2012年9月27日星期四

乾溏小鴻海(上)



今期開富士康國際(2038),曾經何時被稱為「小鴻海」的香港藍籌。

家吓全球市值最大的公司,叫做蘋果,美國做愛瘋捱劈嗰間,市值盛惠6,300億美金,中石油(0857)中移動(0941)再加中國銀行(3988),三大巨型中字號巨企攬埋一齊,先有呢隻蘋果咁重磅,你話佢值唔值咁價都好,一個iPhone瘋靡全球,從此香港人搭地鐵要耷頭縮膊拗壞頸椎在所不惜,仲用緊Nokia乜叉乜零冇What’s App等如冇朋友,由Window到Google到iPhone,都係一個消費產品改變人類生活甚至生命模式,不得不配服美國佬的創新能力,中國唔想在第三次工業革命重演100年前命運,有排追。

蘋果最新產品,叫愛瘋快,蘋果新教主 Tim Cook在美國時間今個星期一,發表一份萬眾矚目的聲明,愛瘋快推出市場3日,第一批超過500萬部愛瘋快已經賣清光,佢又話正竭盡所能,務求令所有想愛瘋快的顧客,盡快一人有一部咁話,可能愛瘋教主勢估唔到,就喺呢個時候,蘋果最重要的iPhone代工其中一個大型生產基地,啱啱搞到一鑊泡要停產。

話說中國時間星期日晚,富士康國際母公司鴻海科技在山西太原的廠房,爆發大規模騷亂,據大家估估吓的數字,有2,000人扎馬,參與人數及傷亡數字,斷估冇乜人知道,不過根據官方傳媒講法,出動到5,000武警平亂恢復秩序,場面都應該好哄動,話佢係建國以來在單一企業爆發的最大規模「群眾事件」,都唔算過份。

出事之後,鴻海發言人話老闆郭台銘已經即飛到太原坐鎮善後,出事工廠唔負責組裝愛瘋快,唔會影響出貨咁話。攞棍扑,效率又點及得上用錢掟,聽講鴻海即刻派發加班費,工廠「放假」一天就恢復生產,繼續流水作業。

鴻海的生產線應該高度精細有效率,系內各公司點分工,資料披露就真係得「呸」一聲,就算富士康國際,相信冇乜邊個散戶講得出做乜,有意冇意間,保持神秘感,就好似佢老母鴻海的工廠咁,保安高度嚴密設防,工人進出都要搜勻全身,聽講被發現身藏任何金屬物料,即炒冇情講,避免好似蘋果呢類大客仔的商業機密外泄。

不過鴻海過百萬員工,請得咁多人,即係入職都唔會有乜嚴格要求,肯做步捱就得,所以斷估工廠裡面,永遠潛服咗唔少競爭對手派嚟的無間道,早幾年十幾個員工跳樓自殺之後,連勞工權益組織及國內傳媒都經常派臥底入鴻海或富士康工廠,污嘈嘢又變得好易曝光。

好似爆發騷亂的太原工廠,只係八月底,上海有份晚報就派咗個記者仔做臥底,踢爆太原工廠有份生產愛瘋快的后蓋,臥底記者被分派到的生產線,只係將手機蓋的音量孔用貼紙遮住,方便下一道的噴漆工序,工作細份簡單,但係做到冇停手,一日十粒鐘,一個人已經要處理3,000個愛瘋快組件咁話。

報道出街唔夠一個月,太原工廠即爆大鑊,鴻海話最新反日情緒高漲,部分後生仔將敵意發泄在同日本Sharp有密切生意來往的鴻海,不過大陸社交網站最流行的版本,講緊工廠保安在出事當晚,狂摳一個山東工人,激發山東幫老鄉還拖,搞吓搞吓,河南幫都加入戰團。富士康太原工廠接近8萬個工人,保安千幾二千個,做得工廠保安,多數都係本地人,即係山西幫,唔使問阿桂,成件事同中國特色的地方主義好大關係,同聲同氣的工人分幫分派,擦鎗走火好易變成「群眾事件」。

咁就帶出一個更大問題,好似鴻海呢類聘請大量廉價勞工的工廠,近年大舉北移內遷,已經改變咗流動人口的暗流,成個勞工市場結構改變晒,鴻海要在內陸複制又平又勞工密集的生產線,同時要面對全新的管理問題。

下回再續。

關連文章:
1. 乾溏小鴻海(上)(下)
2. 鴻海迷航(上)(下)

伸延閱讀:
1. 新聞晚報: 富士康太原廠臥底10日

7 則留言:

  1. {只係將手機蓋的音量孔用貼紙遮住,一日十粒鐘,一個人已經要處理3,000個}
    平均用l2秒貼一張貼紙,請問有什么問題?請小心認真看清數據,
    不要好像英國傳媒話什么13歲鱈魚只淨百幾條的不盡不實報導·

    回覆刪除
  2. 每部電話有四張貼紙要貼(在Foxconn.Undercover.pdf內),如果真系要十個鐘貼就系三秒一張。如果真正貼的時間是九個鐘,就系2.7秒一張。這是小心認真看的數據。

    回覆刪除
    回覆
    1. "平均每3秒钟,就有一个手机后盖从我身前的流水线上经过.我要做的是迅速拿下来,点好,油墨,再放回去,如次循环反复"

      刪除
  3. 我評論是作者說的{只係將手機蓋的音量孔用貼紙遮住,一日十粒鐘,一個人已經要處理3,000個} ,等於12秒一個!
    而且若如你(PandaBear)所說只有3秒 (流水线上经过.我要做的是迅速拿下来,点好,油墨,再放回去)這個根本不現實,我不知道為什么貼紙要點油墨,3秒根本沒法完成!我相信你都是道聽途說吧!

    回覆刪除
    回覆
    1. 奇怪,我所說也是作者說的,copy and paste from the pdf.

      為什麼要這樣做?可能是這樣點油墨比較準確吧。如果熟手,你工作平台在流水線邊,三秒是可以免強完成的。我想信鴻海、富士康不會請個人回來給他12秒做這麼簡單的工作。畢竟他們是血汗工廠不是職業培訓。

      刪除
  4. 我從頭到尾都是批評:沒有小心認真看清數據,道聽途說 ! 沒有調査研究,就不要誤導人,只是copy and paste, 是沒有意義

    回覆刪除
  5. 本來各位「匿名」兄的留言,禾唔係好想回應的,既然熊貓熊巴打講咗兩句,禾亦順便講兩句。

    「沒有小心認真看清數據」,如果只係應用在順叔撮要引述臥底記者的一段日記,都算係合理的批評,其他的就沒有什麼好回應的了。

    回覆刪除