Best Blogger Tips

2011年12月1日星期四

新界阿凡達(中)

(刊於2011年11月30日am730)

上回講到,新界土豪反持政府依法清拆僭健物,公然抗法兼向下屆政府叫陣,一個全香港最多特權最惡的「種族」,「阿凡達」上身後臉皮夠厚,反而扮演原住民「權利」被剝削的弱勢社群。

村屋僭建問題,只是新界地政問題的冰山一角,香港公共空間,生咗兩大毒瘤,一個生在市區的「發水樓」,一個生在新界郊外,如果睇完《地產霸權》已經義憤填膺,稍為研究吓這兩大毒瘤,包你即血管盡爆。

唔計市區重建的話,香港市區土地資源已經所餘無幾,發水樓問題,政府聲稱開始做嘢,亦逐漸受到普通人關注,但係另一粒大孖瘡,生在跡近「無王管」的混沌界域,同時加上新界人的種種特權,政府隻眼開隻眼閉多年,越生越大粒。
要了解新界地政之亂之無稽,可以先睇睇兩組數字。

第一組數字,根據鄉議局自己估計,新界有超過20萬男性原居民擁有丁權,香港政府每年處理大約1000宗興建丁屋申請,假設所有新界麻甩佬唔再開始散葉,個個要行使丁權,政府處理所有申請的話,需時200年。

第二組數字,新界所謂「舊批約地段」私人土地,超過21萬幅,100年前測繪,如果要按照現時測量標準重新測量,政府其實有一個「專責隊伍」,處理地界糾紛,每年大約處理300個地段,要完成測量21萬個地段,需時700年。

呢組數字,嚟自2003年5月7日,立法會其中一條口頭質詢,由當時的建築測量及規劃界代表劉炳章提出,在新界重做地界測量,對測量師嚟講,是一盤幾十億元的大生意,但對政府嚟講,係一個不能稍動的計時炸彈,多多少少可以解釋,點解興建丁屋申請咁慢。

100年前英國佬在新界做地契登記,冇人認領就變做官地,差唔多叫做搶,丈量圖則,聽講係16比1 ,求求其其,導致今日官地,地界同私人土地重疊,私人土地之間地界糾紛就更多,甚至有啲地段,變成圖紙上明明存在,但實際上又唔存在的「遺失地段」,口同鼻拗(寫到呢度,順叔開始覺得,聲稱太公擁有鑽石山土地的九龍皇帝曾灶財,其實只係一個夠膽公開挑戰英女皇、爭取自己權益的普通人,當佢係藝術家的「文化人」,反而顯得有啲SHORT SHORT地)。

如果冇估錯,將目前官地面積,同21萬幅「舊批約地段」私人土地面積加埋,總和分分鐘遠遠已經超過新界總面積,地界唔清唔楚,審批丁屋用地肯定唔會快,就算可以一夜之間完成審批,又帶出另一個問題,就係如果新界男丁個個要起屋,每人一楝三層七百呎,就算有足夠土地裝得落,新界鄉效又分分鐘迫爆過旺角劏房。

新界人夠惡,選票多,地大法亂,政府以「資源不足」為理由,唔肯在新界重做地界測量,雖然叫做不負責任,但同時可以拖慢丁屋膨脹速度,拖延一個問題等如解決另一個問題。不過政府「扮睇唔到當自己時運高」的態度,亦令新界變成一個幾近「無王管」的地政界域,咁就好容易出現不為人知的侵權行為及利益輸送。

新界村屋向天發展,越起越高,只係建築僭建,打橫嚟起,就叫做霸佔官地,大家去開新界親友屋企,可以順便問吓,情況有幾嚴重,順叔就親眼見住,西貢一位非原居民朋友屋企旁邊的小溪林木,慢慢變咗隔離鄉親的後花園。

香港市區樓,天台放個儲物櫃,都可能會收到屋宇署清拆令,因為周不時有直升機影相,同時有大量做政府合約的承建商吼住,邊度發現僭健,邊度就會有生意做,新界咁大,政府監察能力有限,執行決心更不足,難怪新界人咁易「阿凡達」上身,「侵權」當特權,違法當合理。

下回再續。

關連文章:
1. 新界阿凡達(上)(中)(下)

伸延閱讀:
1. 盧維思: 丁屋政策應該休矣
2. 政府「冇錢」做新界地界測量
3. 李金風: 淹沒在集體回憶的忘卻

2 則留言:

  1. 當局於丈量約份測量早期以比例1:3960 (16 inch to 1 mile)編制丈量約份圖則,不久後有見圖則比例太小以致未能清楚記錄當時每幅土地旳佔用情況,即改以比例1:1980 (32 inch to 1 mile)編制剩餘丈量約份的圖則。

    回覆刪除
  2. 唔係扮謙虛,而係好老實咁講,唔好話新界地政,普通地政法例,順叔都只係略懂皮毛,呢句「16比1」,行家一睇就露底,順叔會繼續「惡補」的,希望有朝一日可以寫得出一本真正「深入淺出」的「鬥地主」...

    回覆刪除