海通大福

(刊於2011年12月19日am730)

今期開海通國際(665)。



中共最高層，每年十二月中召開「中央經濟工作會議」，為下年經濟工作定調後，所有財金決策部門，就會自己開會傳達「會議精神」，上星期中央經濟工作會議開完會，一句「穩中求進」話音未落，中國證監會及人民銀行等重鎮，跟住排隊出嚟講自己下年工作大綱，就係咁解。

步入「2012」，大吉利是荷李活未世巨片，都話中國建造諾亞方丹打球地球，國際金融市場風聲鶴唳，壞消息聽到麻木，中國監管機多嘢講，好自然當成久違了的「好消息」，炒吓「政策」市。

風高浪急之下深化金融改革，最「穩中求進」一步，就係在香港這個最對外開放、又最接近中國的離岸市場試水，國務院副總理李克強8月訪港，所謂「挺港6招36式」，當中幾項涉及加快中港金融互通的政策，呢個時候拎出嚟交功謂就最啱數。

中國證監會主席郭樹清新官上任，幾把火，誓要將A股變成配合並反映中國經濟發展的市場，星期五大小「QFII」齊發，除咗宣布加快合資格境外機構投資者審批，亦聯同人行及外管局，正式推出所謂「RQFII」的「試點辦法」，容許內地基金及證券公司的「香港子公司」，運動在香港募集的人民幣，投資內地證券，聽講試點額度200億元人仔，以投資債券為主。

如無意外，「挺港6招36式」當中，有關在內地推出港股組合ETF、以至放行更多內地企業到香港發行人民幣「點心債券」等措施，會逐步落實，呢一盤中港「點心大拼盤」，幾乎專門為內地金融機構而設，中銀中信工行建行，講得出的國控金融巨企，都已經在香港插旗，不過，內地金融巨企芸芸「香港子公司」當中，唯一以獨立身份上市的，只有一家：海通國際。

作為獨立上市個體，海通國際咬咗幾多粒「點心」，食完之後增肥幾多，能見度最高，換句話講，如果要單純押注在這盤中港金融「點心大拼盤」，要仔唔要毑，海通國際是唯一選擇。

海通國際只有一年「歷史」，前身叫做「大福證券」，作為周大福珠寶(1929)姐妹公司年代，只係一間普普通通的華資證券行，掛名係「投資銀行」，但一年都唔知有幾多單刁落袋。「大福證券」09年賣盤，成為海通證券(6873)的「香港子公司」，亦係公司由一間唔上唔落的華資證券行，變成雄心脖脖中資投行海外平台的分水嶺，「企業融資」業務，以前花樽一個，至6月底半年，淨利潤貢獻，按年急升4倍至5,230萬元(港元，下同)，變成主要收入來源。

海證國際以前就算有新股上市生意做，單刁唔係鼻屎咁大粒，就係就啲茄哩啡二打六，阿媽海通證券香港上市，一單150億元重量級大刁，竟然由海證國際擔正大旗，食一個佣，收入已經1.5億元，講緊至2010年12月底18個月，海通國際純利都只係3.5億元。

海通國際保薦阿媽上市，第一次做大刁主角，撞正股市年底急跌，仲要新舊老母同時爭飯食，同周大福珠寶招股撞期，結果海通證券上市臨門一腳撻Ｑ，海通國際都咪話唔樣衰。

海通國際往績市盈率，僅及雙位數字，食埋阿媽上市份佣， 2012年「企業融資」收入有望大增，除咗「RQFII」呢盤中港金融「點心大拼盤」，亦有望在阿媽支持下，在內企新股上市及點心債券市場，多咗生意，「企業融資」業務增長，更值得留意。

中港金融互通，金融巨企及「香港子公司」，錢銀往來進出肯定越見密，作為獨立上市公司，披露要求高，好多灰色業務反而唔係咁方便，工行(1398)舊年都頂唔順，私有化咗工銀亞洲，海通國際市值只有24億元，阿媽持股近7成，存在一定的私有化誘因，相對約22億元資產淨值，風險有限。

伸延閱讀：
1. 下載ＲＱＦＩＩ試點計劃辦法全文
2. FinanceAsia: Jostling begins among fund firms after RQFII launch
3. 財經茄哩啡： 海通「大福」鳥

商報新書．．．