Best Blogger Tips

2012年1月13日星期五

一把手三把火

舊年內地股市跑輸全球,上證指數更在12月跌穿2001年高位,股民苦口苦面,其中一個最熱門話題,就係A股市場十年一夢,原地踏步,有人計過數,仲話散戶的股票交易費用,多過十年嚟上市公司派息分紅。

年底歐美股市有少少起色,但A股越跌越殘,越殘越跌,呢一浪在最後兩個月出現的調整,啱啱發生在,10月底金融監管機構高層變動之後,銀監證監保監齊齊換人,尤其係中國證監會主席郭樹清,走馬上任後,一把手三把火,埋位一個月,上證指數已經跌超過半成。

港股受A股影響越嚟越大,但香港股民隔岸觀火,唔係太能夠感受到呢場A股監管風暴,呢度綜合及整理一堆內地傳媒近月報道,睇睇郭樹清做咗證監一把手後,新官三把火有幾勁。

  • 11月29日,撤銷平保證券兩名保薦人代表資格,成為第一市場中介代表歷來最嚴厲處分
  • 12月1日,證監會併購重組審核委員會成員吳建敏,違規持有參與審核的股票,破天荒被炒魷魚,同日,郭樹清公開強調,對內幕交易及操控股市等行為「零容忍」,發現一單打一單,「絕不手軟」
  • 12月9日,揭發號稱「歷來最大造市案」,涉及552隻股票、571億元(人民幣、下同)交易額、非法獲利4.26億元
  • 12月24日,通報西南證券原高管季敏波,操控老鼠倉交易獲利,已被移送公安機構
  • 12月28日,聯同公安部及監察部,總結通報近年內幕交易大案,包括銀河證券前黨委書記肖時慶,已被判死緩

郭樹清之前係建行(0939)董事長,17大先做到中央委員會候補委員,共產黨內論資排輩,及唔上前任證監會主席、中央委員尚福林。尚福林已經調任銀監會主席,如果郭樹清一埋位就狂打大案,即係話俾全國股民知,尚福林任內冇做嘢,中國股市污糟過屎坑,好唔俾面。

老實講,如果「歷來最大造市案」,都係獲利幾億銀,澳門賭場貴賓廰唔會咁好生意, 13億中國人及幾億股民應該飲得杯落,真係在股市全面打黑反貪的話,怕且10個秦城監獄都坐唔晒,要全國再公開招募大批幹部,過去幾個月,中國證每星期公布幾單「大案」,話你知邊幾位人兄中招,或者「提醒」各位邊個有乜收場,講穿咗,郭樹清都係要敲山震虎,係咪咁有牙力,有待觀察。

五年開一次的全國經濟工作會議,早幾日幕閉,總理溫家寶發言時,臨尾又俾多一項任務,2012年要「提振股市信心」,於是幾間大國企母公司增持、鞍鋼(0347)管理層自己出錢買股票,被視為中央救市訊號,不過對於一早講明,「不存在救市這個概念」的郭樹清,「提振股市信心」,可能係在資訊極唔對稱、內幕交易及造市行為猖獗的A股市場,挽回散戶及長線投資者的信心,郭樹清上任後即時大攪新股上市定價機制、創業板除牌制度、同埋上市公司分紅機制等改革,就係要恢復股民信心,如果市場唔夠公平透明,講乜嘢引入全國養老基金等長線資金。

作為中國證監會一把手,郭樹清未來幾年最大任務,仍然促使中國證券市場健康發展,呢樣嘢,反而唔似得打黑反貪咁難展開手腳,因為中國證券市場規模仍然好「細」,發達經濟債市規模通常係股市兩倍,中國相反,債市僅及股市一半,單係債市已經好大發展空間。

至舊年11月,全國金融資產大約有100萬億元,9成由銀行坐住,證券公司只係2%,唔及一間高盛的三分一,有排都唔會出現一間投資銀行「大得不能倒」的系統風險,從呢個角度睇,未來5年,國企證券公司的資產以至市值,仲有好大膨脹空間,最少會跑贏國企銀行,監管風暴令 A股成交量突然大跌,只係短暫現象。

沒有留言:

發佈留言