新界阿凡達（上）

(刊於2011年11月30日am730)

今期開新界，唔講上市公司住喇，講吓香港最惡的一個「種族」。

土著反抗外力入侵，捍衛家園及原住環境的情節，結合種族情仇又有環保警世訊息，向來賣得，廿幾年前《與狼共舞》，到兩年前《阿凡達》，由地球到宇宙，印弟安紅藩到外星鄉下佬，都係同一條橋。

地球人蝦外星土著，唔知點解，冧大大碌的「家園樹」(Home Tree)有咁多火箭炮，炸細細棵的「靈魂聖樹」(Tree of Souls)，反而得一嚿攞你命三千扎埋一抽的炸彈，雖然係咁，《阿凡達》仍然紅遍大中華，內地唔少人反對「強拆」，作出「阿凡達」式抗爭，台灣的《賽德克．巴萊》，未有時間睇，點知《新界阿凡達》，已經由「香港原居民」自編自導自演趕住上畫。

一班土豪財閥，帶住上千圍村阿伯叔父，又道袍又紙扎公仔，咩「血債血償」，「妖」唔知乜就唔記得，外星人唔知頭唔知路，見到咁大場面，仲以為要拆佢祠堂斷佢龍脈挖佢山墳添。

大佬，而家只不過係「依法」，講多次：係「依法」，拆除新界村屋僭建物，行政長官曾蔭權屋企個露台塊玻璃都要拆，元朗八鄉丁屋起到IFC咁高就唔使拆？新界呢班叔父實在太斯文喇，應該去天馬艦政府總部隔離起壇作法。

當年立法局要太歲頭上動土，為新界女丁爭取丁權，曾經有得把口但冇「食力」的新界人，爆咗句「強姦陸恭蕙」出嚟，呢句嘢，可能係香港歷史上，令一個政敵紅得最快的政治口號。今日一班新界大男人，唔去郁曾蔭權，將矛頭指向發展局局長林鄭月娥，應該都有相同效果，林太企硬的話，肯定更受歡迎，如果不再留戀官場，原本已經好打，加埋打死罷就的心態，新界鄉紳土豪今次以為蝦女人，可能認錯祖宗燒錯棺材。

事緩則圓

有強姦，冇強拆

鄉議局主席新界大帝劉皇發，聽講背地裡同林太講「事緩則圓」，公開場合，揚言同政府交涉唔會「放軟手腳」，「今屆政府解決唔到，留待下屆政府解決」，呢個公然違法的拖字訣的潛台辭，順叔幫佢爆響口：「嗱，邊位細侄想做特首，又想要鄉事派選票，識做啦！」順叔落筆之時，未聽到梁振英或者唐英年講及呢件事，兩條友早前先後摸入新界拜票，清拆新界村屋僭建問題，唔該唔好鵪鵪鶉鶉閃閃縮縮，亦唔該唔好等「下屆」，今日，將立場清清楚楚寫入競選政綱，再講嘢。

中國政府為咗「民族融和」，小數民族多數可以保留些少有民族特色的「特權」或法律豁免，例如維唔爾族聽講可以帶刀出街咁，不過講到「國家利益」，當然乜都冇得傾，草原成礦山油田，藏獒都變中華寵物犬，硬食城鎮化帶來的「和諧」。

如果在神州大地，「沒有強拆就沒有新中國」，在新界，可以話「有強姦都冇強拆」，因為新界原居民特權，多到一個籮都裝唔晒，唔計「丁權」等受法例保護的地政特權，在政治設計上，新界人的「被代表性」，肯定高過普通香港人唔知幾多倍，以前有區域市政局，立法會鄉議局仲有一個功能議席，特首選舉委員會，又有幾十張入場券，劉皇發作為鄉議局立法會代表，可能十分「稱職」，但係做到行政會議成員，大家可以索吓料，劉皇發有冇開會時瞓覺，香港人亦要問吓曾蔭權，點解當日搵佢入去「內閣」，但係政府在新界依法拆幾個僭建物，又仲係咁大阻力。

喂，做嘢，強姦．．．

香港人的公共空間，有兩個越生越大、越大越不受控的毒瘤，在市區，叫做「發水樓」，香港人在市區被屏風樓包圍，以為放假可以到郊外抖吓氣，空間竟然越來越細。

新界村屋僭建物，只係新界地政問題的冰山一角，下回再續。

關連文章:
1. 新界阿凡達（上）｜（中）｜（下）