2012年1月9日星期一

股神在中國

(部分內容刊於2012年1月9日am730)


今期開巴菲特,尋找股神在中國的足跡。

中央電視台的《春節聯歡晚會》,應該係全世界收視最高的綜藝節目,因為全國13億人,在大除夕晚開始,要焗睇幾粒鐘,唔少人千方百計甚至走後門要在節目亮相。嚟緊龍年「春晚」,聽講會出現一位80開外的鬼佬嘉賓,叫做巴菲特,錄製結他自彈自唱節目,在「春晚」播出,在中國官方喉舌獻出第一次。

巴菲特在內地電視台,算得上係常客,過去兩三年,股神接受專訪最多的一個電視台,應該就係中央電視台。2007年10月,巴郡沽清光中石油(0857)股票之後,巴菲特隨即飛咗去大連,出席一間啱啱買咗、叫「Iscar」的以色列企業在大連分公司的開幕儀式。95年,巴菲特曾經在中國短暫停留,其後冇再到訪中國,一別12年山長水遠再訪中國,唔使問阿桂,點會為咗旗下公司分區辦事處剪綵咁簡單。

巴菲特大連之行,第一次接受咗中央電視台專訪,在09年開始,每年5月舉行的巴郡股東會,都會隆重接待CCTV派出的記者及攝制隊,年年接受專訪,仲熱情過對CNN; 2010年去中國,又拉埋老拍檔芒格及老友蓋茨,齊齊上《對話》;連自己個仔「彼德巴菲特」,都上過幾次內地電視台,大講「富爸爸」之道。

當然,有可能純粹因為個女記者「付豫」搞得佢掂

「股神」個招牌,在中國根本唔使點介紹,巴菲特的慈善飯局拍賣,近幾年都被中國投資者天價投得,唔少大陸芬佬為咗偷師,會專登買一股巴郡股票,目的就係出席巴郡股東會嘉年華,斷估更有唔少中國企業家,走去奧哈馬敲巴菲特道門,睇睇佢有冇興趣收買自己間公司,所以巴菲特要接觸中國投資者及企業家的話,應有唔少渠道,對住中國官方電視台仲咁熱情,唯一解釋,就係要全方位了解中國,一有機會,就塑造親善形象,甚至拓濶更多人脈,為未來可能出現的大刁機會做準備。

巴菲特對上一次投資在中國,入股比亞迪(1211),舊年股價跌到僅及雙位數字,比亞迪亦明顯出現資金壓力,但巴郡並冇增持;舊年美銀等錢使,大舉減持建行(0939),巴郡寧願直接投資美銀股債,都冇沾手國企銀行。兩個機會,巴郡均未為所動,可能股神覺得自己仲未夠了解中國,或者在佢老人家眼中,大舉投資中國的機會及條件,仍未出現。

內地股民近日最熱門話題,講緊「十年一夢」,「原地踏步」,上證綜指,跌穿2001年創下的2,245點「相對高位」,有位「中國股神」叫「林園」,06年接受央視訪問,是但搵個股票倉印張單,兩個月倉位由四千幾萬人仔,暴升到近億元,早兩日再接受訪問,已經輸到木口木面。

過去十年,中國經濟及股市市值,增長以倍計,如果話咁叫「原地踏步」,真係唔知乜嘢叫「進步」。財經茄哩啡唔熟指數編製的運作邏輯,但夠膽推斷, A股所謂的「十年原地踏步」,其實反映指數編製出現問題,冇一個各方認可的基準指標,各種指數狗粥咁亂,未追貼過去十年、A股經過各種市場改革的結構性變化,亦反映唔到中國經濟現實。

2002年,中石油都未有A股,當時每股H股,講緊一蚊幾毫港幣,正正呢個時候,巴菲特開始靜雞雞密密吸納,到2003年4月,巴郡持有7%中石油H股的倉位曝光,望返轉頭,港股在03年4月跌至8,400點的十年低位,股神投資中石油呢單刁,亦成為外國投資者,全面肯定巨型國企投資價值的分水嶺。

巴菲特近年咁熱情「擁抱」內地官方傳媒,唔會死錯人,股神再在中國做一兩單大買賣,斷估只係時間問題。當然,今日「中國」的投資價值,已經無需再由股神去肯定,股神又能否成功捕捉、甚至觸發另一個股市由熊轉牛的轉角位,已經係另一回事。

伸延閱讀:
1. GOW財茄台: 股神系列

2 則留言:

  1. 有個朋友靠中石油而置產(唔係電台主持那位),之後圍內朋友說一見老巴買乜港股,按埋under都要跟.之後佢買比亞迪,消息一出股價就郁,大家話等佢回番多少就入,結果升到幾十再回到十幾,都係你眼望我眼.如果佢又準備做大刁,可以令巴生親身出動嘅一定係大嘢.又要平而又要有壟斷地位…………莫非係有LTE國際地位嘅...

    回覆刪除
    回覆
    1. 巴菲特近年光環失色不少,不過只係因為「冇賺大錢」,而唔係好似其他乜乜物物「XYZ」股神咁,蝕咗大錢,例如好多人話佢買BYD「犯咗錯誤」,大佬,80蚊買就話錯啫,人哋8蚊買,你可以話佢80蚊唔走係錯,但係佢投資BYD呢項決定,冇證據顯示佢錯咗,客觀效果,仲改變咗外國投資者對中國汽車公司的睇法...

      刪除