呃你孖孖

當「文化商人」遇上「以為自己是文化人的企管人」

今期開文化中國 (1060)。

公元2014年3月12日，天方夜談，文化中國溝阿里巴巴，諗住變變變，芝麻開門，一嘢變咗呃你媽媽，幾毫子炒上幾蚊，文化中國市值一度炒到超過700億（港銀，下同），跟手一路派貨，越派越有，全日55億成交，撲入散戶非死即重傷，全城坐艇，媽媽有聲。

搭個棚、作個故仔、再剥師奶條底褲的股壇大龍鳳，每日上演，講緊做得有幾過份，食到有幾盡咁解。文化中國一場大茶飯，聽講有大戶賺咗十個億計，不過盲衝衝高位接貨，家陣蟹綁在文化中國的游資，大大話話亦有十幾廿億，殺孽咁重，搞到唔少細價股炒股都冇啖好食，累街坊。聽講唔少中環古惑仔，㷫過火屎，四出刮料，好想知道文化中國呢舖大茶飯背後，是何方神仙過路，竟爾寸草不生。

文化嘅嘢，財經茄哩啡識條春咩，不過，有一位財技高手，乃「文化人」加 投資銀行家再喪搭事事評論員的混合體，深諳文化中國管理層的思路套路，講到品評呢場文化大龍鳳的資格，掉佢其誰，呢位財技高手就係... 就係...

登登登登！各－－位－－觀－－眾：精電(0710)行政總裁，蔡東豪哥哥！

Yeah。

是咁的，文化中國主席，叫董平，阿董生好威，堅威。如果將大陸電影分為國營同民營兩邊，國家隊的大佬叫韓三平 （啱啱被退休），另一邊的教父式人物，就係董平，冇在董平的電影出現過，都唔好叫自己做大導或者一線，董生的杰作包括《臥虎藏龍》、《讓子彈飛》，仲有同周星馳爺爺合作的《西遊》咁。有人叫董平做「中國民營電影教父」，不過董生好謙，只係將自己定位做「文化商人」。

大陸電影商業化，唔夠廿年，文化喪溝股票，經驗更青澀，十年前唔係咁多人識玩。將文化工業同資本市場結合，打破意識形態禁忌，董平乃第一代推手，帶呢位「文化商人」登陸香港股市，授以搭棚秘術、財資技法的，正正就係蔡東豪哥哥。

話說2004年底，阿蔡生去咗友利(0419)呢隻經典殼股做董事總經理，月薪一皮，打破香港上市公司最低工資記錄，才子賤價下海，全城跌碎眼鏡。原來東豪BB忍辱負重，重要任務幫董平間華億，借殻上市。於是「友利」變身「華億新媒體」，蔡東豪哥哥作為財技高手的金身罕有閃現，領銜演出財經大戲，單嘢幾個月搞掂，2005初東豪BB收返埋個金身，閃咗去佢老闆的另一隻殼精電做行政總裁，犒賞人工暴跳到10球一年。呢場十年前蔡東豪哥哥一手策劃的文化大龍鳯，仲有董平同保利文化(3636)的瓜葛，早排「文化大拍賣（下）」已經寫過，唔重覆。

阿蔡生去咗精電搞工業革命，佢在「華億新媒體」董事會，一直保留非執行董事的職務，直至2008年初，「華億新媒體」隻殼搞完一輪後，再賣俾另一個文化界財資高手，前網通CEO兼中國寬帶產業基金創辦人田溯寜，「華億新媒體」再變身「華億傳媒」，蔡東豪哥哥同董平一齊撤出華億董事會。

一個人有兩塊臉，唔出奇，蔡東豪哥哥做財經評論員，都警訓過小投資者，上市公司股價經常失驚無神大起大落，而董事會又次次同你講「不明股價升跌原因」，多數有古怪，唔知點解，蔡東豪及董平，在「華億新媒體」董事會，共渡近兩年零八個月歲月，期間在港交所發出的「不明股價及成交波動原因」通告，又足足發咗20次；同樣，眾所久知，阿蔡生好痛恨大陸大鱷混水漠魚，破壞香港「核心價值」，不過又可以同董平合作無間，教曉「文化商人」股市的藝術，社會主義中國的文化藝術界，從此染滿資本主義香港的銅臭，呢啲咪叫一國兩制囉。歷史上的財經「Hi」story會記住，當「文化商人」遇上「以為自己是文化人的企管人」時拼發的火花。

學滿師的董平，玩完「華億新媒體」後，好快揾到另一隻殼，叫做「上聯水泥」，亦即係今日的文化中國，幾年來股價彈吓插吓，同樣搞完一輪再揾科網猛人（今次係馬雲）落搭，金蟬脫殼，套路似足十年前華億場戲。文化中國在2013年7月，透過高盛射咗批貨出街，價值約2.7個億，每股成本唔使5毛，當高盛收半個佣，做呢單刁都係賺得百零萬，一球佣竟然請得郁高盛，當有仙人指路，大雞唔啄細米，原來大大大茶飯在後頭，不過高章到冇人識睇咁解。

如果在蔡東豪哥哥檔主場新聞，用「阿里巴巴」做關鍵字搜索，新聞加評論冇一千條都有幾百，今次阿里巴巴收購文化中國搞到全城炒仔坐艇，David Webb都叫證監去查，平時好配合股壇長毛發功的蔡東豪哥哥，竟然又一粒字都冇提過，咁大個位都唔入，留手咗啲囉，阿蔡生將佢十年前同董平合作的經驗，拎返出嚟同投資者分享吓就好喇。

好多人都問緊，文化中國大龍鳳，究竟係咪騰訊（0700）及阿里巴巴的孖孖「馬馬」呃你媽媽？呢個問題，全香港最有資格評論的，只有蔡東豪哥哥了，聽講阿蔡生及董平，兩位文化人的辦公室，都在香港金融中心的一座土豪色寫字樓，蔡生撞到故人的時候，唔知會唔會順便幫香港散戶八掛吓呢？又唔知蔡東豪哥哥會唔會繼續監察大陸大鱷的風格，出嚟主持正義，帶蟹民出苦海呢？

好緊張，好緊張，好緊張呀！

關連文章:
1. 財經林峯
2. 文化大拍賣（下）

伸延閱讀:
1. 信報：中國電影幕後推手
2. 財富人生：文化商人的資本遊戲
3. MediaInfo: Meet the boss！Johnson Ko

同場加映：

同一屋簷下

海底撈鹹魚（下）

呢期講鹹魚股，上回講到，上市公司搵到名牌基金做策略投資者，放盤淡水未必一定翻生，好似國美電器(0493)咁，突然大量競爭對手加入，爭到條條都變晒鹹魚咁滯。

近排國美跌得急，因為出咗盈警，一間舊年仲賺緊近廿億人仔的公司，今年上半年見紅，係投入大量資源發展電子商貿。國美同埋老對手蘇寧電器(A股:002024)，近日聯手發起地獄割喉減價戰，成個勢，似乎想在京東商城(360buy.com)未上市之前，以本傷人將呢個網上對上擠走，不過聽講內地消費者好興在網上買電器，砌底一個又出一個，唔單止阿里巴巴的淘寶網，騰訊(0700)今年先完成收購的易訊網(51buy.com)，又話要加入減價戰戰團。

玩電子商貿大戰，唔係搭個網上平台咁簡單，最攞命要做埋倉存物流，呢個環節舊年開始出現好多新政策，斷估未有邊間公司掌握到絕對優勢，一場混戰。美國幅員唔細得過中國幾多，人口較少，網上購物流行咗好耐，不過電子商貿都取代唔到現實世界的零售網絡，否則Walmart唔需要開咁多巨舖請咁多人，中國電貿戰打到飛起，血光之後，國美蘇割等坐住幾十億銀、資產負債表又唔算單簿的鹹魚，應該有一兩條可以翻生。

有一類公司，變成鹹魚股的原因，在於擴張得太快，唔肯走位衝去晒太陽，想唔變鹹魚都唔得，例如比亞迪(1211)。咪以為比亞迪只係燒錢搞電動車，呢隻嘢放落太陽能電池的投資，亦都唔嘢少，早兩年在大陸睇報紙，提到陝西省發改委有個「陝南循環經濟發展規劃」，2009規到2020，當中「十大工程」之一，就係比亞迪投資225億元(人民幣，下同)的5000兆瓦光伏電池項目。

比亞迪今年有113億元銀行債務到期，每年資本開支約100個億，舊年主業現金流入只有60個億，最近一單新聞，竟然係在天津起電動巴士廠，又投資20個億，好似完全唔擔心會爆煲。比亞迪及保利協鑫(3800)等公司，話佢環保節能又得，話佢科學發展又得，啱晒國策，所以應該大把地方政府搶住搵佢哋投資，亦會有唔少補貼或著數，呢樣極可能係比亞迪仲咁夠膽燒錢的主要原因。

國內得到政府支持，甚至中央政府的祝福，歐美國家近年成日追住中國光伏業，認為國家補貼構成不公平競爭，應該唔會全部老屈，加上做光伏有著數下個個湧住去晒太陽，國策支持變產能過剩，一間二間公司變晒鹹魚，發展太陽能是一個必然趨勢，中國光伏企業，最終會有幾間鹹魚翻生，不過亦多數有唔少會變成梅香鹹魚。

當然啦，有啲鹹魚只係扮翻生，彈兩吓以為復活，好似思捷環球(0330)咁，高層出名人工高福利好，但偏偏個個都坐唔定，出出入入好似自制股價波幅，今日升3成過幾個月跌2成，已經變成不折不扣的炒股，最新呢位行政總裁又唔知可以坐幾耐，會唔會又掟個「3年轉型計劃」，一年唔夠就拜拜嚟多過起跌循環。

要捕捉到觸發鹹魚翻生的因素，應該留意管理層在逆境的時候的取態及策略，呢啲先係最有用的金融財經資訊，不過呢，由大行報告到傳媒報道，多數人都傾向一沉踩多腳，好似呢兩日提過的上市公司，股價已經跌咗幾截，大行分析員先嚟調低所謂「12個月目標價」又有乜用，有時上內地網上論壇索索風，甚至搵啲公司管理層的微博關注吓仲好。

用100個億港銀做指標，而家可以買起半間保利協鑫，5間霸王國際(1338)，3間滙源果汁(1886)， 0.8間國美電器，0.7間思捷環球(0330)，兩間李寧公司(2331)，呢度唔係話建議撈底，只係想指出一點，而家個市夠殘，成個金魚缸都係鹹魚，查實唔需要分析都知道，未來必定有唔少鹹魚翻生的故事。

關連文章:
1. 海底撈鹹魚（上）、（下）

海底撈鹹魚（上）

鹹魚理想．．．

呢期太忙，搵幾條鹹魚股望吓，即係跌得好殘，又有唔少人心郁郁博反彈的上市公司。鹹魚雖然唔識游水，但潛在海底唔易撈，博鹹魚翻生更係高難度動作，呢期只係當打吓牙骹呃兩日稿費，即係放馬後炮。

鹹魚有好多種，有一種叫做深海鹹魚，壓在一個極深的經濟周期，要慢長的結構性變化，或者市場相信結構性變化將會發生，先至會翻生，今年最好例子，就係大陸國企電廠。

發電廠應該係近年最折墮的國企，好似華電國際(1071)咁，5年時間總資產谷大2.4倍，純利反而跌咗86%，增加產能等如做蝕本生意，因為被煤公司及擁有壟斷性地位的電網公司撳住搶。舊年底寫過幾篇《煤電網聯動》，講過中煤能源(1898)無端端同中國電力(2380)行埋，合資搞發電廠，可能因為煤企索到風，知道電力市場即將出現變革，對發電呢盤生意開始改觀。跟住大半年電企經營環境的確好似出現結構性變化，不過電改只係做咗小手術，電網仍然好惡，真正變化在於市場對煤價走勢轉趨悲觀，最激的講法，有人唱緊煤價十年大牛市已經玩完添。

大陸發電市場的結構性變化，有機會再講，重點係，如果要博呢類深海鹹魚翻生，就要超有耐性，等待漫長周期的完結，前題仲要係公司唔會爆煲，最好好似大陸國企電廠咁，打腫塊面扮肥佬，年年借錢保持派息，就可以諗諗，而家唔少航運公司都已經變成深海鹹魚，幾年之後，唔排除可以好似電廠咁翻生，不過中間有冇其他更好選擇，又係另一回事。

一條在其他人眼中的鹹魚，在其他公司看來，可能好有策略價值，放落盤淡水好似就會識郁，最佳例子就係綠城中國(3900)，本來瀕臨爆煲邊緣，九倉(0004)突然「白武士」式的出現，營運資金雖然仍然緊拙，但最重要係投資者相信公司最大問題已經得到解決，股價即時鹹魚返生，反彈一倍咁滯。

近排例子仲有一個雨潤食品(1068)，突然爆出嘉里集團持股超過5%的權益披露，股價又係爆升幾成，雖則糖王郭鶴年都有少少糧油生意，除非糖王想腌豬肉干，否則唔似有意會收購雨潤，嘉里同豬肉檔亦似乎大纜扯唔埋，更似某種原因或交易，坐咗雨潤的衍生工具的技術性接貨。

有時策略投資者打救，或者名牌基金入股，有條水喉入股，未必代表一定會鹹魚翻生，或者點石成金式從此魚躍龍門，例如李寧(2331)，早排得到兩大基金入股借錢兼參與管理，股價一度爆升，但最近又已經打回原形，甚至更殘，最新市值，50個億港元都唔夠。

再之前亦有一個例子，叫做國美電器(0493)，2008年全球信貸風暴之後，大股東兼主席黃光裕又要入冊，搵咗貝恩資本入股，貝恩話事人叫竺稼，當年巨型國企排隊嚟香港上市時，呢位「造雨人」呼風喚雨，但係唔代表可以同管理層合作，貝恩資本除咗當日提供資金之外，後來國美管理層爭奪戰，以至近月國美同競爭對手的割喉減價血戰，貝恩資本都好似冇乜幫過拖，同現任管理層的默契，好似及唔上TPG在李寧咁肉緊。

國美屬於突然多咗好多魚爭食、爭到個溏都乾埋條條焗住晒的鹹魚，唔單止要同蘇寧等老對手競爭，仲要面對京東商城等電子商貿新玩家，呢個溏夠晒熱鬧，聽講取近連騰訊(0700)都玩埋一份，下回再續。

關連文章:
1. 海底撈鹹魚（上）、（下）
2. 煤電網聯動（上）、（中）、（下）

老感點唱．．．

騰籠百鳥

今期再開騰訊(0700)，中國最大互聯網公司，近年密密四出收購，大小通吃，一個籠本來裝一隻企鵝，而家迫埋成百隻雀，究竟搞乜QQ。

幫襯開財經茄哩啡的話，應該知道順叔一直唔係好相信呢隻嘢的潛力，2010年底寫過篇《逃之QQ》，唔睇好騰訊可以無限增長，當時每股180港元左右，點知跟手半年屢創新高，見過230蚊；舊年呢個時候再寫篇《科網再熱》，繼續唔QQ信。

舊年5月，社交網站公司在私募市場炒到興烚烚，微軟85億美金400倍市盈率食咗Skype，Facebook上市前最後一輪引資擴股交易後，估值吹到760億美金，忍手咁多年唔上市，未上市已經吹到咁大，上市更激動，市值千億美金，市盈率1000倍。

講緊Facebook作為一間互聯網公司，都唔算太「後生」，過去幾年幾輪上市前集資，發展資金應該唔係乜嘢大問題，有搵錢絕橋，應該已經晨早用咗。Google在05年上市時，記憶中好似市值5百幾億美金，市盈率百幾倍已經好跨張，一千倍市盈率，呢個數太大，超越財經茄哩啡理解範圍。

可能太多想像空間， 香港上市的科網股都炒起埋，騰訊過去一個月，曾經炒到上近250蚊的歷史高位，近排回返唔少，但2011年市盈率仍然超過30倍。

超過30倍市盈率的估值，對於騰訊嚟講，只係一個慣性狀態，因為QQ往往以5成甚至更高水平增長，貴得有道理，不過，最近公布至3月底首季業績，增長只有2.7%，更出奇地，條街竟然冇乜人唱佢「增長放緩」，投資大行繼續睇好，甚至將QQ股價再炒上歷史新高。

一年四季，騰訊的季度業績，在2010年，按年增長幅度高達45%至60%，2011年第一季都仲有60%，但係之後3季，放緩至13%至22%，今年頭3個月，竟然只係個位數字，仲衰過被睇死為公用股的中移動(0941)，望住呢堆數字，唔需要點睇細數分析，都可以得出騰訊增長今非昔比的簡單結論，大佬，人都會老的，後生變中坑，上網溝女不如留喺屋企湊女，唔會日日打機，條街成日講住QQ用戶人數，但係好似從來冇講過QQ用戶群的年齡組合變化。

人會老，公司亦會老，騰訊管理層仲算後生，但係幾年迅速增長，員工數目由二千年變到二萬人，開始要面對其他所有大企業的管理問題及挑戰。騰訊在上個星期，宣布成立所謂「六大事業群」，究竟「網絡媒體事業群」同「社交網絡事業群」點分界，唔知，不過據管理層勾劃出的發展目標，基本上一句可以講晒，就係乜QQ都做，由網上搜索到電子商務，由中國到地球，唔放過任何發展空間。

乜都有，好多時等如乜都冇，太多變太少，例如微軟的Windows同埋Office軟件，發展到而家咁多功能，可能8成以上的功能冇人識用，騰訊可能面對差唔多的問題，網上太多嘢可以玩，自己茄殊又多，QQ平台本身唔需要點再大量投資，未諗清楚點做就四圍通殺。

騰訊講過，近乎創投的「產業基金」，未來會加碼到100億元人民幣，過去十幾個月，大大話話已經做咗四十幾單大小併購，投資對象包括網絡遊戲、視頻軟件、物流、電子商務，電影公司，乜QQ都有，當騰訊話你知佢準備連電影都拍埋，可以好大膽咁講一句，呢間公司開始有啲失去方向。

一間好的公司，會有好明顯的企業策略，配合企業的使命，例如講明要組織好全球資訊(Organize the world’s information)的Google，一樣發展到百足咁多爪，但係各種應用，都指向同一個方向，就係幫用戶更方便咁取得更有用的資訊，騰訊暫時未能夠勾劃出同一樣的企業願景，安身立命之本，暫時仲係QQ嚟QQ去，遊戲人間，唔似係一間冇咗佢地球唔會轉的公司。

科網再熱（下）

(刊於2011年5月20日am730)

(標題為後期改動)

上回講到，全球興起第二次科網熱潮，新一輪傳火棒遊戲，正在資訊高速公路上演。資本市場目前兩碌巨型火棒，一碌喺美國納斯達克中國科網新股，一碌喺創投市場。

上星期，有間內地交友網公司世紀佳緣，喺納斯達克上市，公司幫人尋配覓偶，首頁上有謂「光明榜」，以貌取人的話，相關女士質素認真麻麻，或者咁先有真實感，所以叫做中國最大「嚴肅」婚戀網站，舊年賺247萬美元(下同)，集資近8千萬，市億3.4億。美國上市中國互聯網公司，可能已經唔少得過香港內房股，數目咁龐大，唔會間間都咁堅，肯定唔少老外接咗火棒燒親手。今期科網熱玩法係，有穩定收入及盈利模式網企，未上市前，估值已經喺私幕創投市場吹到好大。

創投基金「天使投資者」，以前入股未上市互聯網公司，多數刁都係細細單，電盈(008)系99年入股騰訊(700)兩成股份，都係用咗110萬美金。今次科網熱，個波波喺私幕市場已經吹到好大，例如FACEBOOK最近一輪股權交易，公司估值已經吹脹到760億美金，唔少外國傳媒喺07年報道過，李嘉誠基金會先後兩次入股FACEBOOK，投資1.2億美元，持股約0.8%，如報道屬實，幾年間，有關投資超過6億美元。

今次科網熱，同上期有兩大分別，第一個係仲未出現好似AO加華納、同埋盈動加香港電訊等世紀騙婚，另一個就係電訊股相對仲係好殘。

近期最大併購，要數微軟85億收購Skype，收購將呢間1.7億用戶網絡電話公司估值，推高到400倍市盈率，中移動(941)擁有超過6億用戶，估值反而得個位數字。

咁就帶出一個，今次科網熱一個最唔合理現象，提供網絡基建電訊公司，實實在在，市場不屑一顧；喺電訊網絡上面搞個虛擬網絡，大家趨之若鶩，今次投資熱潮，更貼切形容，其實係一次「社交網站熱潮」。

上一個科網熱潮，中移動高位80蚊，當年每股盈利只有1.25人民幣，就算以今日匯率計算，市盈率亦超過50倍，騰訊往績市盈率36倍，如果咁比較，未算去到瘋狂程度。

起泡又好，未起泡又好，如果社交網熱潮持續，提供真實世界網絡基建公司，唔會差得去邊，如果泡沬爆煲，中移動最少有超過4厘股息墊底，順叔夠膽叫人得閒買啲中移動，不過同半年前一樣，唔夠膽叫人買騰訊。

關連文章:
1. 科網再熱（上）｜（下）
2. 讀者Peter: QQ見300冇難度

科網再熱（上）

(刊於2011年5月19日am730)

（標題為後期改動）

今期睇睇中國科網股。

舊年4月，財經茄哩啡寫財經影評，講過中央政府要「振興文化產業」，又要搞咩嘢「三網融合」，十年前科網熱潮，可能喺中國資訊高速公路再上演，呢個講法，錯咗一半，因為科網投資熱，唔單止喺中國發生，而係全球再現，新一期《經濟學人》封面，就以「The new tech bubble」為題。

舊年11月，順叔寫騰訊(700)，講過內地收緊互聯網自由空間同時，派出國企國家隊大舉進場競爭，民企網絡公司增長將放緩，建議「逃之QQ」，呢個講法，以股價表現計，暫時錯晒，騰訊當日股價180元樓下，最近屢創歷史新高，230元都見過。

半年小結，順叔當日犯咗一個錯誤，就係如果科網熱再現，全球最大互聯網市場全受歡迎互聯網公司，唔會差得去邊，內地調控易放難收，唔好低估政策刺激效果，例如09年汽車銷費熱，同時唔好高估政策收緊作用，例如多年嚟樓市調控。

就算對分析員研究報告幾嗤之以鼻，唔好當佢哋完全冇到，投行形成「買入共識」或「賣出共識」時，如果太逆向思維，短期好大機會蝕底。通街唱淡，靠長線資金好難推得起；人人唱好，想隻股票跌番多少先買都冇機會。

近半年騰訊，就係一個市場「買入共識」，舊年11月有16間證券行，將一年目標價放喺200蚊樓上，最新有14間，目標價高於250元，當「買入共識」太歸邊太跨張，好多時就係爆煲前奏，例如07年股市高峰到08年信貸泡沬爆破，只是一年之隔，進退關鍵，在於判斷個泡吹到幾大。

呢家嘢好多時靠感覺，或者常識判斷，例如07年10月聽一位做結構信貸銀行家朋友講，幾個月冇刁做，唯一工作就係同班芬佬做投資者教育，解釋咩嘢係CDO，就係呢句說話，令順叔逃過所謂金融海嘯一劫。

講咗咁耐，絕對唔係轉軚叫大家高追騰訊，而係想講，短炒操作，尤其係在熱潮當中傳火棒遊戲，難度極高，下回再續，睇睇碌火棒傳到邊度。

關連文章:
1. 科網再熱（上）｜（下）
2. 讀者Peter: QQ見300冇難度

讀者Peter: QQ見500冇難度

2011年5月19日讀者PETER的來信，回應財茄同日在AM730「科網熱潮II」的文章（網誌版標題改為「科網再熱」），重新留底。

今天拜讀順叔叔在am700專欄，一邊叫人不好高追，一邊又要人抄。我不知道你明天(下)寫什麼。但是我估你想教人點抄。

阿叔，我請問你有沒有用qq? 微信?
早前2日宣布開放Qq 平台，可不要小看這件事。
遲小小出埋電話添。

去到300蚊，500蚊都沒有難度。點解?請你用過它的服務再說。

騰訊雲端操作系統:

阿叔，請看。

PeterLi

關連文章:
1. 科網再熱（上）｜（下）
2. 轉型中移動（上）｜（下）
3. 逃之 QQ （上）｜（下）

逃之ＱＱ（下）

(刊於2010年11月12日am730)

ＱＱ愛

上回講到，騰訊(700)唔可能係一間世界級互聯網公司，食粥食飯要睇國內市場。
騰訊今日已建立互聯網霸主地位，近乎壟斷，但其實大部份收入，可以話來自「偏門」生意，唔係好啱中央胃口。

例如QQ聊天室，殺手鍊應用之一，QQ即時通訊活躍用戶，至今年九月底，超過6.3億，第三季，最高記錄1.2億用戶同時在線搞搞震，認真跨張。

呢個全國最大自由空間，舊年年初，一度拉閘兩個月，騰訊官方講法，因為要做網絡升級，實際上當時中央七國部委，成為整治互聯網專項行動辨公室，打擊所謂「三俗」之風，要配合阿公進行和諧工程。

QQ聊天室人氣旺，自然成為網上詐騙熱門工具，更加出晒名係尋歡獵艷聖地，到內地網上論壇走兩轉，唔難發現好多人對騰訊咬牙切齒，認為QQ聊天室，令國人已經相對混亂嘅道德觀念，更加亂七八糟，唔少人更建議QQ聊天室應該永久閂門。

網絡遊戲近年成為騰訊增長新熱點，但呢方面河蟹力度都唔細，中央政府連網民連線打機俾人蝦，都關心埋一份。今年六月，文化部整咗份網絡遊戲暫行管理辦法，鐵腕整治，嚴禁強制PK，即係未得角式扮演遊戲玩家同意，其他人唔可以砌佢，更大鑊者，文化部講明，暫行將變永遠，會推行網遊實名登記，未成年又唔可以進行虛擬貨幣交易。

Q幣取代人民幣，可能係天方夜譚，但虛擬貨幣宏觀調控，絕對唔係講笑，係中央控制互聯網企業殺手鐧。今個星期，又有新招，今次仲跨張，包括人民銀行十四個部委，又整份聯合通知，對虛擬貨幣應用及流通，提出多種限制，Q幣如果唔可以炒賣，大家可以是但問吓國內朋友，對QQ會有乜影響。

國家主席胡錦濤，在深圳特區成立三十周，參觀幾間代表企業，騰訊就係其中之一，聖眷可能亦係死亡之吻，騰訊要做代表，就要識做少少，帶頭關閉QQ聊天室，全力配合中央實行實名登記，限制Q幣流通，未必冇可能，改邪歸正，偏門變正門，啱中央胃口，不過未必啱網民胃口。

建設和諧社會，虛擬世界自然要河蟹埋一份，以淨化網絡之名，行控制言論之實，肯定係政策趨勢。中國互聯網市場增長迅速，乃國情倒影，現實世界言論行為太多限制，虛擬網絡自然大放異彩，尋找敢言毒自由空間，自由空間越細，網絡公司增長越放緩，無可避免。

關連文章:
1. 逃之ＱＱ（上）、（下）

伸延閱讀:
1. QQ聊天室：中國最大的色情基地 (天涯論壇，網上打手多，真偽自辨)
2. 禁止PK (文化部網遊暫行管理辦法)
3. 虛擬貨幣已被納人金融監管視線 (中國評論新聞網)

逃之ＱＱ（上）

(刊於2010年11月12日am730)

十年前

1999年: 李澤楷入股打救QQ (伸延閱讀)

十年後

2008年6月10日，電盈被踢出恒指
同日騰訊成為藍籌

今期開騰訊(0700)。

公元2005年，同一位大陸朋友講開騰訊，當日股價個位數字，佢玩開QQ，建議有幾多買幾多，坐幾年，實掂。對於一個科網泡沫輸晒成副身家嘅中坑嚟講，諗到網股就頭痛，只係走咗一轉，勢估唔到，一間冇創意老番ICQ起家A貨，居然跑出。

阿Q精神，捉到鹿掹得條毛者，唔止財經茄哩啡，仲包括當年由數碼港到反轉香港嘅李澤楷。

電盈(0008)投資過騰訊，年報亦搵唔番資料，不過根據當日唔少報章報道，以及靠寫中國創投出位嘅李俊晨，在《INVESTING IN CHINA》一書中都有提到，電盈在99年，投資約110萬美金，買咗騰訊兩成股份，01年撲水還債，千零萬美金賣咗俾南非上市公司NASPERS。

呢兩成股份，如果坐到今日，市值650億，等如電盈3倍。08年5月恒指季檢，電盈眾望所歸冇得留低，踢電盈出局者，正正係騰訊，如果當年馬化騰敲門要錢見過面，恒指換馬之日，李澤楷唔知有乜感想。

公平啲講，騰訊未上市已經套現走人者，仲包括大陸科網風投教父熊曉鴿，創投難度高，賺十倍其實好有交待，又有邊個估到，一個傳呼公司程式編寫員，會風生水起到住石澳獨立屋，一隻企鵝QQ，可以吸引到全中國最龐大網上付費客戶群。

深圳山寨廠冇人識寶，今日QQ變成巨無霸，根據彭博資料，32間證券行，有一半將目標價放喺200蚊或樓上，投資者鍾意買貴嘢，唔敢話全世界都睇錯，不過幾肯定分析員同大多數香港人一樣，冇用過QQ，例如瑞銀位大哥，舊年三月仲話騰訊一年睇54.5，星期一連QQ同360搞乜都唔知，就將目標價由200抽到230。(所以話除咗一個浮動12個月目標價，投行應該整多個不變3年目標價)

12個月目標價不斷改變，標嚟做乜？

為咗了解QQ係乜，又聽朋友講QQ溝女超級容易，順叔特登搵部專上咸網預咗中毒嘅舊電腦，註冊登記Q號，忍受超慢速度，下載成堆軟件，俾錢買Q幣升級，攪足兩晚，最後都要食白果，女鬼都見唔到一隻。

受歡迎互聯網應用，應該白痴都識用， QQ兩晚痛苦經驗，最大結論係，騰訊目前介面及技術支援，其實反映咗管理層願景，根本冇準備衝出中國，邊個分析員同你講騰訊大把現金，海外收購有得諗，以後可以唔使睇佢份報告，要買精於併購互聯網公司，不如買坐住三成幾騰訊股份多年冇放嘅NASPERS。

唔識打世界波，做門口狗做到最惡一隻，理論上在大陸亦大把錢途，下回再續，睇睇QQ在大陸，又攪緊乜Q，桃之夭夭，定係應該逃之夭夭。

關連文章:
1. 逃之ＱＱ（上）、（下）

伸延閱讀:
1. 相關資料，載於《Investing in China: The Emerging Venture Capital Industry》 P.95
2. QQ大戰360 (信報網頁)