Best Blogger Tips

2011年11月29日星期二

新界阿凡達(上)

(刊於2011年11月30日am730)


今期開新界,唔講上市公司住喇,講吓香港最惡的一個「種族」。

土著反抗外力入侵,捍衛家園及原住環境的情節,結合種族情仇又有環保警世訊息,向來賣得,廿幾年前《與狼共舞》,到兩年前《阿凡達》,由地球到宇宙,印弟安紅藩到外星鄉下佬,都係同一條橋。

地球人蝦外星土著,唔知點解,冧大大碌的「家園樹」(Home Tree)有咁多火箭炮,炸細細棵的「靈魂聖樹」(Tree of Souls),反而得一嚿攞你命三千扎埋一抽的炸彈,雖然係咁,《阿凡達》仍然紅遍大中華,內地唔少人反對「強拆」,作出「阿凡達」式抗爭,台灣的《賽德克.巴萊》,未有時間睇,點知《新界阿凡達》,已經由「香港原居民」自編自導自演趕住上畫。

一班土豪財閥,帶住上千圍村阿伯叔父,又道袍又紙扎公仔,咩「血債血償」,「妖」唔知乜就唔記得,外星人唔知頭唔知路,見到咁大場面,仲以為要拆佢祠堂斷佢龍脈挖佢山墳添。

大佬,而家只不過係「依法」,講多次:係「依法」,拆除新界村屋僭建物,行政長官曾蔭權屋企個露台塊玻璃都要拆,元朗八鄉丁屋起到IFC咁高就唔使拆?新界呢班叔父實在太斯文喇,應該去天馬艦政府總部隔離起壇作法。

當年立法局要太歲頭上動土,為新界女丁爭取丁權,曾經有得把口但冇「食力」的新界人,爆咗句「強姦陸恭蕙」出嚟,呢句嘢,可能係香港歷史上,令一個政敵紅得最快的政治口號。今日一班新界大男人,唔去郁曾蔭權,將矛頭指向發展局局長林鄭月娥,應該都有相同效果,林太企硬的話,肯定更受歡迎,如果不再留戀官場,原本已經好打,加埋打死罷就的心態,新界鄉紳土豪今次以為蝦女人,可能認錯祖宗燒錯棺材。

事緩則圓
有強姦,冇強拆

鄉議局主席新界大帝劉皇發,聽講背地裡同林太講「事緩則圓」,公開場合,揚言同政府交涉唔會「放軟手腳」,「今屆政府解決唔到,留待下屆政府解決」,呢個公然違法的拖字訣的潛台辭,順叔幫佢爆響口:「嗱,邊位細侄想做特首,又想要鄉事派選票,識做啦!」順叔落筆之時,未聽到梁振英或者唐英年講及呢件事,兩條友早前先後摸入新界拜票,清拆新界村屋僭建問題,唔該唔好鵪鵪鶉鶉閃閃縮縮,亦唔該唔好等「下屆」,今日,將立場清清楚楚寫入競選政綱,再講嘢。

中國政府為咗「民族融和」,小數民族多數可以保留些少有民族特色的「特權」或法律豁免,例如維唔爾族聽講可以帶刀出街咁,不過講到「國家利益」,當然乜都冇得傾,草原成礦山油田,藏獒都變中華寵物犬,硬食城鎮化帶來的「和諧」。

如果在神州大地,「沒有強拆就沒有新中國」,在新界,可以話「有強姦都冇強拆」,因為新界原居民特權,多到一個籮都裝唔晒,唔計「丁權」等受法例保護的地政特權,在政治設計上,新界人的「被代表性」,肯定高過普通香港人唔知幾多倍,以前有區域市政局,立法會鄉議局仲有一個功能議席,特首選舉委員會,又有幾十張入場券,劉皇發作為鄉議局立法會代表,可能十分「稱職」,但係做到行政會議成員,大家可以索吓料,劉皇發有冇開會時瞓覺,香港人亦要問吓曾蔭權,點解當日搵佢入去「內閣」,但係政府在新界依法拆幾個僭建物,又仲係咁大阻力。

喂,做嘢,強姦...
香港人的公共空間,有兩個越生越大、越大越不受控的毒瘤,在市區,叫做「發水樓」,香港人在市區被屏風樓包圍,以為放假可以到郊外抖吓氣,空間竟然越來越細。

新界村屋僭建物,只係新界地政問題的冰山一角,下回再續。

關連文章:
1. 新界阿凡達(上)(中)(下)

9 則留言:

  1. 試吓咁玩,明天想睇乜嘢,「香港阿凡達」定係「一個都唔能爆」,請到左下角投票,5點半日落前截止投票...

    回覆刪除
  2. Of course 香港阿凡達 la. Let See whether Lam Cheng will do something Hardcore, SHE WILL BE BACK!

    回覆刪除
  3. But 3900 is interesting too, indeed, it is my first mainland property stock. They are going to have a strong back-up, shall we buy a lot, some peanuts from 7-11 and watch the movie.

    回覆刪除
  4. 哈哈哈,得六票!?好,就香港阿凡達... BTW, CIC didn't exactly invest in Greentown. It's a sub-strategy level investment at best. Indeed, it is done by China Jianyin, which is a detached unit of CIC only...

    回覆刪除
  5. Hehe, it should be 7 votes as I donno how to vote for it. Perhaps you may post one here and publish the other one in the newspaper. 3900 is an interesting topics too as my hands are itchy now for bottom-fish if 一個都不能爆. John

    回覆刪除
  6. 我就係王法!

    劉皇發

    回覆刪除
  7. Btw, I dont know why, I strongly feel that this is a test for Lam Cheng. If she could slam dunk, she will be the next CS.

    回覆刪除
  8. 其實現今社會什麼丁權丁屋係時候取消啦!

    回覆刪除