財經茄哩啡: 巨銀暴利（上）

2012年2月13日星期一

巨銀暴利（上）

好多人話，投資組合裡面，最好包括一啲受政策保護下，又或者同政府拗手瓜長期處於上風，長期享有穩定暴利的企業，今期睇睇國企巨銀，算唔算係屬於呢個類別。

國企巨銀在舊年飽受外國投行及評級機構質疑，由地方債到樓市硬著陸，年頭唱到年尾。你有你唱，2011年在風風雨雨中過去，即將掀幕的業績期，國企銀行好可能係其中少數整體保持強勁增長的行業。

近一個月，A股上市的中小型國企銀行陸續披露「業績快報」，2011年純利，清一色錄得超過4成按年增長，民生銀行(1988)同埋華夏銀行，利潤增幅更加超過50%。(題外話一句，內地監管機構對A股上市公司的披露要求，好多地方已經遠遠超過香港，例如多咗一樣叫「業績快報」，即係話上市公司業績就算核數工作未完成，都要盡快將條大數拎出嚟，等投資者大概有個心理預備。)

國企巨銀盤數大啲，冇咁快有消息，增長預計亦不及中小型銀行咁跨張，不過根據銀監會數字，舊年頭9個月，內地商業銀行整體利潤，累利超過8,000億元(人民幣，下同)，較2010年增長35%，第4季冇事冇幹的話，純利突破1萬億人仔水平，完全冇難度，幾乎等如希臘正四圍向歐盟籌旗的1300億歐元的第二劑緊急財政救濟。

有關數字仲好可能低於實際水平，國企巨銀部分地方主管，見盈利大超標的話，好大誘因好天收埋落雨柴，收埋部分盈利遲啲入帳，可以減輕新一年交數壓力之餘，對國企巨銀嚟講，透過會計手法將推遲純利入帳，亦可以避免樹大太招風，被全國人民指住個頭話坐擁暴利。

上市銀行盤數有碗話碗有碟話碟，其實好重要，銀行家誠實，在今時今日亦係一種可多得的美德，不過如果太春風得意講漏咀，好容易惹火燒身，好似民生銀行行長洪崎咁，舊年12月初，在北京「2011年環球企業家高峰論壇」公開演講，好誠實咁講，中國銀行業「一枝獨秀」，好多銀行家都有啲「為富不仁」的感覺，其他企業冇啖好食，銀行利潤太高，高到「有時候自己都不好意思公布」。

舊年銀行掣水，可能在場企業家睇銀行臉色收氣太多，洪崎呢翻咁坦白的說話，半爆肚半搞Gag，講完之後，全場冇人笑得出，咁「和諧」的演講，主辦單位好快就將有關視頻河蟹咗(在財經茄哩啡博客可以重溫)，不過洪崎已經成功將公眾目光，聚焦在國企銀行的盈利水平。

近兩三個月，全國輿論針對巨銀暴利的聲音此起彼落，有經濟學家踢爆一個最公開的秘密，話巨銀暴利甚於最好賺的煙草及石油業，狂數國企銀行好搵過賣煙仔，賺錢多過石油巨企又唔使交「暴利稅」，作為全國最好賣報紙之一的廣州日報，近排幾乎日日做專題報道，針對國企銀行的賺錢手法及濫收費情況窮追猛打，搞到中央電視台上星期亦要被迫加入戰團，在熱門節目《今日觀察》探討銀行業暴利的問題。

外國投行唱衰國企銀行資產質素，監管機構可以當係口水戰；內地輿論群情洶湧，就唔可以當時運高睇唔到，尤其係銀監會大佬尚福林啱啱上場，上星期終於出手做嘢，先出咗份指導意見通知全國金融機構，內容大致上係叫大家識做，檢討吓銀行服務收費係咪太高太濫，第二日又聯同人民銀行同埋發改委，整多份「商業銀行服務價格管理辦法」初稿，諮詢公眾意見。

銀監會出手整治銀行服務收費，只係回應咗普通市民對國企銀行的素求，在此之上，仲有中小企借錢艱難的問題，再講深啲，就到咗一個銀行同埋實體經濟之間，利益分配的「經濟規劃問題」，下回再續，睇睇內地金融體系呢個「深層次矛盾」。