幾十個地段連丁屋十幾萬呎土地，聽講地盤仲霸咗幾萬呎官地，據當地村長向傳媒透露，交易總值約3千萬港元，但地契轉讓價錢，只係2千萬元，地價以外，有大約1千萬元的「其他費用」。

大浪西一役，好死唔死，起在麥理浩徑第二段起步點，唔少行山人士留低無數腳毛，突然大砍林木整個附設直升機停機坪的私人樂園，超越所有人底線，如果魯連城唔係在大浪西做得咁揚，而係新界某山旯旮地方的話，可能已經搞掂。

新界咁大，究竟有幾多個更豈有此理的私人樂園，唔計地價，又有幾多「其他費用」，落咗咩嘢中間人手，可能就算問「愛國愛港愛鄉」的鄉議局高層，都未必有答案。

如果呢個問題太複雜，香港人，甚至係所有新界原居民，可以思考吓兩個最簡單的問題，一小一大，小的一個：劉皇發點解會咁發；大的問題：大地產商點解可以在新界囤積如此巨量的土地。

發叔在鄉議局稱霸幾十年，既為「皇」，又點會唔「發」，當然啦，地產商在新界買落以萬呎計農地，都叫做刺激新界經濟，就算日後成為一個個超巨型的私人樂園，好過在下白泥塊地租俾漁民養生蠔。

1998年: 長實有關農地的披露

2010年: 長實有關農地的披露
(請留意元朗LOT1457的變化，遲啲有故講)

地產商在新界圈地，多數極低調行事，例如長實(001)，每年都話繼續收購新界農地，但係近年年報，在主要業物業披露，只有幾行「計劃中」的「農地」，由地點到呎數都冇透露。

恒地(012)搵人打釘收舊樓做市區重建特別叻，去到新界，一樣咁揚咁落力，近年見親分析員或芬佬，例牌拎個「全港最大農地土儲」出嚟撻兩嘢，至今年6月底，農地儲備高達4,140萬呎，相對05年底，激增38%，呢嚿嘢，仲未計一啲一忽二忽未可以整合換地的「農地釘」。當然，如果轉售農地要簽「保密協議」的話，恒地亦唔會話你知呢個龐大土儲成本幾多。

恒地: 新界收地王

收地公司在新界收地手段，斷估同市區收舊樓大同小異，怕且唔會放火，但窮鄉僻壤得三個老人一隻狗的地方，肯定做得更加放手，收購農地的「另類勢力」如何運作，「地產霸權」如何在新界陰暗角落急速膨脹，近幾年聽過唔少，但冇乜真憑實據在手，亦唔知邊間地產商用邊間收地公司，遲幾個月再講。

特首曾蔭權任內最後一份施政報告，臨別秋波，終於提出以「新思維」開拓土地資源，有2百公頃土地目標放在新界，在地政法例從未理順的混亂界域開山辟地，恐怕會變成送給宗族領袖及其地產商拍檔的另一份超級厚禮。

丁屋政策最原本目的，是為了讓希望留下的村民留在自己的土地上，有地有權的新界原居民，今天有多少人仍然、或甘願留下？新界多年來，有多少「村」，已經從地球消失？

新界有不少上幾代的新移民，在新界落地生根他們沒有丁權沒有特權，在窮鄉僻壤租回來的土地生活幾十載，相對靠新界地政利益輸送鏈上的特權人士，他們更配得上稱為「原」居民。

香港亦有不少新一代希望返樸歸真，更有人身體力行的去證明「地產霸權」以外，香港還有農業，他們甘於接受西灣士多周未才有生意，甘心接受下白泥只可以看日落，相對香港政壇不少爛泥未乾已惹上一身銅臭的特權份子，他們更應該是建制內「鄉事派」及「漁農界」的代表。

電影《阿凡達》裡的外星原住民，弓箭擋火箭，為的是保持原始簡樸生活不變，如果一班鄉下佬生番，大興土木掘地砍樹，只為了把會飛的石頭變成銀元，變賣祖宗留下的資源土地圖利，故事就完全顛倒了普世價值。

村屋僭建，只是新界土地上大毒瘤的一個小膿疱，請拆除香港地政混沌界域的「廣義僭建」，讓真正熱愛新界、嚮往大自然的香港人，呼吸一口新鮮空氣。

彤叔都來了．．．
(相片來源: 獨立媒體)

關連文章:
1. 新界阿凡達（上）｜（中）｜（下）

伸延閱讀:
1. 香港正菜