2011年12月6日星期二

周街是福(中)

(部分內容刊於2011年12月6日am730)


上回講到,周大福在04年底盡沽以「基礎投資者」身分認購的中國人壽(2628)股分,套取資金全面擴展周大福珠寶(1929)在內地的業務,中國珠寶零售業亦是在這個時候,出現「周街是福」的情況。

「...希望『周六福』及『周大生』將來也可以上市…」這是某位網友在順叔網誌上的一句留言,咪以為只係搞笑,呢個極可能是周大福過去幾年,三扒兩撥谷肥自己,再滾水淥腳趕住上市的策略轉變的關鍵。

2002年中國開放黃金買賣之前,珠寶店好難做黃金首飾生意,當時港資珠寶零售點,亦唔可以獨資經營,只能夠在灰色地帶,以近乎違法的「特許經營」或「合資經營」,半公開半遮掩運作。呢個情況,在04年開始實施的「屍爬」(CEPA),出現大突破,港制金飾關稅大降,亦容許港商獨資註冊金飾企業。

04年是「特許經營」開始在中國開枝散葉的黃金歲月,阿公明明話唔準,但係全國人人趕住坐上呢架「致富快車」,結果在04年12月底,商務部半推半就下,正式頒布《特許經營企業備案管理辦法》,全國大大小小連鎖加盟店,由「違規」的經濟現實,變成「合法」的商業網絡。

在這個時勢,準備在大陸放手大幹的周大福,第一眼見到的,就是「周街是福」的混亂場面,街頭有間「周大生」,街尾又有「周六福」(有網友甚至發掘到有間大慶「周佳福」),最恐怖者,呢班「周乜周物」、「乜福乜福」,幾乎間間都準備以「連鎖加盟」形式進行「細胞分裂」,將品牌及版圖,推廣至全國,如果周大福唔做嘢,剛剛富起來的內地消費者,見到「周街是福」,唯獨唔見「周大福」,以為周大福唔係大品牌老字號,甚至係A貨咁就大鑊。

呢個時候,周大福做咗兩件事。

首先,周大福將各個疑似「周大X」、「周X福」、「X大福」,告上法庭,呢個動作唔係咁成功,根據中國商標網有關「商標異議裁定」的資料,國家商標局,在2003年至2006年,最少駁回周大福提出,有關「周大生」、「周六福」及「陳大福」侵權的申請。

既然唔能夠在知識產權框架,扭轉「周街是福」的情況,周大福唯有做第二件事,就係同競爭對手鬥快插旗。根據目前資料,已經推斷唔到,當年第一個透過「加盟店」增肥係邊個珠寶品牌,但可以好肯定咁講,主動又好被動又好,周大福零售網點近年的幾何級的增長速度,招牌插遍全國,除咗谷大上市,其實亦係一個為咗保護品牌的重要「宣傳」手段。

如果大家以為「周大生」只係「周街是福」的其中一間A貨,咁就大錯特錯,周大生近年開舖之狠,相對周大福,有過之而無不及,近來周大生趨谷緊的宣傳口號,叫做「闊步邁向2000間連鎖店」,仲多過周大福500間。

根據周大福招股書資料,唔計收入少於500萬人民幣的小型珠寶商,在2010年,周大福在中國的市佔率12.6%,排第一,周大生亦有7.1%,排第三,周大生珠寶品質可能有分別,但擴張手法同周大福幾乎一樣,是但搵間市場調查公司的話,周大生隨時亦可以話自己係「全國最大珠寶零售商」。


後面有個勢兇夾惡的周大生,周大福唔係一句「老字號」就坐定粒六,因為前面仲有一間「老鳯祥」。

老鳯祥銀樓,始創於道光年代,163年歷史,字號之老,老到可以做周大福太公, A股上市,代號「600612」,前身叫做「第一鉛筆」,招牌產品係「中華牌鉛筆」,在05年開始推動股改,控股東東係上海國資委,開始注入老鳯祥銀樓等部分資產,成為進軍珠寶零售業的「國家隊」主力。

據周大福招股書,老鳳祥市佔率9%,舊年排第二,但老鳳祥自己網頁聲稱,2010年銷售超過140億元人民幣,多過周大福同期內地營業額,全國「銀樓分號」超過600間,銷售網點超過1000間,並且以每年100間新增加盟店的速度擴張。

周大福上市,規模忽然曝光,嚇到外國芬佬嘩嘩聲,但睇埋周大生同埋老鳳祥少少資料,就知道好多人做緊同一件事,周大福望落去規模大到嘔,但競爭亦大到嘔,甚至有可能,周大生及老鳳祥正密謀在香港上市集資,周大福焗住極速增肥後,再滾水淥腳趕上市,要在仍然保持「中國最大零售珠寶商」光環的這一刻,正名上市,增加品牌知名度,避免慢人一步,避免多人一個二奶形象。

下回再續。

關連文章:
1. 周街是福(上)(中)(下)
2. 迎賓周大福(上)(中)(下)

伸延閱讀:
1. 大餅變紅衫

4 則留言:

  1. 順叔 ! 你好, 小弟一直係你fans, 睇am701都係為左你 ^-^

    我睇曬你點評「周大福」既文章,幾認同。

    另外貼下呢篇文俾你睇下,我覺得都講得唔錯。


    「我的看法是,周大福珠寶的實際價值,只值其招股價的兩成至三成,但是我仍然會瞓身認購這股票。」
    財經專欄作者周顯

    我不太看財經專欄,即使看的話,我只留意作者提出的理據,而不是作者的建議。打開報紙財經版,冧把太多,有條理的分析太少,周顯是一個例外,他的建議不是所有投資者的一杯茶,但他總會提出一個值得深思的理據。
    周顯對周大福的分析便是例子,他列出坊間對周大福的質疑:定價太貴、增長見頂等,他同意這些負面看法,因此認為周大福只值招股價的兩至三成,不過卻得出瞓身認購這戲劇性結論。周顯的理據是:一、大股東鄭家並非吃素(我不太明白,但應該很重要);二、大孖沙為撐老友認講,短期不會沽出,要挾高易如反掌;三、很快可染藍,成為恆指成份股,到時機構投資者非買不可。
    周顯的結論是,周大福招股價15元至21元,實際只值5元,但半年內會升至40至60元。短短幾百字,有Drama、有理據、有Knock-out Punch,我Buy周顯,但唔敢Buy周大福。


    其實我真係好想跌眼鏡, 見到「周大福」仆...lol

    回覆刪除
  2. Ryan, 謝謝支持。順叔盡量不評論其他人公開發表的評論(「大行」報告例外),如果只是針對「人人要買(包括指數基金),股價必升」的論據的話,倒想分亨一點看法。

    一個人,在可控制範圍內,做了一件自己想做的事,例如戒煙,是決心的表現,不做一件自己不想做的事,是原則的表現。

    當推動「信念」變成「事實」之間的力量,涉及一個群體的多數「行為」,就是「自我應驗預言」(Self-fulfilling Prophecies)的一種。

    舉個例,技術分析就是「自我應驗預言」的一種。當一大班投資者抱有同一「信念」,在「XYZ」理論下,認定一個「支持位」難以支持,齊齊做淡,結果「支持位」跌破,變成「事實」。「XYZ」等如「黃金交叉」亦好,「死亡叉燒包」也好,「秋官效應」都好,只要大量資金抱有相似「信念」並採取同一「行動」,很可能會成為一個「自我應驗預言」,變成市場事實。

    估值發水,指數新寵,基金焗買,正正是一個經典的「自我應驗預言」。

    遲點再談...

    回覆刪除
  3. 順叔,呢期幾隻新股,講真冇一隻抽得落手(好似得新華好少少). 我聽見有人用阿里巴巴做例子,話要炒起貴一貴都得.但基於下列幾點在下覺得可能過澳門買圍骰(唔係大細)好過博隻周大福珠寶.(一)阿里巴巴當時市面缺乏同類比較,反之周大福有六福,周生生,以至國內的老鳳祥和豫園作比較;(二)因隻股哂士咁大,而博佢入指數;但反之亦由於哂市太大而超額又不高下,基金操盤手可能配售攞夠貨下而無需急於在上巿日即掃貨;(三)其實近月周生生,以至國內的老鳳祥B股走勢極之一般,六福如非季績大大超出巿場預期上限,其實也是走弱中,而六福高層也表明近月增長放緩;(四)歐洲巿況未明而指數卻事先亢奮下,雖提防氣氛轉變,但抽新股卻令資金被封鎖不能動;(5)最後報紙話純官壓佣至1.5%,保母售後服務(護價)會如何可思太半. John

    回覆刪除
  4. JOHN,
    (1) 本來一直唔明白,點解香港人咁鐘意炒新股,近幾年多咗留意A股新聞,A股散戶炒「首發」,炒得更顛更投入,我開始明白了...
    (2) 講得出老鳳祥B,巴打你肯定唔係阿毛了,你的五點分析,我完全同意...
    (3) 啱啱聽到CTF以下限定價,即係市值1500億,FY2011市盈率42倍,市帳率13倍,FY2012肯定有強勁盈利增長,加埋集資158億,市帳率會變回個位數字,有可能說服到鬼佬叫做「平」
    (4) 下限定價,售後服務冇咁大壓力,大股東隻GREENSHOE亦有更大空間掟出街
    (5) 擔定櫈仔睇戲...

    回覆刪除