Best Blogger Tips

2012年3月14日星期三

治港鐵道(下)

上回講到,副總理李克強舊年嚟香港,掟低咗份「十二五」香港「被規劃」的「治港36條」,李克強前腳返北京,港鐵(0066)後腳宣布內地業務重大突破,以900元人民幣一平方呎地價,取得深圳龍華線一個住宅項目。

港鐵公司公共關係做得唔錯,但對小股東的投資者關係非常求其的公司,例如以股代息計劃,失驚無神取消咗,就冇解釋到點解。

港鐵上星期公布2011年全年業績,未有年報睇,根據已公開資料,內地業務盤數收埋咗,只係放咗條未計利息稅項折舊攤銷的大數,包括舊年6月投入服務的龍華線第二期的深圳業務,EBITDA由虧損4,100萬(港元,下同),縮窄到大約600萬,講咗等如冇講。

港鐵每年折舊攤銷支出,大概32億左右,以一間千幾二千億規模的「中年」鐵路公司嚟講,細到出奇,因為「車站樓宇結構」等大型土木工程,使用年期長達100年,除非香港地鐵變到倫敦Underground咁殘咁舊,都人人可以忍受又冇人投訴,否則呢項會計政策相當唔合理,如果內地車站設施,同你講又可以用足100年,更加荒謬。

只係做鐵路的話,港鐵屬於少數絕對唔應該駛入內地的香港上市公司,冇納稅人長期補貼,法國大餐多嚿魚,投資幾百億銀俾你賺到雞碎咁多又點,要在內地保持香港的服務質素,賺錢機會更加近乎零,同香港人講有增長機會,吹水咩。

在「治港36條」當中,港鐵獨食其中一條,成為唯一直接進入北京領導層思維的香港上市公司,訊息其實相當明顯,就係港鐵已經成為「十二五規劃」的「政策工具」之一。

內地早幾年鐵路投資大躍進,搞成點,有眼睇,鐵道部今日成為全國最巨型債仔,欠債超過2萬億元人民幣,要阿公四圍撲水吊命,乘機大刀闊斧改革呢個超級獨立王國,例如政企分家,甚至傳緊好快會開放鐵路經營權俾地方政府,引入私人資本,呢個時候,港鐵「被歡迎」駛入內地,啱晒時節。

港鐵主要做城市內軌道交通,同鐵道部唔係太關事,以中國鐵路投資的規模,港鐵嗰兩條A信貸評級亦幫唔到太多,港鐵最大競爭優勢,唔係輸出「資金」,而係輸出「管理」,幫內地鐵路公司「升呢」,做顧問生意大有可為。

當然啦,「治港36條」從來唔係一份「大禮」,而係至2015年間香港「被規劃」的「施政報告」,唔會為咗俾生意港鐵做咁簡單,港鐵最大「政策任務」,就係加快香港同內地的融合,舉個例,深圳十二五規劃,講緊一條輕軌快線,接駁香港同深圳機場,大家可以睇睇會唔會要港鐵硬食,整劑高鐵續集。

港鐵貴為藍籌,市盈率貴過新地(0016),得一個原因,就係用納稅人錢長期補貼股東,就算唔講土地資源,港鐵明明係鐵路公司,成立目的就係提供鐵路基建,阿公要起港深廣高鐵,包蝕唔賠,香港段資金成本竟然唔使港鐵揹,但同時港鐵又可以分享鐵路網絡擴張的經濟利益,呢個已經係最大的政策津貼,這份大利是,同兩鐵合併時,港鐵唔使硬食九鐵蝕錢資產,有異曲同工之妙,就係打劫納稅人荷包。

今日港鐵變成香港「被規劃」的「政策工具」,可唔可以好似以前留守香港的歲月,保持強勁增長,要睇同內地地方政府交手過程中,可唔可以繼續攞到「政策津貼」,例如好似深圳龍華線地產項目,如果出現第二劑,可以初步確定,港鐵可以將「鐵路加地產」的模式,搬上大陸,變成一間網絡貫穿深圳香港、能夠以基建優勢化解樓市風險的的鐵路巨無霸。

港鐵在香港,永遠處於納稅人及股東利益衝突之間,前者一直處於下風,一間長期得到大量政府補貼的公司,是穩建投資者的最佳選擇,最少,可以對沖一下港鐵狂加票價的風險。

關連文章:
1. 治港鐵道(上)(中)(下)
2. 中聯辦內望

伸延閱讀:
1. 港鐵「被歡迎」
2. 河蟹膠鐵(上)(下)
3. 地主鐵路(上)(下)

沒有留言:

發佈留言