無你咁長命

今期冇力開大題目，星期五，口淡淡，搵隻長江生命科技(0775)望望。

世界上有好多種公司，有啲好似銀行咁，影響金融系統穩定，大得不能倒，有啲可能對地球人冇乜關係，倒咗好能樣衰咁解，後者，長和系樓下最少有三間。

長實(0001)副主席李澤鉅，除咗執掌地產業務(天宇海個則去到咁盡應該問佢)，打正牌打骰的上市公司，有兩間，一間叫長建(1038)，一間叫長命，今個星期齊齊派成績表，超人長子帶齊成班太子太傅，大噴長建偉績，同人都唔同命，長命繼續孤兒仔冇人理，已經唔記得長命對上一次開記者會見人係幾時，甚至有時懷疑，長命究竟仲有冇小股東。

長建份功課，做得幾靚仔，純利勁升54%創歷史新高，但派息加得咗15%，不過咁講，每股派息連續15年上升，派息現金係難做的一條數，唔呃得人，長建應該創造咗香港甚至人類歷史記錄。財經茄哩啡舊年寫《透視長建》時已經講過，長建呢兩年千幾億港銀投資歐洲，就算唔係一個對衝中港長遠政治風險的動作，亦只不過由「好悶但很穩建」，變成「冇咁穩健但仲係好悶」，所有基本因素冇改變到，唔再講咁多。

長命細細粒，博大家時運高睇唔到，冇乜需要保持乜嘢增長記錄，至舊年12月底，純利跌咗4成，賺1.25億(港元，下同)，呢條帳面數，唔睇冇損失，每股派息呢，咪講笑，每股都有0.005元，即係幾多呢，一手2000股，可以收到10蚊股息，夠買兩塊有機方包。

長命唔係未風光過的，2002年7月上市，超人加生命科技，唔似得功夫加足球咁無厘頭，開頭都幾係威係勢，首日掛牌市值記得超過200億銀，今日埋單，加埋股息，市值應該啱啱好50億元，縮水75%。

好想知道2002年，港交所(0388)邊幾個批長命上市，呢隻嘢可能係有史以來最離罩的上市申請，營業額接近零，Tom仔(2383)當日都有個網站睇下，長命乜都冇，得幾億銀股東貸款，可能當年興負資產，長命實際上以「負資產」上市，集資廿幾億銀就係公司主要資產，集資用途，主要做「有潛力之醫藥產品」的研究開發工作。

拎住廿億銀，返大陸買地種桔，過年都可以運桔落嚟維園花市，咁耐研究咗乜嘢寶藥，唔知，不過肯定最大嚿錢，買咗嚟血拼買嘢，唔係自己做研究，長命最新資產淨值，叫做有五十幾億，不過有41億元係「無形資產」，唔使問阿桂，主要來自10年嚟，買埋買埋抽唔知乜東東留低的商譽。

舊年在澳洲買葡萄園，用嚟做葡萄酒定葡萄適，唔知，上個月在澳洲又買咗間殺蟲水公司，有幾威猛，亦唔知，不過，最少叫做係一個容易明白的企業動作，唔係年年好似法證先鋒上身咁同你講，「Tetrodotoxin」囉，「Polynoma」囉，「Po-你阿麼」囉，「科研項目進展令人鼓舞」囉。

簡單啲睇，與其話長命係一間個研發的藥公司，不於話佢係一隻創投或私幕基金，專門投資在「生命」有關的項目。做創投風投，仙女散花買100件貨，其中一件跑出已經收回成本，長命唔知10年嚟都咁唔好彩撞唔中好嘢，定係好鐘意攬住一大抽嘢長長久久唔肯EXIT，點都好，如果真係一隻創投或私幕基金，坐盤嗰位應該冇咁長命，晨早被人炒咗。

10年前，長命在「創業板」出世，以一間「Start-up」公司形式向投資者募集資金，10年之後，好似繼續「Start-up」緊。如果有一間公司同你講，研究緊一隻熊貓春藥，隻隻國寶啪咗，每每包生仔，不過要等50至100年先可能有科研成果，你會唔會信佢。

藥股係一種超級複雜的公司，唔排除長命真係到以研究到一種超世新藥，又或者即沖即飲即變李嘉誠的奶粉。作為凡人的大部分小股東，可能都係諗緊，長命會唔會拎返幾十億出嚟做私有化， 不過，唔知有幾多個有佢咁長命喇。