 | 巨型金融，資料多到睇唔晒，當然唔少睇極唔明，但係，如果研究對象唔係「銀行」本身，而係透過銀行盤生意，睇吓呢個世界發生乜事，滙控年報及投資者關係資料，其實好有用，大笨象個投資者關係網頁，資料披露做得好足夠吓，為乜業務見過乜人都放晒出嚟，分析員問題及管理層對答，甚至有文字記錄，可以了解多啲大笨象，更可以了解多啲機構投資者點睇金融世界，得閒冇嘢做，應該上去望吓．．． HSBC Investor Relations |
上回講到，十年人事滄海桑田，滙控 (0005)收購Household大軍進軍美國，正式變身「The World’s Local Bank」，亦埋下08年被貶為「The Worst Local Bank」的伏線。
2002年3月初滙控公布的全年業績，亦是收購Household之前最後一份成績表，當年科網股爆破加上美國「九一一」，香港經濟亦唔掂，拉丁美洲金融風暴阿根庭業務受重創，整體呆壞帳撥備升逾1倍至20億(美元，下同)，除稅前盈利80億元，倒退18%，但成間銀行唔缺水，派息比率逾8成，保持到每年增加派息優良傳統，每股派48美仙。
星期一大笨象公布2011年成績表，作列帳基準的稅前盈利升15%至219億元，不過扣除「本身債務公允值之變動」，一項近40億元的變化後，實際基準(Underlying)稅前盈利不升反跌6%，只有177億美元，繼續增加派息，每股41美仙，但派息比率只係僅愈5成，相對於準備做千億大刁的10年前，今日的大笨象更加保留資金打仗的需要。
咩係「本身債務公允值之變動」，點解息差改變會令自己爭人的債變咗盈利或虧損，唔好問財經茄哩啡。十年前，就算唔睇公司盤數，唔睇投資銀行分析員的「賽後報告」，齋睇香港報紙，都可以幾全面咁，了解過去滙控做咗啲乜衰咗啲乜，2012年的今日，假設乜都睇晒，都係一頭煙，呢一種現象，相信唔係散戶獨有現象，大行分析員，甚至係滙控管理高層，都可能面對同一個問題。
大笨象大隻咗，市場對公司了解必定少咗，基本上，「睇晒」已經係一項高難度動作，滙控2001年財政年度的年報，只有284頁，2011年嗰份，唔計亞太區業務的香港上海滙豐銀行等幾份獨立帳目，已經有440頁，假設要睇得明先落注係投資紀律第一條，國際巨型銀行第一關已經過唔到。
2001年大笨象，講緊存錢借錢，本數簿仲係簡單得好可愛，總資產唔夠7,000億美元，最新已經增加到超過2.5萬億元，乜都唔睇，比較最簡單兩個數，稅前盈利同埋總資產，10年前的大笨象，坐100蚊資產，1年賺1蚊多啲，呢個可能亦係一間銀行，做最簡單存貸業務的盈利能力，今日的滙控，100蚊資產賺7蚊，可能已經係用條命博返嚟，仲話佢業績「差過預期」，未乎增長目標咁，就真係唔知大行分析員其實「預期」啲乜。
大笨象08年在美國損手爛腳，歐洲債務危機又沒完沒了，全球收緊銀行監管要求同時，滙控管理層在過去一年又出現大轉變，2011年肯定係舉步為艱的一年。
在大多數香港投資者視線範圍內，大笨象過去一年其實只係做緊同一樣嘢，就係瘦身，裁員減磅唔受歡迎，進展亦唔見順利，但係大半年嚟，滙控幾乎每個月都有一兩單出售資產的消息，2011年做咗16單，除咗風險加權資產減少咗近500億美元，同時由過萬計員工，將會脫離大笨象的糧單，一間巨型企業全力瘦身，節流威力可以唔係人咁品。
滙控最新年報的封面，影住一隻巨型中國貨船，停泊在巴西山度士港，管理層話呢張相反映咗集團策略方向的「核心元素」，連繫高增長市場，提供促進貿易及投資流動的銀行服務，點做法，唔知，不過可以咁講，投資者因為歐洲的風險，暫時否定咗滙控在新興市場的潛力，如果將香港上海滙豐銀行拆出嚟，稅前盈利近一千億港元，俾佢目前渣打(2888)的市盈率，已經等如成隻大笨象的市值，渣打在中國唔係咁大，真係做新興市場，其實未必砌得贏大笨象。
當然，講到尾，押注在國際巨型銀行，永遠只能夠瞎子摸象，只係講個「信」字的話，今日由投資銀行家出身的歐智華帶領的滙控，大刀濶斧改革，可信程度，應該高過當年一班蘇格蘭根銀行家，唔知頭唔知路殺入風高浪急的華爾街咁囉。
關連文章:
1. 匯豐薈碎（上、下）
沒有留言:
發佈留言