2012年3月2日星期五

新地之料(中)

上回講到,有銀士同埋大企業繼續發達的最重要秘訣之一,就係掌握到普通人或者行家掌握唔到的資訊,例如「特首需要跑步機」,對新地(0016)嚟講,就係一項可以拉關係的「重要資訊」。

如果大家在上網搵樓,覺得地產經紀公司的樓宇買賣資料好使好用,藍籌地產企業所掌屋的地產資訊,肯定更多,作為最大最純正的發展商,新地手上的「香港物業資料庫」,威力必定非常強大,有幾勁,唔知,不過可以憑想像,估吓裡面應該有乜料。

一個物業單位的成交記錄,普通人去填土廳,放低幾十蚊就可以撳出嚟,冇乜難度,物業成文數據及變化,對於發展商嚟講,可以話只係基本資料,樓盤越多,可以掌握住宅一手市場的數據隨之增加,如果手上見得人的「豪宅」新盤都唔多個,又點會掌握到內地買家的資料及趨劫,呢方面,土儲夠晒大、夠多花臣的新地,自然有更大優勢。

買地賣樓,好大程度上,可以話係發展商及投資者買家之間一場對賭,在極端的轉角位可以係一個零和遊戲,不過捕捉地價樓市起跌,亦只係一個成功發展商的基本入場券,吸收咗97年教訓後,香港主要藍籌地產公司,近年債務普遍大幅降低,同時加大咗租金收入比重,已經冇邊幾間,賣樓收住佔盈利5成或以上,新地玩轉型,更加出神入化。

前年財經茄哩啡的幾篇《大話西九》《百變地主》,寫過西九呢個項目有幾好賺,西九及中環幾個鐵路沿線項目,亦係新地轉型的關鍵一役,唔係講笑,隨住中環國際金融中心,同埋西九環球貿易中心,兩座巨型商業物業落成,新地唔單止在維港兩岸插咗兩座最高地標,09年開始,收租業務盈利貢獻,超越賣樓本業,更超越九倉(0004)成為全港最大商業包租公。

想知道西九呢單刁有幾著數,睇吓環球貿易中心頂樓個「天際100」已經知道,離地490米,同對岸老襯亭差唔多遙遙相對,成為內地客必到景點之,順叔一次都未去過,亦唔知道入場費幾多、每日遊客人數等數字,估計入場費一年最少兩三億,已經等如一間小型發展商的全年收入。

呢個「天際100」,仲有一項好重要的無形價值,因為係內地遊客必到之地,上到半山咁高的摩天大廈,在環迴三百六十度的觀景台,睇煙花又好,用望遠境裝吓港島半山豪宅又好,應該好多人會嘩嘩聲,呢個望到深圳的觀景台,亦係一個非同小可的免費宣傳平台,將「新鴻基地產」的幾個字,大力印在內地同胞腦海,將來新地在中國大肆擴充時,買家自然會記得新地呢個招牌,同「天際100」的高高在上連埋一齊諗。

新地在西九賺咗幾多錢,呢度唔再講,不過大家又可以回帶想像一吓,2000年左右,港鐵(0066)將中環站同埋九龍站,兩個巨型上蓋項目拎出街賣的時候,長實(0001)正全力在英國3G燒錢,新世界發展(0017)周身債,傳統英資又唔咁在香港有大動作,有實力做呢兩個項目的發展商,其實相當有限,在通街負資產的年代,新地夠膽一擲百幾二百億,除咗財力膽色,仲要對香港的區域發展、跟內地經融合的大中小規劃,有深刻認識。

換句話講,可能在新地管理層的眼中,成盤生意,上游到下游,已經超越咗咗買麵粉賣麵包的階段,講緊成個焗爐點砌點設計,確保自己的物業在城市發展中繼續價值連城,在樓市起跌周期當中立於不敗之地。

講到呢度,新地需要的「資訊」,就唔係樓宇買賣數據咁簡單,新地的「香港物業資料庫」,仲有好多重要的政策資料。

又講到收唔到口,下周下回再續。

關連文章:
1. 新地之料(上下)


同場加映

天際100分鐘(預告片)

《天際100分鐘》,這個同場加映,同新地SKY100冇關係的,不過,順叔啱啱先知道,《電影雙周刊》,原來已經在網上復活...(FACEBOOK連結

3 則留言:

  1. 順叔有冇興趣開242?似乎折讓甚大.而當年何小姐沽MGM,仲估佢準備做世界.依家無乜需要下而無程程供股,仲整單“疑似供股種票”事件……另外仲想問下您對308仲有冇補充??近來氣勢如虹! Thanks. John

    回覆刪除
    回覆
    1. Brother John, Shun Tak is indeed a difficult story to crack... do you have any insights or pointers? Please drop me an email at lucentng@gmail.com if you have any ideas. Perhaps we could work out something together.

      China Travel has climbed close to 20 percent since the Chinese New Year, when I covered the stock last time. However there could be a century of HK stocks that have registered even bigger gains. So I see no irregular share price movement... do think it may raise yoy DPS though...

      刪除
    2. 沒有什麼頭緒啦,純粹請教順叔而已.

      隻信德就算喺無乜需要下走去供股,也沒有太在意,但係新近有位人兄用一種近乎無所不用其極的方式去玩供股遊戲(玩遊戲玩到整信箱,真係非一般老散),所以覺得太有意思了,於是Google隻242 一番。

      表面上信德應該都係歸二房,但係二房股權又不是絶對食硬,當中信德又涉及澳娛/博,所以其他房又點會甘心放棄;而早前MGM上巿完全係為了比Pansy套現,儲哂彈藥矣。

      莫講話母子,兄弟會爭產,又何況四房人呢!?所以就算真係想太多了,信德咁大折讓(應該唔止五成),買啲黎擺下都抵掛。

      刪除