上周上回講到，由重慶到香港政壇，今個月兵荒馬亂之際，特首曾蔭權「巧合」地接連出現兩次「休假」需要，兩次接受富豪款待外遊，又「巧合」地跟渝港國際(0613)主席張松橋扯上關係，射毒箭唱衰大行動，甚至有蔓延至金融市場之勢，面世冇耐的踢爆網站「invest-door.com」，第二個唱淡報告，矛頭更「巧合」地直指張松橋，呢個遊走渝港政商之間的神秘富豪。
「invest-door.com」最新的爆料報告，由「Ripley Capital」提供，名不經傳，更借用「信不信由你」(Ripley’s Believe It or Not)的神怪招牌，一睇就知，目的「為踢爆」而非「為揚名」。(報告英文水皮到震，唔似出於金融專業之手。如果中港政壇大局已定後，「invest-door.com」黑材料隨即乾溏，可以斷定這個踢爆網站，只是一個配合政治變奏的快閃黨。)報告針對人和商業(1387)去年出售的一個地產項目，可能因為買家拖數而變爛數，同時列出多份內地政府文件，力陳項目買家其實是中渝置地(1224)關連人士，人和及中渝都已經發聲明否應有關指控。
內地地產的「首富界」，最忌出現財困的蛛絲馬跡，「Ripley Capital」表面上質疑人和隱瞞爛數兼講大話，但項莊舞劍，其實質疑緊張松橋財政實力，連一個十數億元的濕碎項目亦有問題。
上回臨尾的引子，將張松橋同美國前國務卿基辛格拉埋一齊，其實只係想搞吓氣氛爛Gag，兩者並非「有關係」，只係「有啲似」。
講到基辛格，有一個好出名的笑話，話說基辛格為香港一個流浪漢做媒人，先搵恒地 (0012)主席李兆基，同佢講有位做高盛副總裁的金融才俊想搵老婆，於是四叔答應嫁女，基辛格跟住搵高盛主席，話四叔女婿想搵工，於是高盛主席亦答應開多一個副總裁的職位，最後一個瞓街的流浪漢，既變成四叔乘龍快婿，亦得到高盛的高職厚祿。
呢個「生意是這樣做成的」的故事，有各種不同版本，隨便杜撰的「香港版本」，講緊同一樣「技術」：如何在兩個資訊不流通的世界，締造一個自我應驗的「虛擬期權」。唔好睇小呢種「技術」，這是所有「中間人」的搵食工具，發揮到極致，可以成為商業、政治、甚至國際之間的「權力掮客」(Power broker)及「造王者」(King maker)，遊走於重慶及香港政商之間20年的張松橋，相信必定掌握了這種折沖樽俎、制勝兩楹的高超「技術」，造就了重慶首富的傳奇。
張松橋控制４間香港上市公司，市值唔算巨富級別，但係同香港大孖沙同撈同煲，唔少人亦話佢身家以數百億銀計。無論如何，大股東管理層，如果私人業務太多，並且財來自有方，對上市公司小股東絕對係負面因素，恒地及新世界發展(0017)，過去幾年大幅跑輸俾行家，市值雙雙跌出「四大」地產股之列，正正是大股東「志不在此」的寫照。
換句話說，無論張松橋本身的財政實力如何，就算此時捲上政界高風急浪只是偶然，就算此刻成為踢爆對象亦只是巧合，渝港國際系內上市公司，暫時不是散戶的投資對象。
如果話張松橋同基辛格「有啲似」，香港特首候選人梁振英同埋重慶市委書記薄熙來，更似是「難兄難分」。
薄熙來08年調任重慶，被視為發配邊疆，隨即唱紅掃黑，今日在重慶做民調，支持度應該唔低，如果十八大爭唔到一張政治局常委的櫈仔，同梁振英挾高民意但可能選唔到特首，同是天涯淪落人。
今日的重慶，彷似中共權力鬥爭的「火藥桶」，作為火藥庫隔離的藏金庫，今日香港政壇的黑風腥雨，種種風波，相信只是大氣候裡面的小氣候。
行政長官同大富豪攬頭攬頸，政務司司長住宅又有巨型僭建，幾單「間碟級」水平的踢爆，客觀效果突顯了政府最高層的不堪，同時焗住公眾將梁振英放在「官商勾結」的對家。
一單單醜聞黑幕，凸首曾蔭權自己水洗唔清，反而叫人唔好陰謀論，應該研究「人口老化問題」，有冇病呀？香港人已經唔可以投票，唔通連戲都唔準睇？咁多毒箭黑幕，又唔覺得「心痛」喎，踢得越多，政商共榮圈的利益關係曝光越多，亦有助一班只可以睇戲的茄哩啡，了解多一啲呢張「渝港謎圖」。
關連文章：
|
|
|
伸延閱讀：
1. GOW財茄台: 《黑社會III》: 呢度唔係黑社會地方嚟，究竟發生乜事幹．．．
沒有留言:
發佈留言