Best Blogger Tips

2012年1月10日星期二

脫鈎港獨

(部分內容刊於2012年1月12日am730)


香港有兩個超敏感話題,幾乎提都唔提得,政治上叫「港獨」,經濟上叫「脫鈎」。

廣東道越嚟越少廣東人,星期日,上千香港人,到Dolce & Gabbana香港旗艦店門口,示威影相挑機,抗議擁抱大陸同胞的意大利名店,保安人員禁止香港人在店外拍攝,反「霸道」反歧視,社交網站成功組織快閃社運,推上報更做埋國際新聞,以動員速度及效果嚟講,本來無懈可擊,不過有一敗筆,門口留低唔少垃圾,99年法輪功萬幾二萬友包圍中南海,散場後自發帶走所有垃圾,過千公安的警備位置反而留低大量煙頭痰跡,唔好睇少呢個水平反差,如果挑機之後廣東道乾乾淨淨,成件事會更有說服力。

保安唔準影相呢家嘢,由尖沙咀名店到長江中心門口,相信唔少香港人都領教過,件事如果幾年前發生,冇可能炒得大,今次咁大鑊,可以咁講,香港人近年度氣谷谷埋埋,樓價被內地資金炒貴晒,生仔床位緊張奶粉都話短缺,難免會有情緒反彈,究竟係乜嘢情緒,相信唔會有太多人講得出口,又或者可以講到滴水不漏又政治正確。行政長官參選人梁振英,政綱包括「港人港地」,限制內地人在香港部分地段買樓投資,又建議公立醫院停收「雙非」孕婦,無非要將自己同香港人呢種「講唔出口」的情緒,拉近距離,抽吓水咁。

中聯辦宣傳文體部(有冇人可以話順叔知其實係做乜)部長郝鐵川,月前失驚無神急召記者會,狂插港大民意訮究調查計劃的「民調」,將「香港人」及「中國人」對立。俗語有云,死還死,七孔流血還七孔流血,兩回事嚟嘅,同樣道理,進行「民意調查」,唔等如「學術研究」,之但係吹佢唔脹,「學術自由」呢個光環,唔可以垃亂沾污,一個「民調風波」,12年前就搞到港大正副校長齊齊辭職,今次中聯辦咁公開插鍾庭耀,除咗以為「善忘」的香港人已經習慣京官指手劃腳,當然,亦因為呢個話題太敏感,任何潛在煽動香港人分離主義情緒的物事,未成形之前都要格殺勿論,廣東道昨日有自治運動人士揮舞龍獅香港旗,下次開「港獨」就大件事,所以,星期日廣東道呢場「反霸道」示威,在西環必定引起極大震動,甚至可能成為政策調整的觸發點。

2007年1月,人民幣兌港元,自1994年以來,第一次突破「一算」,港人去深圳消費可以用港紙的風光歲月,從此一去不返,去到今日,100蚊人仔兌123港元,5年之間,內地遊客多咗,而且有錢咗,掃貨血拼仲要有七五折優惠,床位海味奶粉樓價又點會唔貴,你話香港通脹唔關聯繫匯率事,打死都唔信囉。

港元同美元脫鈎呢個話題,幾年前仲係香港官場禁忌,行政長官曾蔭權,仲係做財政司司長時,曾經用「處女膜」嚟形容聯繫匯率,一穿就冇,舊年11月,曾蔭權接受香港傳媒專訪時,仍然大大聲話聯繫匯率效果優良,「那個同事提出脫鈎,我都兜巴星」咁話。

一個月唔夠,特首參選人唐英年,又係接受本地報章訪問,講到呢個朝中禁忌,竟然爆響口,話自己做財爺的時候,已經就脫鈎制定「一系列預案」,佢同當時的金管局總裁任志剛,「不時拿出來更新」,內容「由最保守到最大膽都有」,或者呢個係港府最高機密,曾蔭權連自己隻豬被人鎖入夾萬都唔知,否則應該已經「星」咗唐唐十幾廿巴,不過,港府應該已經為取消聯繫匯率︳做好幾手準備。

起呢條題,其實嚇吓人啫,講到尾,經濟實體捆綁埋一齊,想分離都冇可能,港獨天方夜譚,脫鈎卻是時間問題,唔好當香港人係傻嘅,財經茄哩啡只係想問吓,香港人的強積金,幾時可以「自由行」,買返多少人民幣資產對沖吓咁呢。

2 則留言:

  1. 冇記錯阿松都曾經講漏咀.仲有就係好似政府曾經話因為香港同老美經貿往來大,所以應繼續掛美元.但係回歸咁多年,香港同大陸民生經貿等應更為勿不可分.雖曰人仔未正式開放而所以暫不能與之掛鉤,但一齊掛同一籃子唔得!?木宰羊.順叔你估下如果有一日脫鈎,港紙兑美元升定跌?

    回覆刪除
    回覆
    1. 唔會貶值啩,香港冇債,而且政府帳目透明度極高,樓下亦冇隱藏任何地方債,最麻煩long-term liability可能只係公務員長俸,如果呢一刻depeg,價值應該最少同人民幣睇齊?

      刪除