入到賭場，基本上有3個場可以玩：老虎機、中場、貴賓廳。最搵笨其實係中場，舉個例，銀河娛樂(0027)角子老虎機「淨贏率」，在2010年大約7%，即係100蚊投注額，賭場賺硬七八蚊，中場「淨贏率」，高達16.8%，貴賓廳反而只有2.9%。
賭場各種唔同賭枱，一項少少規則，例如圍骰通殺，影響勝負或然率0.01%，對坐長庄的賭場，分別已經好大，中場散客遊客貪得意，一兩注細細地買吓魚蝦蟹大細，對賭場嚟講，係一項穩賺成幾兩成利潤的劏客生意，金沙中國(1928)中場生意做得大，所以亦最好賺。
幫襯貴賓廳的大豪客，絕大部分只係玩廿一點或者百家樂，呢啲在數學理論上，庄閒勝負機會最均等的博彩遊戲，貴賓廳為咗吸引大客，亦可能會制定一啲冇中場咁辣的規則(例如廿一點派到尾先洗牌讓閒家數牌)，再加上入得貴賓廳，理論上在賭術及心理質素會高啲，亦解釋咗點解貴賓廳同中場「淨贏率」咁懸殊。
貴賓廳博彩亦係澳門賭場最大生意來源，賭場要靠各個中介人，即係疊馬仔，幫手拉客，賭場廳要同中介人分佣，呢度政府有上限規定，實際點做就各師各法，銀河娛樂2010年收入193億銀(港元，下同)，按年上升57%，不過「博彩業務合作伙伴的佣金及津貼」，同期增幅高達71%至76億元，仲多過向澳門政府繳交的博彩稅。
疊馬仔佣金係賭場最大經常開支，同時賭場亦會向疊馬仔或大客提供信貸，借錢俾人賭錢，有冇順手做埋大耳窿就冇人知，又係嗰句，各師各法，相關信貸風險，表面上唔會好大，幾間濠賭公司在年報都講到，有既定程序檢討中介人及客戶的信貸質素，壞帳撥備及應收帳佔資產比例亦唔高。
不過，如果將濠賭公司的資產負債表，同一間普通上市公司作比較，最大分別的一個項目，叫做「現金」。濠賭公司需要在流動資產上，保持遠高於普通公司的現金水平，而且更加有相當高的信貸風險，又用銀河娛樂做例子，2010年「現金及銀行結餘」有44億元，有36億其實唔係自己坐住，而係放咗去需要信貸評級公司評定風險的「合作伙伴」，當中又只有5億元，有「AA」級評級，可見賭場最高風險的資產，竟然就係自己的「流動現金」，賭場的「合作伙伴」會唔會爆煲，唔知，有興趣有人脈應該自己打聽吓先落注。
成日覺得，馬交埠的地下秩序，俾地面上的管治更有條理，好簡單，如果話三權分立，澳門基本上冇咗傳媒呢個「第四權」，傳理學學者，與其做民意調查，不如研究吓好似澳門咁，缺乏傳媒監察，對政治社會發展有乜影響。
舊年港澳辦主任王光亞，嚟香港馬交向左走向右走，大大聲話澳門房屋政策，出色過香港，香港政府自然幫唔落，但作為港澳頂爺講句咁嘢，令人懷疑佢係「傻的嗎」，澳門最新財政儲備，斷估冇二千都有千五億銀，而且直線增長，絕對有條件，創造一個類似新加坡咁，全民有屋住的房屋政策環境，澳門特區政府已經係第三屆，好似從來冇諗過巨額賭金收益可以點用，點樣將呢筆錢在經濟在社會再循環，抵打蘿柚就真。
中國消費者富起來，出國旅遊更多自由，更加係不可逆轉的趨勢，共產黨搞阿公分餅起家，斷估唔會永無止境咁，讓賭金收益轉化為濠賭股價值，未來點澳門博金收入，在經濟及社會中點樣再循環，包括推動周邊經濟發展，會是影響濠賭股長遠增長動力的決定性政策因素。
-- 濠賭馬交（上）
沒有留言:
發佈留言