「發水」現形

如果大家想讓政府聽到市民的聲音，又怕睇法律條文（順叔都唔識），請ＣＯＰＹ　＆　ＰＡＳＴＥ以下這份建議書： 〝請強制發展商在售樓說明書 公開樓盤「發水比例」。〞 然後用自己名義，寄去以下房屋及運輸局電郵地址，標題請註明「公眾諮詢」： firsthandsale@thb.gov.hk 唔該：　廣傳。

有一位網友同順叔講，知道買新樓好多古惑陷阱，但係睇親有關討論「發水樓盤」及「縮水單位」的文章，太多「ＸＹＺ面積」，睇到頭暈都未搞得清楚。

首先，「實用面積」及「建築面積」，兩個概念，雖然香港法例冇一個清楚及統一的定義，但普通人香港人，普遍能了解兩個概念的意思，順叔唔再解釋咁多，費時越講越亂。

一個物業單位，其實得一個「價」，價值會隨市場情況有所升跌，但無論用「實物面積」還是「建築面積」去量度，都不會影響這個「價」。

冇錯，講到「發水樓盤」及「縮水單位」的因果關係，涉及好多其他「ＸＹＺ面積」，可以涉及更多唔同概念，可以越講越複雜，不過，香港一塊土地，由「土地」變成「樓盤」的過程中，有兩種「面積」，簡單到暈，相對冇乜灰色地帶，在一手樓銷售文件（樓書）上，白紙黑字寫明，就可以令一個樓盤的「發水比例」，清楚現形。

邊兩種？
（１）　賣地條款上的可建「總樓面面積」上限
（２）　樓盤所有單位的「總銷售面積」

每一塊土地，賣地條款上，都有寫明項目的「可建樓面面積」，通常有一個下限及上限，舉個例，「將軍澳市地段第１１９號」住宅地皮，月初開始招標，招標條款之中，訂明項目可建「總樓面面積」，唔可以超過４５，３５３平方米

發展商買咗地，下一步就係入則，同地政署講數，睇吓相關地皮上面的建築物，最後可以起到幾大幾高，有幾多「樓面面積」，可以得到豁免，唔需要計落可建「總樓面面積」，又唔違返賣地條款，呢舊就係樓盤「發水面積」。呢一個規劃過程，非常黑暗，專業人士唔夠膽踢爆，傳媒亦長年忽視，長年累月，公眾監察近乎零。

要改變呢個情況，就要諗辦法，在新盤開售時，公開樓盤的「總銷售面積」，即係發展商最後，賣咗幾多「呎」住宅單位俾消費者，要踢爆呢個數，話難唔難，話易亦都唔易，其中最簡單直接方法，就係叫政府立例，規定發展商在樓書上，公布樓盤 「總銷售面積」數字，最低限度，亦要公布每一個單位的「建築面積」，所有單位「建築面積」的總和，基本上等如樓盤「總銷售面積」，政府唔肯立法，發展商自己唔肯公布，記者朋友可以自己做。

講到呢度，大家可能終於發現，點解所有新盤，從來唔會有一張完整的價單，更從來唔會將所有單位的「建築面積」，一次過公開，點解？因為，背後隱藏咗香港發展商的「發達秘笈」！

政府而家要立法規管樓花銷售，如果強制發展商在新盤開售時，將地皮的可建「總樓面面積」，以及樓盤最後的「總銷售面積」，在銷售文件或「樓書」公開，「發水比例」就會現形。

「發水樓盤」，是消費者買中「縮水單位」的禍因，亦是香港一棟棟「屏風樓」的源頭，如果大家睇得明呢篇嘢，又覺得啱聽的話，麻煩順手抄低順叔的「建議書」，只是簡簡單單的一句，電郵給政府，謝謝收看。（有問題唔明白，歡迎隨時電郵順叔，ｌｕｃｅｎｔｎｇ＠ｇｍａｉｌ．ｃｏｍ）