煤氣今天（下）

上回講到，中華煤氣(0003)唔聲唔聲，中國大陸嚿嘢越做越大，公司招牌開始名乎其實，今年內地業務盈利貢獻，將會超越香港。

唔少老牌香港企業，在內地都搞到好大，好似東亞(0023)、恒隆(0101)，資產計差唔多中港半壁江山，但賺錢大本營仍在自己地頭；周大福珠寶(1929)在大陸搭個千店雞棚，8成盈利仍然來自香港幾十家分店；煤氣在香港150年基業，仲要係一個壟斷近8成市場的獨市公用業事，北上搵食最多十幾廿年，絕不簡單，亦可以反證內地燃氣市場，相對其他港企可以涉足的行業，更易搵錢。

中國燃氣市場七國咁亂，市場充斥唔少錯誤的印象，例如好多老外傳媒，周不時仲形容新奧能源(2688)為網絡「中國最大」的管道燃氣供應商，又形容北控(0392)為銷量「 中國最大」，實情就係，無論以市值還是銷售量排行，甚至係網絡覆蓋地盤大細，煤氣都可能係「中國最大」，呢個地位及潛力，財經茄哩啡兩年前幾寫《群鴻氣海》時，都睇漏眼，因為注意力太過集中在港華燃氣(1083)，忽略咗煤氣本身都在密密投資。

內地城市管道燃氣項目，至2011年底，港華燃氣有66個，煤氣本身都有34個，阿媽地盤主要在一二線城市，為1,320萬客戶供氣，新奧能源只係駁到510萬；煤氣燃氣總銷量，已經突破100億立方米，北控舊年的總銷量，亦只有64.7億立方米。

唔計港華燃氣的投資，煤氣本身在內地的管道燃氣項目，大大話話已經投資咗120億元(人民幣，下同)，不過好多項目未達到需要披露的水平，所以香港投資者唔多覺，見住煤氣發到咁大，新奧拍住中石化(0386)收買中國燃氣(0384)，或多或少，就係想搶回「中國最大」管道燃氣公司呢個光環。

燃氣市場增長速度，同大陸城市化的速度成正比，新樓起得越多，越多用戶需要駁喉供氣，私人住宅多炒家，好多新樓空置，水電氣咪錶永遠唔識跳，阿公講明要起多啲政府津貼的「福利房」，未來5年廣廈3,600萬間，呢個來自公營房屋的供應，唔會起咗冇人住，下游燃氣供應商，受惠於廣廈千萬間的程度，其實仲大過水泥基建公司。

除咗下游市場，煤氣近幾年更加衝上中上游，單是所謂「中游項目」，即係天然氣接受站，自2004年開始已經投資103億元，唔細得過城市管道燃氣的投入，當中包括廣東省的液化天然氣項目，煤氣佔股只有3%，但投資額76億元，呢嚿嘢大有文章，好簡單咁講，可以加大煤氣在成本控制的能力，包括香港業務的成本。

煤氣在內地市場越游越上，近年所染指項目，已經包括煤礦、煤基化工等「新能源」項目， 可以想像，未來的煤氣，或者有可能分拆出來上市的內地能源資產，同昆侖燃氣(0135)呢個垂直式發展的巨無霸，會係同一類公司，不過「煤氣」呢個中文招牌，有可能要改一改，唔係好配合中國減少燒煤呢個政策大方向。

之前講過，內地管道燃氣市場有兩類公司，一類好似新奧，全國幅射式的擴張，一類好似北控及以前的鄭州燃氣，將一個主要市場圍到滴水不進，煤氣目的的運作模式，在內地屬於前者，鬥快，在香港屬於後者，鬥穩，煤氣守中有攻，所以近年抗跌力特強。

煤氣日前舉行股東會，管理層講到，未來3年，仲會在內地投資100個億，7成放落新能源項目，香港增長有限，每年只係放7個億維修及建設管道，未來如果再出現類似大埔呢類爆喉斷氣之鑊，香港人可以有合理懷疑，煤氣北上擴張，已經影響到在香港的服務質素，當然啦，煤氣北上大搞，亦唔排除火燒後欄，出現國內能源公司殺入香港供氣市場，同煤氣正接競爭的可能。

關連文章:
1. 煤氣今天（上、下）
2. 公用功用（上、中、下）

煤氣今天（上）

今期開中華煤氣(0003)，睇睇呢隻香港最老牌企業之一，近幾年靜靜起地革命，搞緊邊科。

香港出名地少路迫喉管多，十幾間電訊公司加水電煤，十幾條喉塞埋一箸，理論上，安全措施一定會做足，確保一條喉出事，唔會影響到其他管道，所以好少話兩喉管齊齊爆，爆咗影響範圍都唔會好大。不過，前日大埔爆鹹水喉，竟然可以射穿隔籬條煤氣喉，搞到成個大埔過萬商住用戶，約十萬人口斷煤氣，仲要搶修兩日都尚未恢復供應，好耐冇見過咁大場面。水務署成日爆水渠自然抵鬧，之不過煤氣條喉咁雞，原來用水一射就會爆，又好難扮「受害者」博同情，商戶要索償斷氣損失，唔知應該告政府定係告煤氣喇。

港府容許供電供氣幾間公共事業，擁有壟斷或近乎壟斷的地位，正正係為咗換取下游能源市場的供應穩定，又正正係為咗避免大埔出現斷氣呢類影響民生的大鑊嘢發生，煤氣今次可以話多謝支聯會，因為「六四」燭光晚會入場人數破紀錄，佔盡報紙電視頭條，避過一場公關災難。

又公平啲講句，煤氣多年以嚟經營的溫馨體貼的企業形象，呢個時候亦大派用場，今次咁大鑊，都唔見太多針對煤氣的批評報道。倘若掉轉頭講，如果成個大埔或北角停電兩日，中電控股(0002)以及電能實業(0006)，肯定被人鬧到狗血淋頭。

將煤氣拍埋恒基地產(0012)一齊睇，好難相信，兩間公司其實同一老闆同一個系統，由企業管治到形象公關，煤氣都贏恒基幾條街，俾人有更現代化、更用心的感覺。如果恒地賣樓，可以發揮煤氣公司千分一的「溫馨體貼」，香港人對發展商，相信亦唔會有咁大怨氣。

恒地主席李兆基同埋兩位公子，在煤氣董事局都只係非執行角色，恒地及煤氣之間企管及形象的反差，既反映專業管理，以及家族管理的分別，亦反映咗香港賣樓實在太易搵錢，唔當客仔係人，一樣大把人幫襯。

中電、電能實業近年成日話成本上升，攞住利潤管制協議，大條道理地加電費，反而利潤冇受類似商業合約保證的煤氣，今年講到明唔會加價。
至於去年，聽過煤氣職工會對加薪幅度不滿，醞釀罷工，即刻又傳出一年加兩次人工的新聞，今時今日一間香港企業，可以一年加兩次人工，順叔亦唔知去邊度搵。公司唔係咁賺錢，百年喜慶都唔會有著數益股東，今年煤氣成立150周年，又有紅股又話派17港仙特別股息，一間公司對客戶、對員工及對股東咁疏爽，亦可見到煤氣近年有幾好搵。

近年市場對在香港有穩定收入，在內地又衝得有聲有色的公司，例如恒隆地產(0101)，特別有興趣，煤氣其實正正係一間基業穩在香港，並於北上發展迅速的公司，公司招牌所謂「中華」兩個字，以前名不符實，只集中香港，公用股形象太深入股民心，今年在內地業務愈做愈大，市盈率亦長期企在20倍樓上，已經廣被市場視為一隻「增長股」。

煤氣舊年純利增長一成，並已突破60億元，達61.4億元，冇乜物業發展的特別收益，息稅折舊攤銷前利潤，香港貢獻44億元，增長7%，內地業務貢獻29個億，增長36%，管理層講明，內地業務的盈利貢獻，今年將會超越香港，即係內地業務將繼續保持強勁增長，成為少數真正在內地搵到食的老牌港企。

下回再續，睇睇除港華燃氣(1083)之外，煤氣在內地仲搞緊乜。

關連文章:
1. 煤氣今天（上、下）
2. 公用功用（上、中、下）

公用功用（下）

經典煤氣廣告

上回講到，中電(0002)在政治大時代買政治保險，97年已經有前科，曾經搵中信泰富(0267)入股兩成，最新拍住南方電網，計劃收購美國埃克森美孚在青山發電的60%股權。

如果「公眾利益」可以凌駕行政會議保密制度，咁「公眾利益」更應該凌駕兩電利潤管制的商業機密，所謂「規管透明度高」喎，大佬，只係相對兩電而矣，香港人其實矇查查，以目前兩電公開的幾條大數，講咩股本回報ROE，多餘，因為從來冇人知道實際資本開支項目有啲乜東東。

越難打破的壟斷，涉及既得利益越巨大，無事無幹，埃克森美孚點會輕易撤出香港電力呢個「規管透明度高」的市場，呢單刁以百億港銀計，應該屬於當年香港電訊之後，最巨型的本地併購個案，賣到乜價錢、南方電網佔幾大份，可以知道買賣雙方攻防進退的步署。

查實香港玩到今時今日，就算開放市場，仲有邊個有財力加入競爭，國企是唯一有經濟實力亦有政治誘因加入戰團的新力軍，五大國企發電公司，作為內地公用股，真係被阿公用到盡，為公眾服務蝕到眼光光，望住香港「規管透明度高」的電力市場，應該個個都想香港會開放電網，以內地成本賣電嚟香港。除咗改變遊戲規劃，仲可以拆龍門，分開發電及輸電市場，南方電網一定會拍爛手掌。

埃克森美孚等幾間外資油公司，同樣被視為壟斷標誌，香港人習慣將目光放在加油站，油公司在香港公用事業市場燃料供應商的角色，冇乜人留意，例如兩電發電的主要燃料，相信就係外資油公司，又例如中華煤氣(0003)咁，所謂「煤氣」，主要由石腦油提煉，相信主要供應商，亦係埃克森美孚等外資油公司。

煤氣講咗要轉用天然氣好耐，中石油(0857)及中石化(0386)，吼住香港市場更耐。中國話要西氣東輸，向香港供應天然氣，更加係「治港36條」之一，阿公咁多天然氣，又話鼓勵全國多啲使用，香港已經冇乜理由長年從外國輸入石腦油或者天然氣，呢個唔知係咪埃克森美孚有意撤出香港市場原因之一，再放遠啲睇，香港直接燒天然氣，煤氣唔再變成獨家生意，絕對有可能，難度仲低過打破兩電壟斷，既冇利潤管制協議，新建住宅加個儲氣設備已經搞掂，改變少少賣地條款，煤氣壟斷8成市場地位，即時可以變成97年前的香港電訊。

兩電一煤，壟斷香港公用事業幾十年，一直以來，都是增長穩定的收息對象，不過未來可能齊齊要面對遊戲規則的大改變，習慣長坐呢幾隻嘢的投資者，唔好意思，就算對政治冷感，未來都要焗住關心吓政治洗牌，公用股繼續會係公用股，不過，呢個「公」字，多咗「阿公」的味道。

改變遊戲規則，為國企南下開路，既可以加強對香港經濟命脈的控制，亦回應咗香港人日益高漲的反壟斷反霸權素求，大大增加管治牙力及認受性，俾你做智囊，你都會彈呢條橋俾中央政府，俾你做中央政府，寧願國企蝕章少少，都會打呢張牌。

在香港經濟命脈，注入更多國企力量，同自由行投資移民造成的人口互換，同擁抱香港娛樂圈造成的文化大同，效果及目的，都指向同一個方向，就係中港社會經濟文化各領域的進一步同化（大家去吓新彊就知道發生緊乜事），到香港宅男唔鐘意靚模只愛北方佳麗，香港電影圈唔再識得拍香港電影，「一國兩制」就會變成一個無需存在的議題。

呢個算唔算係一種威脅，順叔唔知，只係知道，香港既得利益者而家先高舉一國兩際，已經遲咗，今日香港人唔鐘意唐英年的情緒，套用何俊仁一句，就係「香港人受夠了」，順叔早排在Youtube，剪咗條「唐英年金句20年」，頭一段片其實係惡搞剪接，老屈唐英年，但係，而家香港的制度，絕對唔係一個好的制度，睇唔到任何理由，再去強化呢個制度。

關連文章：
1. 公用功用（上）、（中）、（下）

公用功用（中）

上回講到，長和系近十年大舉投資海外，業務國際化，香港資產佔比只有15%，對中港政治風險做充對沖，根本唔存在「撤資」的需要，反而中電控股(0002)計劃夥拍南方電網，收購青山發電有限公司(于稱青電)的6成權益，更能反映壟斷公用事業的財團，對香港未來政經秩序重新洗牌的憂慮。

先講吓青電的資產規模，青電在香港擁有3個發電廠，包括全地球規模最大燃煤發電廠青山發電廠，總發電量6,908兆瓦，呢嚿中電在香港業務的發電資產，中電反而唔係大股東，持股4成，其餘股權，由美資埃克森美孚擁有。

中電最新市值大約1,600億元(港元，下同)，青電6成股權，投資銀行估計最少值400億元，即係話成個青電企業價值最少666億元，留意青電只係中電在香港的發電資產，並唔包括中電輸電資產的13,000公里電纜、變電站13,000個，三間香港電廠，最後賣價如果超過中電市值三分一，唯一可能，就係買家比賣家更加心急。

青電兩大股東之間點拆數，中電向來好少透露，埃克森美孚亦好可能係香港電廠的主要燃料供應商，好難估計埃克森美孚有冇誘因離場，不過，中電有興趣收購青電權益，而經傳咗好耐，中電通告亦都表示，跟埃克森美孚已經「洽商多時」，最新出現的變數，可能在於買方，例如好似中電咁講，「南方電網在後期才加入洽商」。

中電同埋南方電網，好多方面可以話係天生一對，例如南方電網基地在華南兩廣，同中電的輸電設施，地理環境上市場有一定重疊的空間或可能，中電一直有賣電到內地，未來亦有誘因引入內地核電，配合同香港政府的減排協議。兩間巨型企業，亦各自面對「反壟斷」的壓力。

南方電網及國家電網在內地電力市場的壟斷情況，財經茄哩啡在舊年《煤電網聯動》講過，呢度唔重覆，中電及電能國際(0006)在香港，打橫各據市場一方，打直兼營產電輸電，壟斷優勢更大，兩電的壟斷地住，亦成為香港大財團「霸權」的最大標誌之一。

兩電在香港的利潤是否合理，呢個問題，唔識答，因為政府同兩電簽署咗利潤管制協議，「商業機密」竟然可以幾十年凌駕「公眾利益」，開支成本結構，唔需要攤開俾大家睇，香港人唯有靠估，點估呢，好簡單，望吓兩電舊年在700萬人口的香港賺幾多，又望吓五大國企發電公司，在13億人口的中國賺幾多，就知道兩電利潤是否合理，香港電力市場的現行監管框架又是否合理。兩電在香港長做必賺，衝出香港，其實唔係做得咁出色，例如中電在印度及澳洲市場，盈利絕對冇香港咁穩定，電能近兩年大肆投資歐洲，開頭條數好易計，要未來幾十年，好似過去香港過去幾十年咁穩陣，除非歐洲監管架構，好似香港政府咁溫柔體貼。

兩電舊年加價，加幅在利潤管制之內，香港政府唔怪自己幾年前重訂利潤協議時戇居居，反而透過公眾壓力，同兩電開天殺價落地還錢，呢個究竟係乜嘢世界。現行兩電利潤協議，去到2018年先到期，即係到咗2017年，行政長官選舉面對700萬人而唔係1,200人小圈子時，必定會成為競選議題，呢個5年後可能出現的難關，兩電冇可能睇唔到。

中電在政治大時代，買政治保險保住香港大銀袋，已經有前科，97年曾經將20%股權，出售俾當年的中資紅牌阿姑中信泰富(0267)，當時講明以發展內地市場為合作基礎，最後唔知中電發現內地電力市場規管太緊計唔掂數，定係中信泰富露底原來唔係咁猛，策略聯盟好快瓦解，兩年後中電購回15%權益，中信泰富剩低中電權益其後逐漸在市場出售。

掛住睇特首選舉辯論，下回再續。

關連文章：
1. 公用功用（上）、（中）、（下）

公用功用（上）

今期開香港公用股，睇睇幾隻既得利益集團軍代表，壟斷地位未來會唔會受到威脅。

香港政治大時袋，普通市民忽然眼界大開，見到好多以往冇可能見到的物事，好似順叔呢類財經茄哩啡，當然狂食花生，邊睇戲邊學嘢。香港大孖沙身家百億千億計，就唔會有睇戲心態，應該唔少人好擔心，政經秩序重新洗牌，被人夾住大春袋，被迫交出大銀袋。

總理溫家寶，在人大政協兩會閉幕記者會上公開表示，有信心香港能夠選出一個「多數港人所擁護的特首」，話音甫落，電能國際(0006)大老闆、長實(0001)主席李嘉誠，忽然公開表態，繼續力撐唐英年做特首，又講明就算梁振英當選，長和系都唔會「撤資」。

唐英年今日的「民望」，好大程度上，其實係香港普羅大從對大財團既得利益的情感投射，之前幾次特首選舉，誠哥都冇話公開透露自己投票取向，今次竟然赤膊上陣，無疑只會令市民對唐英年更反感，誠哥這翻「挺唐」言論，「反梁」味道更重。

上星期五的特首選舉電視辯論，可能漸覺大勢已去，唐英年表現反而出奇的輕鬆，似為絕地反擊，更似一鑊熟，為「公眾利益」抖出疑似政府機密，「踢爆」梁振英曾經講過要遲早要出動防暴警察對付香港示威者，仲有建議縮短商台續牌年期。

唐英年搬得出這兩個「自殺式」炸彈，已經完全放棄政綱上的比拼，正接在意識形態層面拗手瓜，將梁振英劃成對集會言論自由的威脅，亦把自己變成捍衛「最核心的核心價值」的選擇；將一場被喻為「地產黨對共產黨」的權力鬥爭，幻化成「中環對西環」的價值之戰。

反枱到呢個程度，差在未呃出「港人治港對黨人治港」的口號，下一場特首辯論，如果唐營唔敢引爆「香港地下黨」這個「大殺傷力武器」的更多資料，可以視為特首選舉「開始受控」的跡象。

老實講，港英年代，中國共產黨在香港活動，已經係公秘密，回歸之後變成自己地方，又點會忽然「河水不犯井水」。梁振英曾經否認自己是共產黨，但身處香港權力核心幾十年，又點會唔係重點培育的「自己人」，香港有錢佬信唔過梁振英，一來潛意識上，抗拒一個被大孖沙視為「地產經紀」的測量師，忽然成為自己老闆，二來唔知道梁振英會開邊辨，會唔會帶來政經秩序重新洗牌的可能，睇唔通，對大財團的大銀袋就是最大威脅。

誠哥夠膽公開講，就算梁振英當選，長和系都唔會撤資，原因得一個，因為根本唔存在「撤資」的需要。長和系放在香港的資產，唔夠兩成，從來冇將所有雞蛋放在同一個籃，晨早已經對沖晒政治風險。

舉個例，假如香港在3月25日全民公投，表決是否將全港最大5個財團的資產公有化，共產一次下不為例，相信未必會得到大多數人通過，萬一通過，長和系最多唔見15%資產，但係新地(0016)及恒地(0012)等，可以變得一無所有。

過去十幾年，在歐洲狂燒銀紙搞電訊，過去兩年開始止血，電能國際及長江基建(1038)兩單近千億銀大刁，又係放在歐洲的公用事業，香港已經做到咁大，可以霸的地頭已經霸晒，當然冇類似投資機會，問題係，唔通在中國內地都冇類似投資機會？呢度就要套用誠哥當日所講，做大刁最緊要選擇「法律政治穩定」的地方，再講白啲，就係唔尻信你共產黨。

長和系業務向來國際化，在歐洲做一兩單大刁，唔代表對中港營商環境，突然變得悲觀，不過，作為電能國際在香港的「競爭對手」，中電控股(0002)上星期公布的一項消息，足以反映香港大財團，對未來政經秩序可能重新洗牌的憂慮。

上星期五，中電宣布正與南方電網商討，向美資股東埃克森美孚，收購其所擁有的6成青山發電有限公司的權益。

呢單其實係大新聞，下回再續。

關連文章：
1. 公用功用（上）、（中）、（下）

黑金經濟（下）

上回講到，「梁營悍將」劉夢熊，係就係同黑金好有關係，不過講緊「黑色黃金」，06年透過前身係「信用咭防盜」的國際資源(1051)，在馬達加斯加發現大油田，「遠景資源儲量」可能值9000億美元，被中央電視台列做商業欺詐案例，令夢熊大師在內地紅上加紅。

近排成個香港掛住「黑金政治」，冇乜人留意黑色黃金，近日油價又彈返上一百美金以上一桶，08年開始歐美日經濟齊齊叫救命，黑色黃金價格持續高企，疲元貴油，呢啲就係印銀紙、同埋市場對印銀紙預期的威力。

油價波動，做交通運輸生意的大型上市公司，近幾年幾乎全部有乜運行，的士司機就更加生意難撈，日前有的士司機慢駛要求求恢復燃油附加費，可見通脹壓力又開始有瞄頭。

今次司機大哥提出的要求，仲有一項可能好配合中港政治形勢轉變的素求，就係批評中外油商勾結組成「石油售價壟斷聯盟」，要求作為國企的中石油(0857)及中石化(0386)，退出呢個「聯盟」。

係咪真係有呢個寡頭壟斷的「聯盟」，唔知，不過要打破香港幾個主要市場壟斷，主要力量可能只有靠巨型國企。

香港政府好多政策，多年來不知不覺有心無意間，向巨型財團傾斜，大部分公用事業，都處於寡頭壟斷或絕對壟斷的市場狀態（包括地產市場），特首曾蔭權已經冇可能兌現就競爭法立法的承諾，如果今個月特首選舉，代表香港政商利益的一次重新洗牌的話，大家可以留意，未來5年，會唔會有政策改變，為大型國企南下開路，例如被香港人臭罵幾十年的電網及供電市場。

燃料供應，除咗中石油及中石化，其他主要「競爭」對手，都係外國公司，可能係最容易開刀的市場；仲有，煤氣(0003)的壟斷地位，係其中一個壟斷地位最高的公用事業之一，中央政府成日話供應天然氣嚟香港，係「挺港」措施之一，又唔知會唔會有政策空間，俾國企油公司，加入香港住宅燃氣市場喇。

以前每逢油價急升，中石化例必叫救命，原油煉油成本受浮動的國際市場價格影響，但在內地成品燃料價格受政策控制，煉一桶蝕一桶，今年中央政府唱到行，要搞燃油價格改革，對中石化呢隻壟斷性巨無霸，係一項結構性的政策改變，影響非同小可，中石化成個集團，近月動作多多，好多故仔，今個星期係咁先，遲啲再講。

關連文章:
-- 黑金經濟（上）、（下）

伸延閱讀：
1. GOW財茄台: 向熊胆說不
2. GOW財茄台: 夢熊黑金