巨銀暴利（下）

上回講到，國企銀行盤生意，有七八成來自受政策保護的利息收入，翹起對手對腳，存貸利差已經做又二點六唔做又二點六。

國企銀行受政策保護兼呵護，當然唔止「利率不自由化」，同樣係國控巨企，比較吓中石油(0857)同埋工商銀行(1398)張稅單，已經知道阿公有幾偏心。

2010年，中石油稅前利潤1,893億元(人民幣，下同)，交咗385億元「所得稅」；工行稅前利潤2,154億元，交咗494億元所得稅，用師奶式數口法鑑粗咁計，工行的「利得稅率」，仲高過中石油少少，不過，中石油仲有一項超巨型的稅務開支，在損益表上，放在「稅前盈利」上面。

呢舊嘢，叫做「除所得稅外的其他稅賦」，盛惠1,842億元，按年勁升36%，當中包括521億元的「暴利稅」，或者叫「石油特別收益金」，仲有下遊賣燃油天然氣的「消費稅」，盛惠896億元，死未？仲未講完，前年開始在新彊特地方，開始「資源稅」改革，開發大西北採油抽氣，變相仲要加稅，「資源稅」舊年開始向全國更大範推廣，中石油2011年的「資源稅」開支肯 定會進一步增加。

可以咁講，唔計呢張大放血稅單的話，中石油賺錢水平在3,000億元以上，中國3間石油巨企，盈利水平可以話拍得住銀行業，不過採之於民用之於民，石油巨企擁有壟斷地位同時，亦變成阿公財富再分配的政策工具。

銀行業的行政及營運開支，唔似得一般實業咁受通脹影響，銀行壟斷國內9成以上金融資產，又唔需要交「金融資源稅」，更加冇乜人講過要抽暴利稅，自然大賺特賺。國企銀行老總，當然會大大聲咁講，銀行業競爭激烈，同石油工業不可同日而語，但係唔好忘記，根據中央電視台資料，美國有近9,000間銀行，中國唔夠3,00間，唔需要面對外國銀行的競爭，一個封閉的市場，本身已經係一個最重要的政策護身金鐘罩，當然，仲有1999年阿公埋單，將銀行超過14,000億元的爛數揹上身，等一個技術上已經破產的銀行體系，輕身上路搞市場化改革，就算係13年後的今日，萬四億銀，相信足夠希臘起身回生。

銀行服務係普羅大眾必需品，但唔係國企巨銀的最重要「服務對象」，銀行頭號任務，就係保持金融體系穩定，同時在整個經濟結構上發揮「阿公分餅」的作用，例如今年的所謂「定向寬鬆」，外面越係風大雨大，國企巨銀仲未係時候，好似中移動(0941)咁，變成「公用股」，阿公為國內銀行做大手術的可能越細，上星期針對銀行服務收費有所動作，繼續小罵大幫忙而已。

中國共產黨雖然冇搞黑貓白貓姓資姓社好耐，但係從來冇放棄過，向地球證明中國特色的社會主義的「優越性」，2008年全球信貸危機之後，銀行體系更加成為呢場意識形態大戰的主要戰場(大家睇荷李活就上畫的災難片，好炸唔炸，搵香港中銀總部炸開兩截，就聞到多少味道)，歐洲債務危機大步檻過之前，在監管者眼中，銀行體系越強健越好，甚至越賺錢越妙，。

押注落國企巨銀股票，等如押注落中國規劃全球第二大經濟的能力，甚至可以話押注落中西之間的意識形態暗戰，國企銀行資產質素唔係十平八穩，不過最大兩個債仔，一個叫鐵道部，一個叫地方債，阿公照住，中國好就大家好，剩低一條古惑仔，叫地產商，中央政府呢鋪似乎打真章要樓市「回歸合理水平」，亦係阿公交俾銀行最大一道難題。

除咗國企銀行，仲有一個行業，近年保持3成以上的增長，叫做澳門賭場，中國真正開放進步百官清廉，亦係濠賭股增長放緩之時，濠賭股資產負債表上的「資產」，絕對唔係幾楝酒店一抽現金咁簡單，表外(Off-balance sheet)的資金運轉，普通人冇辦法睇到咁解，退一萬步咁講，兩個行業增長都咁快，市盈率一個30倍，一個10倍樓下，押注國企銀行，點都安全好多咁囉。

關連文章：

巨銀暴利（上）

巨銀暴利（中）

巨銀暴利（下）

伸延閱讀:
1. 中移動與「公」用股