Best Blogger Tips

2012年3月30日星期五

中國達人秀

(部分內容,刊於2012年3月30日am730)


佛涯組合

南方彝人组合彝族

近排事事評論員上身,太口臭,要消毒一輪,哈哈哈,今期又係快樂星期五,風花雪月,要連埋片睇先好睇,有時間就幫襯吓順叔個網誌。

如果有幫襯開財經茄哩啡在Youtube的「GOW財茄台」,應該睇過,早排上載咗一段今年《中國達人秀》的比賽片段,三個和尚表演「少林足球唱歌真人版」,合唱一首自創的舊詞新曲《遊子吟》。

呢個「佛涯組合」,結他木魚加引磬,彷似讚「佛偈」,三位大師斷估投入咗真感情,有一定感染力,感動全場。出家人幾有創作天份都好,入世參加天才表演,已經唔對路,做和尚更算不孝,諗深一層,感染力越強,成件事越冇說服力。不出幾日,「佛涯組合」被網民踢爆,其中兩位成員,其實出家冇耐,早前更曾先以「南方彝人組合」身份,參加《我要上春晚節目》,勁歌熱舞。


小王子(剪接版)

小王子(現場版)

上一季的《中國達人秀》,亦有位失去雙親的蒙古小孤雛,叫做「烏達本」,唱草原民歌《夢中的額吉》,表達對離世母親的思念,歌聲一鳴驚人,現場好多人即時聽到喊,但係電視版本,被人發現「咪咀」,原來製作人員為咗效果更佳,將另一個較年長的蒙古細路的錄音,剪接咗落去,結果烏達本一場真真正正賺人熱淚的表演,變咗呃人熱淚的做假。

《中國達人秀》,其實係賣遍全球《Britain’s Got Talent》系列的移植品,呢個天才表演的精髓,在於其貌不揚原來身懷絕技的反差,好似當日「靚聲村姑」Susan Boyle,一個肥嬸唱出天籟之音,對所以就算在外國,相信幕後人員都會搵啲半職業人士做枚,其算真正的「真人騷」,呢個半做馬方式,嚟到中國,又點會唔做假兼大做特做。中國13億人,真係乜嘢奇人奇士都有,《中國達人秀》執正嚟做,可以有無限驚喜,冇理由要做馬,好似「佛涯組合」同埋蒙古小王子,真才實料,表演觸動人心,整色整水反而捉蟲。


潘倩倩(女聲)

潘倩倩(男聲)

望住呢個《中國達人秀》,既覺得可惜,亦替香港演藝創作擔心。例如有個潘倩倩,真正身份就算唔係火煱店女服務員,亦不過係個二打六,但係唱起歌,唱贏香港一線女星幾條街,最恐怖的,反串唱男聲都可能唱羸香港一線男歌手。

大陸演藝創作,臥虎藏龍,最蝕低地方,唔係班人冇料,而係太多禁區扼殺創意,香港娛樂圈,差唔多成個搬咗返大陸,個個搵到盤滿砵滿,香港明星,就算二三線,都仲有啲名牌效應,仲可以食吓老本咁。

話就話一國兩際,但係中港之間,政治經濟社會文化甚至地域的楚河漢界,不斷被洗刷磨蝕,亦係一個難以逆轉的趨勢,娛樂圈就係最佳例子,以前未「屍爬」(CEPA) ,香港演藝界愁雲慘霧,仲拍到叫座叫好的《無間道》,今日個個北上搵真銀,差唔多放棄咗最能發揮創意的香港地盤,與此同時,內地大搞文化振英傳媒改革,大量官方傳媒準備殺入香港,名為國際化,實為同化,順叔講過好多次,到香港年青人,唱住內地流行曲,追捧內地明星的時候,一國兩際就正式玩完。

早兩日寫過所謂香港的「核心價值」,其實係最基本的普世價值,在中港兩地的融合過程當中,香港最大作用,其實係令中國共產黨,明白自由、民主、法治等普世價值的可貴,香港演藝界北上搲撈,無可厚非,但係就唔知有幾多個,會嘗試踩吓線,衝擊一下內地意識形態的思維,爭取多少少創作空間,唔知當日支持唐英年競選行政長官的演藝界選委,最後有冇變咗「無間道」?

講開又講,香港最有創意的空間,在互聯網,年青人惡搞得嚟,就算政見不同或者容易受社會情緒感染,絕大部分充滿正義感,對政治議題又充滿興趣,呢個自由創作「公共空間」太重要,絕對唔應該改變,作為一個間唔中會惡搞吓的超齡網民,順叔強烈反對惡搞刑事化。

香港演藝界代表,得唔得閒,為網民惡搞的自由,講幾句說話?

伸延閱讀:
1. 新聞透視: 惡搞與二次創作(噚日先出街,建議所有惡搞網民都要睇吓)

7 則留言:

  1. 惡搞刑事化呢招唔知係咪「起錨」變「超錯」所帶來的「政治後果」?!居然可以話先通過法例,容後諮詢係咪豁免二次創作,真係「超錯」囉個次序!

    回覆刪除
    回覆
    1. 呢單嘢睇吓點玩,嚟真的話,GOW財茄台可能好快會執粒...

      刪除
    2. 祝君好運

      唔一定無轉機的,噚晚都有睇翁生隻故仔,歐美日豁免戲仿、同人創作的做法好值得參考。仲有,香港的問題唔單乎係咪豁免二次創作本身,而係成個法例修訂程序。

      版權條例本質上唔似醉駕、藥駕一類關乎人命,具迫切性,但影響層面廣泛得多;即使係堵截雙非咁民意一致,都左度右度啦。如果吓吓立法或修例都唔做公眾諮詢,叫人通過咗先算咁草率,以後仲得了?!

      套用詹爺喺節目中的一句話:「呢個時代係一個要被公開傳播的年代。」大眾,尤其係從事創作、演藝及文化等的,應該多啲反響,呢條修訂條例逆時代進程倒退,扼殺創意,扭曲律法制定程序﹒﹒﹒

      刪除
  2. 嘩,你真係好似煙草報上身咁消晒毒喎!

    香港最後一個明星叫古天樂,最後一個歌星叫陳奕迅,之後再冇人可以喺中港台都有號召力,娛樂圈冇明星就冇領導地位。

    惡搞刑事化就證明香港地包容能力太低喇。

    回覆刪除
    回覆
    1. 哈哈哈,冇錯,繼續消毒...

      港姐而家仲係曾志偉,好撚悶囉...

      男明星,唔到四十紅唔到,做戲唔會有味道;女明星,最後一個上到枱係邊個?楊紫瓊?咪玩啦,禾寧願睇潘霜霜了...

      刪除
  3. 烏達木其實師出名門,係唱作“吉祥三寶”嘅布仁巴雅爾及烏日娜夫婦嘅學生。烏達木當晚雖然咪咀,但播放嘅並非另一個細路唱嘅“夢中的額吉”,而係佢本人嘅錄音版本。後來嘅比賽中,佢已現場演唱,表現其真正實力。下面係佢參加達人秀前,由佢兩位老師兼契爺契媽布仁夫婦帶佢上央視國際台作介紹。

    http://www.youtube.com/watch?v=aacUPfXS_kI&feature=related

    回覆刪除
  4. 烏達木清唱“夢中的額吉”:
    http://www.youtube.com/watch?feature=player_embedded&v=YOTF5qmfw1E

    回覆刪除