副總理李克強舊年8月訪港，大家可能冇為意， 3日行程重頭戲，其實係出席「國家十二五規劃與兩地經貿金融合作發展論壇」（而家話望返轉頭，呢場大龍鳳，肯定係係內地官員主導，所以由訊息發布、行程安排等，可以搞出咁多大頭佛），李克強在論壇上的主題演講，只係講咗6大政策方針，之後新華社出稿，罕有地將李克強的發言變大，變咗「支持香港經濟社會發展」的36項措施出嚟。
呢個被形容為「挺港36條」的「大禮」，其實係「治港36條」，甚至可以話係香港在十二五期間「被規劃」的「施政報告」，李克強返到北京，打開香港新聞，見到自己幾乎變成「小強」，輿論焦點放晒「黑衣人」侵犯香港人人身自由、差佬在港大禁錮學生仔等負面新聞，堂堂副總理應該會睇到嘔血。
直接被「點名」寫入「36條」、跑進中央政策思維的香港上市公司，唔計間接提到的港交所(0388)，只有港鐵(0066)。據新華社新聞稿，作為支持中港經貿合作的其中一項措施，中央政府「支持香港鐵路公司深化與北京、上海、深圳市地鐵建設和運營方面的合作，並擴展到杭州等市」。
李克強8月18日前腳踏出香港返北京，同日港鐵已經宣布，一項在內地發展的最重要突破，成功投得深圳地鐵4號線龍華線龍華車廠上蓋物業的土地，地價約20億元人仔，呢個係港鐵在大陸的第一個地產項目，亦係港鐵可以將香港「鐵路加地產」營運模式，照搬上大陸的最重要試點。（龍華線項目位置圖/明報資料）
呢個龍華線地產項目，樓面面積約222萬平方呎，即係話地價成本，大約只係900蚊一呎，港鐵可以邀請發展商參與，亦可以自行開發，項目所獲取「部分利潤」，將與深圳市政府分享，用於支持深圳市軌道交通的發展咁話。
大家去開深圳，不妨坐龍華線視察吓未來樓盤，睇睇有關項目，如果未來唔往返港深唔使過海關，坐地鐵要幾多時間返香港，又可以留意吓，深圳同香港毗鄰的鐵路沿線樓盤，賣緊幾多錢，900蚊呎地價聽落認真筍，接近賣大包益港鐵。
既然係筍價，就算內地地產商幾等錢使，仍然會好多人搶，但根據港鐵公司發言人當日向香港傳媒透露，深圳市政府有關龍華地塊的「公開招標」，前提條件之一，要擁有地鐵營運權，咁就擺明度身訂做益港鐵，如果掉轉頭在香港發生，香港地產大孖沙，肯定嘈到拆天。
全地球，唔會有好多條賺錢的鐵路，港鐵更可能係最世界最賺錢的鐵路營運商，2011年純利147億港元，純粹計算香港業務收入，分分鐘仲好賺過電能國際(0006)中電(0002)兩個壟斷性公用事業加埋，原因唔係港鐵搞鐵路能人所不能，而係壟斷鐵路沿線的土地開發權，全港所有地產大孖沙都要俾面。
財經茄哩啡舊年6月寫篇《地主鐵路》講過，港鐵變成一間上市公司之後，同「服務市民」呢個最初成立的目的，越行越遠，頭頂戴住AA級信貸評級光環，從來冇好好利用債市籌措資金，在香港起鐵路，條條都要攤大手板問政府要地產作為補貼，膽粗粗殺入大陸向左走向右走，幾百億資金投入賺嗰雞碎咁多，又唔需要地產補貼，大佬，如果內地鐵路搵錢容易，鐵道部唔會蝕到阿媽都唔認得，港鐵營運模式，變相要香港納稅人，透過香港土地資源補貼內地的鐵路建設。
當然，如果在內地起鐵路，個個項目可以好似深圳龍華線咁，可以筍價取得地產項目，同當地市政府對分盈利，又唔同講法，下回再續。
關連文章:
1. 治港鐵道（上）、（中）、（下）
2. 中聯辦內望
伸延閱讀：
1. 港鐵「被歡迎」
2. 河蟹膠鐵（上）、（下）
3. 地主鐵路（上）、（下）
沒有留言:
發佈留言