Best Blogger Tips

2011年12月7日星期三

思捷女屍(上)


周大福(1929)等中國珠寶零售商,同埋李寧(2331)等中國體育服飾品牌,近年都係採取同一個增長模式,透過「合營」、「加盟店」等形式,谷大銷售網絡,「多仔丸」同埋「肥仔丸」一齊噼...

打「零售」之名,行「批發」之實,有一個經典教材:思捷(0330)

思捷今日要全面轉型,將行動叫做「喚醒Esprit睡美人之吻」,未來所做一切,都是為她:「Esprit女士」。仲搵咗巴西名模「啜西」(Gisele Bundchen)做生招牌,有幾索,睇睇...

點擊圖片放大

但係,「思捷女士」,呢條「睡美人」,究竟最新狀況係點,係咪錫啖可以起身,睇睇...

點擊圖片放大

俾你係思捷CFO,你會唔會咀佢?


入正題。

要展望「思捷女士」(Esprit Woman)未來的風姿,首先要了解呢條中女老妹的過去。

將時間撥回2008年7月,思捷上一任財務總裁潘祖明,因為「有意發展其他事務」,辭任公司所有職務的一刻。

當日思捷市值仍然超過1千億元(港元,下同),股價80元樓上,潘祖明跳船之後一個月,思捷公布的全年業績,純利再增長25%至64.5億元,營業額及純利齊創歷史新高,但呢一份成績表,亦是思績連續高速增長十幾年後,神話結束的分水嶺,其後3份全年業績,每下愈況,至今年6月底年度,幾乎冇錢賺。

至2008年6月底財政年度,思捷話自己係一個「國際化青春生活方式品牌」,提供「華而不貴的奢侈」,全球有超過14,500個「批發銷售點」,但只有690間直接管理的零售店舖,當日「批發」業務佔公司總收入56%,之前幾年,亦保持在近60%水平,亦即是話,當日在分析員口中的「高增長零售品牌」,其實是一家「時裝批發商」,透過將存貨風險,大量推向加盟店的「批發」銷售,變成高速增長的港股神話。

當日的思捷,幾乎每一次公布業績之後,都有董事或管理高層批售舊股套現的「例牌重作」,公司創辦人邢李「火原」,最高持股超過4成,期間大大話話減持十次八次,保守估計,套現最過200億元,可能係過去10年在自己公司撳走最多現金的一倍富豪,不過,如果邢生娶咗大美人後不顧江山,一心走人艱世界,選擇在高位一炮過賣盤的話,可以套現近700億元,你又可以話,邢生係香港股市中,最唔了解公司潛力的一位話事人。

除咗邢生之外,其他董事及高層,包括話「有意發展其他事務」但近年又唔見蒲頭的潘祖明,在08年前後,唔係呢個辭職就係嗰個盡沽持股鬆人,集體跳船,面對呢個港股近代史最大謎團,投資者如果覺得「好正常」的話,到今個星期,接替潘祖明睇數的財務總監周福安辭職,應該見怪不怪。

如果排除管理層做數的可能,純粹以業務結構分式,思捷由盛轉衰的關鍵,就是食得太多「多仔丸」及「肥仔丸」的後遺症。以加盟店形式做生意,全球唔係好多個品牌得成功,有兩個最出名的,人人都識,一個叫麥當奴,一個叫7-Eleven,擺能靠多靠大,靠品牌溢價開飯的「零售」公司,冇一間會咁做「批發」。


思捷:時裝「批發」
思捷Storefinder

H&M:時裝零售
The World of H&M

大家可以上兩間公司的Storefinder網頁望望(上面有互聯網HYPERLINKS),兩間公司都在全球40個以上國家或市場有業務,H&M只有2,300間自營店,在中東北非,因為市場監管原因,有小量加盟店生意,但講明唔係業務策略之一,思捷今日仍然有超過14,000個銷售網點,在德國一個山旮旯小城市,都可能見到一條街有三、四間分店,望住呢兩組極端數字,結論只有一個:其中一個行錯路註定爆煲。

時至今日,思捷當年高層發達鳥獸散之後,搵咗個後生靚仔行政總裁,同你講業務轉型、品牌再造,未來幾年,將會豪掟過百億元,重建零售網絡及加強宣傳,一系列行動,思捷稱之為「喚醒Esprit睡美人之吻」行動(Giving Esprit,the sleeping beauty,a wake-up kiss),未來所做一切,只為了她 --「思捷女士」-- 而做。叫醒睡美人之前,新管理層已經警告,思捷未來兩年業績,肯定會非常核突。

下回再續,睇睇這個「喚醒Esprit睡美人之吻」,究竟有冇太浪漫化,要幾大力先有效,使唔使人工呼吸、或者心臟起博器狂電先可以叫得醒。

關連文連:
1. 思捷女屍(上)(下)
2. 三思思捷(上)(下)
3. 體育戰場(上)(下)

伸延閱讀:
1. 壹週刊: 篤爆千億神話

14 則留言:

  1. 順叔差唔多乾溏,各位對呢條「思捷女屍」有乜意見,請在這裡發表一下,尤其係行入舖頭有冇經驗、買佢啲衫又點,有冇意見想講,順叔太耐冇行街,更冇幫襯Esprit十幾廿年,大鄉里矣...

    如果一眾財經茄哩啡,齊齊幫手腦震盪一下,集體創作,落筆時會好有幫助的...

    回覆刪除
  2. 順叔,睇走勢及成交,有資金已大舉進入,真金白銀押下了。我自己不會買思捷既衫,但思捷主要價值在德國,香港人既觀感對公司前景既判斷可能參考性不大。

    不過,若然I.T那種衫(質量、價錢)可以賣得好,或者沒理由把思捷看得太淡。

    小二

    回覆刪除
  3. 去年手持一張六折優惠券, 趁年底過期前諗住買件新外套過年, 但最終失望而回, 一方面款色太out, 另一方面貴到買唔落手, 唯一睇中果件外套要1700大元,折咗都成千銀, 實在太物非所值, 所以我唔會走入去幫襯.

    回覆刪除
  4. 我做女嘅時候三prit都算係高檔潮物,會因為員工折扣去做暑期工並以此為榮(因為佢出名請靚女),唔知幾時變咗中下檔,如果唔係自己upgrade咗(我依然幫襯Giodano同Uniqlo),就係佢downgrade咗囉,最近一次入去係喺四年前,最終都係買唔落手,質地款式價錢加埋都唔值,之後一直無去過

    回覆刪除
  5. 順叔年頭先出左2篇 <3思思捷>, 年尾又寫, 唔通對呢間 10幾年都無幫襯過既公司有情意結?

    老實講, 同各位一樣, 呢幾年係 shopping mall 買衫, 真係未試過係思捷買到野。一來我淨計中低價位既連鎖店選擇多左, ZARA, H&M, Uniqlo,最近到步既 GAP, 甚至 Cotton on, 間間都比 "s咇"平靚正, 無理由揀它。仲有,上邊有位師兄 /姐已經講左 product & pricing 好有問題, 平既太"柒", 唔 "柒" 就太貴 (in terms of design or quality la)。

    唯一例外仲買到野既, 係去東涌 outlet, 掃下平貨。

    至於同 I.T 集團比較, 我反而覺得I.T d衫潮好多, 真係多潮人買。I.T 個 business model 係以大細 I.T 既招牌,代理一眾外國名牌, 個價當然比外地貴好多; 然後以自家牌子, 抄 / crossover 番呢堆名牌潮牌出衫, 俾多個經濟d (但質料差 d ) 既選擇你, 雖然近年加價得太多係事實, 但我覺得純講產品, 市場係 buy I.T 既。

    不過呢, I.T 係 2010年既神跡股, 賣既係「中國故事」, 而家個價有D 見真身既感覺, 期待順叔第日評論一下。

    回覆刪除
  6. 早幾期壹周講過下"s咇", 大家有時間可以睇下。

    http://www.kornhill.com.hk/next/magdetails.php?book=4&issue=1127&page=0282562238

    節錄幾段:

    在當地居住的Ameie說:「Just because my parents wear it.(阿爸阿媽著我先著)」

    波蘭少女Catarina: 「My mum and auntie wear it.(我阿媽和阿姨才會穿)」

    來自科隆的Esra,每年也會來特賣場一次。她表示,從不購買正價的思捷貨品,「I come for the price.(因為價錢吸引而來)」

    回覆刪除
  7. 多謝各位意見,部分內容應該可以照搬落下集呃稿費,哈哈哈...

    順叔對衫屎必裂並冇任何情意結,搬返出嚟講,最大考慮有兩個,第一,講吓加盟連鎖範式,如果搞喎咗可以有幾大鑊;第二,抄返部分舊文呃稿費...

    「小二」BRO,同意香港消費者意見,唔代表德國市場發展,爛船有三分釘,以思捷品牌知名度,應該都值幾十個億(港元?),遲些再談...

    回覆刪除
  8. 以基本面,不會買,但技術面,亦不敢空。

    思捷的問題爆光多時,股價仍可站穩,或者市場另有打算也不定。但既然基本面看不透,自己亦只會靠邊站。

    小二

    回覆刪除
  9. 如果要買uniqlo既股票,香港買唔買到?

    唐唐

    回覆刪除
  10. RE:唐唐

    港股A股順叔都睇唔掂,所以甚少隔山打牛,聽講呢個INTERACTIVE BROKER平靚正,但未試過...

    LINK: 
    http://www.interactivebrokers.com/ibg/main.php

    回覆刪除
  11. Thanks 順叔!!!

    唐唐

    回覆刪除
  12. 順叔, 我都好想你評下IT. 佢老闆都係一個奇蹟.

    回覆刪除
  13. 支持順叔講 I.T.

    回覆刪除