Best Blogger Tips

2012年10月25日星期四

時裝大茶飯(下)

(刊於2012年10月25日am730)

衫屎必裂 三年大計 一年一折

上回講到今天下半年開始,據中央結算資料,海通國際(0665)及中南證券兩間證券行,過去半年大手吸納思捷(0330)股份,講緊十幾億銀(港元,下同)貨,跟住就嚟單50億供股。

海通國際前身係周大福證券,聽講中南證券又同新世界發展(0017)榮譽主席鄭裕彤食過好多大茶飯,一年前今日的新世界又用過供股呢招,唔少人自然會無限聯想,彤叔或者新世界班大帝,可能對思捷都有興趣。

例如今年6月,即係海通中南手影曝光之前,思捷主席同埋荷蘭靚佬行政總裁齊齊劈炮,又搵前恒生(0011)大班兼坐咗思捷董事局15年的柯清輝做主席,柯大俠當日被傳媒扑咪,問佢思捷點算的地方,就係中環新世界中心,當時亦有報紙的八卦財經欄猜度過,柯大俠在新世界中心有個私竇,唔知係咪趁股價超殘,搵緊彤叔買起思捷咁話。

思捷今次供股,同新世界舊年手法好似,都係海嘯價二供一,仲有消息公布後3個交易日之後就除權,有心街外人想買多啲,又或者小股東想睇清楚啲,都冇咁多時間做嘢。求其搵間最近供過股的香港上市公司,例如寶勝(3813),9月21日宣布供股,按連權基準買賣股份的最後日期在10月4日,都叫做有兩個星期10個交易日俾市場反應,思捷今次快刀斬亂麻,同新世界手法咁似,又唔怪得咁多人將兩間公司連埋一齊講。

柯大俠在思捷董事局坐足十幾年,遊輪坐到變大眼雞個個跳晒船,佢老人家都處變不驚,引用柯大俠自己講法,「我肯坐落去梗有我的原因」,換個角度諗,既然柯大俠係思捷資歷最長的董事,萬一思捷爆煲升仙,甚至出現大大劑醜聞,等如刮花佢老人家貞節牌坊,要令「思捷女士」吊住條氣,甚至死屍翻生,最好方法就係搵返個疊水大股東射住鎮場。

彤叔對時裝零售又好似好有興趣,舊年中突然爆出彤叔的私人投資旗艦周大福,買咗十幾巴仙佐丹奴(0709)股份,過去一年越掃越多,最新持股已經超過25%,仲搵埋個乖孫入董事局,即係真係對呢間公司堅有有興趣 ,成件事變得更加有故仔講,十幾廿億銀控制到佐丹奴的亞洲零售網絡,幾十個億控制埋思捷全球萬幾個網點,或者更有得諗,最低限度,如果今日日本Uniqlo再打佐丹奴主義,彤叔已經打咗口大釘,奇貨可居。

至於佐丹奴加思捷,又或者時裝溝周大福有乜協同效應,阿水都知道,協同效應呢家嘢,係投資銀行賓架氹財主落疊的必殺技,講乜都得,只要有人信,例如思捷加新世界百貨(0825),即時幫一個國際品牌打通中國消費市場的任督二脈;又或者橫掂思捷啲衫都賣唔去,索性大搞時尚零售,賣吓鐘錶玉石咁,可以幫周大福珠寶(1929)打開全球零售或批發的新渠道。更何況,新世界周大福系,出咗名雜食,如果唔係,唔會搞到成間公司咁「綜合」,橫掂巴士地產碼頭電訊酒店乜都有,開多辨時裝零售更加冇問題。

當然啦,新世界長年咁大管理層折讓,正正因為由管理層私人投資對上市公司業務,太過雜食,樣樣有,樣樣管理得唔係咁好,彤叔子孫滿堂,係咪代表家族管理一個咁綜合的業務系統更加有效,仍然係最大疑問,新世界要收窄管理層折讓,最應該係減肥減嘢,唔係食多幾餐大茶飯谷到間公司越嚟越雜。

香港股民鐘意跟「明星效應」,一間九唔搭八的公司,只要有位城中富豪入股,硬係鐘意坐貴風車跟住炒,所以邊個大孖沙入股邊間公司,股價即時炒上即時封蝕本門,講到尾都係嗰句,俗語有云,衫屎必裂,人哋食緊大茶飯,街外人又幾時會知道人哋想做乜,當係智渾焗飯呢類飲食吹水節目咁睇囉。

關連文章:
1. 時裝大茶飯(上)(下)
2. 大餅變紅衫
3. 思捷女屍(續集)

伸延閱讀:
1. 立論: 思捷抽水博翻身方向錯晒
2. 樂香園:柯清輝幫彤叔買起思捷?
3. 鄭家純回應收購佐丹奴: 「做嘢前唔可以講出嚟」

3 則留言:

  1. 『事實上,思捷的供股計劃,以及其所提及的改革,無一是針對思捷目前最弱一環。如果管理層單純地以為思捷主要的問題在於品牌形象及店舖不夠新淨,或銷售網點不足,那明顯是在侮辱消費者。』-思捷抽水博翻身方向錯晒

    我同意以上觀點。思捷問題所在並非唔夠鋪唔夠廣告,系產品太過時價錢太貴。除非彤叔打算合併佐丹奴同思捷(如Gap、Old Navy、Banana Republic同公司不同檔次),否則唔知點救。

    回覆刪除
    回覆
    1. 吊,由頭到腳都變咗炒股,仲要係藍色,死得人更多,已經唔需要用正常角度去睇呢條女屍...

      刪除