2012年1月11日星期三

文化再革命

(刊於2012年1月11日am730)

今期開悶嘢,講吓人民日報樓下張人民網。

大家都知道,人民日報社係中國共產黨中央機關,聽講仲要係正部級單位,社長甚至會列席中央政治局或書記處,幾十年嚟御前行走近距離觀察中南海動態,今時今日可能冇咁巴閉,但順叔每日都仲會上去人民網,掀吓人民日報電子版,約略聞吓有乜風水草動。

舊年11月中,個電子掀頁版,只係開放頭4版,跟住就要收錢,不過最近又突然開放返,免費酬賓,原來人民網即將上市,招股文件初稿,仲在星期一上載喺中國證監會網頁。

人民日報本來就「代表人民」,「反映人民群眾的意見和建議」,哈哈,今時今日,中國股民竟然仲可以買一兩手官方傳聲筒,當年唔少在政治漩渦中左右失據的老報人,例如鄧拓,如果仍然在生,見到一個中共管制最嚴的官方喉舌,成為第一個擁抱資本市場的官方喉舌,怕且還是哭笑皆非。

據人民網招股文件資料,人民日報社都唔係冇錢賺的,至2010年底,淨資產有3.2億元(人民幣,下同),純利都有3.6億元,下面邊個單位最賺錢就唔知,不過在同期,人民網純利都有8,165萬元,按年增加2.6倍,勁,唔怪得人民網A股上市,發行25%股份,集資5.2億元, 2010年往績市盈率26倍,拍得住騰訊(700)。

A股市場,股民炒新股的瘋狂病態,仲嚴重過香港散戶,中國證監會主席郭樹清,上任後多次提出要改革一手市場發行制度,潛台辭之一,似乎係唔俾新股以超現實估值定價,人民網作為最官方的國企新股代表,廿零三十倍市盈率,唔知算唔算係正常喇。

人民網上市,只係國家隊代表第一個出場選手,排緊隊第一批上市官媒,聽講有10間,包括中國網絡電視台,即係CCTV個啤,全部都係互聯網業務,將相對最唔敏感的意識形態工具,推出資本市場試水。

官媒排隊上市,唔係話市場改革,商業營運自負盈虧咁簡單,近來內地官場,開口埋口就一大堆文化乜乜物物,中央電視台《經濟半小時節目》,今年第一個星期,一至五集都係同一主題,教人「掘金文化產業」,舊年10月的六中全會,主題又係「文化興國」,撥開一堆官樣八股之後,簡單嚟講,面對資訊世界新形勢,北京要利用官方「主流文化」,發揮傳統「中國文化」,抗衡包括「網絡文化」的「西方文化」。

社交網站動員力及破壞力有幾大,中東有朵茉莉花,香港都有單D&G,唔講得笑,不過,上到人民網,得一堆官樣文章票房毒藥,「共產黨新聞網」,又點夠QQ呀MM呀咁過癮;俾你係觀眾,閣下會睇《建黨大業》定係《阿凡達》?

唔講幾千年中華文化同西方拗手瓜的軟實力,中國官方傳媒,其實不乏資訊價值,問題係點玩法,好簡單,假如人民網,做到一個統一發放中央政策的政策公布平台,唔係東一忽西一忽,已經好多外國投資者會有興趣。

當然,人民網最寶貴資產,其實已經掛喺招牌上「人民」兩個字,人民網有個強國論壇,周不時會有啲重要官員上去接受吓網民提問,總理溫家寶都上過去,又有個地方領導留言版,不過個頭擺得太大,要省委書記及省長級人物直接答覆網民,不切實際,例如天津市委書記張高麗,已經收到5,675條留言,但係只有幾條有答覆,如果將人民網呢個功能,拆細到市縣層面,變成一個地方官員問政或監察平台,會有多啲網民幫襯囉。

要扭轉中國文化產業「泛、淺、濫、抄、乏」五個字,根本在於創意空間,拍戲唔準有鬼、無間道華叔又一定唔可以有好收場,諸多限制,一班大導咪只可以拍得出《英雄》《無極》呢類超級大爛片,中共要搞「文化再革命」,其實只需要做一樣嘢,就係「放」。

沒有留言:

發佈留言