濠賭馬交（上）

今期開澳門，查實冇乜心得可以分享，反而想講吓，對於濠賭股及馬交埠，有啲乜嘢搲頭唔明的地方。

最唔明，當然係點解咁多人唔明長賭必輸呢個道理，賭王仲係好牙擦精靈嗰陣，都好多次同大家分享過發達心得，唔怕你精唔怕你笨，最怕你唔嚟，唔計受到全球信貸危機影響的2008年，澳門博彩收益每年保持4成以上增長，2010年勁升58%， 2011年再升多42%，去到2,678億澳門幣，用博彩收入計算的話，澳門開放賭業10年左右的時間，馬交市場已經等如拉斯維加斯4倍，唔到你唔信「好賭」真係中國人天性或劣根性之一。

澳門每年每月公布的博彩收入數字，如果貼在海關入口，等如話俾大家知，班賭客又喺賭場跌咗一千幾百億銀。長賭必輸，但係又長賭長有，同樣受惠於自由行，同樣受惠於人民幣升值所推動的內地消費者購買力，澳門博彩業收入增幅，高過香港零售業，更遠超澳門遊客數字，澳門過去5年賭金收入接近8,000億澳門幣，理論上，唔少貴賓豪客已經輸甩褲，但係越輸越多同時又越輸越有，直頭好似唔係賭自己錢長期有人埋單咁款。

咁情況，馬交賭場自然想窮都難，六張賭牌都已經在香港上市，可能家和先可以萬事興，賭王家族控制的三間公司，表現相對落後，例如有近3成最大市場佔有率的澳博(0880)，大股東各房人馬最有增持誘因，但反而最殘，計往績市盈率都係20倍鬆啲，銀河娛樂(0027)同埋一對美國過江龍，2011年預測市盈率都接近或超過30倍，6間濠賭公司加埋，市值接近6,000億港元，已經超過成個馬交埠經濟兩倍。

近年投資者口味同大陸同胞的消費品味好相似，越貴越要買，講得完基本分析，人哋已經炒完幾轉叫早抖。如果只係睇年報，望住盤數的話，濠賭股可能係全世界最「乾淨」的上市公司，好似金沙中國(1928)咁，資產負債表乾淨整齊，得幾間酒店，一堆茄殊現金，唔似得銀行咁，幾十個項目唔知講緊乜，如果真係咁簡單的話，金沙市值2,338億元，等如資產淨值7倍都好，都可以話合理。

不過賭場係偏門生意，年前香港首富曾經提過，有啲投資機會明知賺硬，但唔係「取之有道」，最後都係放棄咗，可能就係講緊賭場。賭場的金碧輝煌，可能正正係澳門地下秩序的正反倒映，政治上、金融市場甚至國際舞台上唔少離奇新聞，都到澳門銀行或者賭場扯上關係，例如早幾年美國就認定其中澳門匯業銀行，幫北韓洗黑錢；又例如金沙近年在美國惹上官非，踢咗唔少黑材料出嚟，包括公司涉嫌要求員工，包存所有入過金沙賭場博殺的澳門官員的名單。

一間澳門賭場怕且已經裝咗一萬幾千隻天眼，天羅地網，全地球大賭鬼小老千都起晒底，濠賭公司有澳門高官入賭場的紀錄，紀對唔出奇，甚至有可能，連共產黨高幹違反黨紀去澳門博殺的黑名單都有一份，隨時掌握咗一個二個爆破力極強的資料庫。

地下秩序唔見得光，局外人唯有靠估，例如舊年尾，《經濟學人》都靠個「估」字，話澳門博彩收入的瘋狂增長，同中共領導換屆執位有關，反映咗內地有銀士，在政局變天之前，特別冇安全感，所以趁未亂將啲錢搬出國外，例如經過澳門由黑變白咁話。

濠賭公司「乾乾淨淨」的資產負債表，後面收埋咗好多暗黑世界的資金運作，例如同所謂「疊馬仔」的「博彩中介人」的錢銀往來，呢一層「中介人」，三山五嶽乜人都有，有批發，亦有獨行俠，有關呢個澳門賭業最唔透明的一層，6間香港上市濠賭公司，都只係做咗極表面的披露，下回再續。

-- 豪賭馬交(下)


伸延閱讀:
1. Economist: A Window in China
2. 財經茄哩啡: 以和為貴（上）、（下）