Best Blogger Tips

2012年2月28日星期二

滙豐薈碎(上)



2001年: 金融薈萃 服務全球

2003年: 環球金融 地方智慧

今期開滙控(0005),新鮮熱辣,不過唔係薈集精華的「萃」,今日的國際巨銀太大太複雜,只能夠將一頭亂緒炒埋一碟雜「碎」,睇睇今日的滙控,同十年前香港股民集體回憶中的大笨象,有乜唔同。

以前大笨象業績,可以係香港股民兼市民頭等大事,每每成為頭版要聞,今日香港各大報章頭條,斷估十份有九份用特首選舉行頭,立法會主席曾鈺成經過「認真考慮」後,決定唔去馬。

據曾鈺成自己講,唔出山,唔係因為被人「勸退」,亦唔係怕咗周街毒戰,而係因為時間倉猝,冇足夠時間籌備咁話,呢位前校長驚各位學生聽唔明,仲好幽默咁劃埋條腸,話特首候選人梁振英打過電話俾佢兩次,唔會用抺黑戰術對付佢咁話。

一個臨老有第二春的男人,感情生活在陽光下甜甜蜜蜜,比較錫身可以理解,大家亦可以進一步肯定,民建聯作為一個政黨,從來都冇執政的心理準備,正所謂「講就兇狠,做就含羞得很」,以後民建聯的選舉政綱可以當係吹水唔抺咀的廢話。

家陣講氣度唔係計權謀,好似前保安局局長葉劉淑儀咁,去美國行咗轉重新開始,要在政壇上「活得比你好」,兵荒馬亂之際使乜諗咁多,拍吓心口個勇字就去馬,「時間唔夠」都可以係半句真心話,不過可能講緊由西環到北京都陣腳大亂,或者中港齊齊立立亂,各位辦事人需要多啲時間講數,咁睇的話,下個月香港特首選戰第一回合,好可能流局,廢票棄權票創新高,冇人攞到第601票,等大家多啲時間玩第二回合。

將時鐘回撥至10年前,當時北京都搞緊十六大權力交接,可能十六大的「江胡對」,相比今年十八大爭櫈仔仲冇咁亂,就算有震盪亦幾乎完全同香港絕緣,無風無浪悶到出汁,董建華成為特首選舉唯一夠票入閘的候選人,自動當選成功冧莊。

2002年3月4日,滙控派發2001年成績表的一天,董伯伯同日接受國務院總理朱鎔基正式委任狀,在北京發表連任宣言,誓言未來5年任期「只許成功不許失敗」,不過董伯伯當日已經係票房毒藥,滙控成績表成為主要新聞,望返轉頭,再望吓今日大笨象業績的報章篇幅,可以知道滙控在香港股民心目中的份量,過去十年有轉變幾大。

當年香港未有自由行,太古城4000港銀一呎可能有找,100蚊港紙兌106元人民幣,滙控大班仲叫龐約翰, 2001年全年純利,第一次被中石油(0857)爬頭,當日公布的業績,亦係 大笨象收購Household,重注殺入美國前所派發的最後一張成績表。

一間公司的宣傳廣告,好多時睇到年報唔會同你講的轉變。廿幾三十年前的大笨象,仲叫做「滙豐」,宣傳口號係「儲蓄在滙豐,滿足在心中」,後來大笨象隨香港經濟起飛變小飛象,打開紅薄仔金光四射的集體回憶,變成「買滙豐股票最聰明,存錢入滙豐最蠢」的街坊智慧。

2002年係滙控大變身的一年,正式掛起「環球金融,地方智慧」的招牌,之前最膾炙人口的廣告,宣傳口號已經係「金融薈萃,服務全球」以一個光頭肥佬中坑做主角,朝朝練跑練到滿頭大汗,片未在公路同一個黑人鬥快,以為佢參加馬拉松,點知只係為跑手遞水的義工,賣點就係大笨象進一步國際化,但服務態度去到邊都唔會改變。

十年前的滙控,因為阿根庭爆發信貸危機損手,撥備百億計,痛定思痛,南美轉戰北美,一擲千億收購Household,插手美國呢個最複雜的金融市場,正式變身「The World’s Local Bank」之前,亦埋下08年被貶為「The Worst Local Bank」的伏線。

曾鈺成事間倉卒,順叔更加唔得閒,今日風花雪月,未有時間睇大笨象的最新業績,下回再續。

關連文章:
1. 匯豐薈碎(上下)

沒有留言:

發佈留言