2011年12月21日星期三

利豐雙刁(上)

(刊於2011年12月21日am730)
利豐三年計劃第一次甩轆

今期開利豐(0494),講吓兩單對公司股本冇乜影響、但同公司前景好有關係的交易。

第一單刁,上兩個禮拜出街的新聞,新加坡政府兩大投資旗艦之一的淡馬錫,發行總值約36億元(港元,下同)的可換股票據,兩年,零息,買家可以在期內,以相對12月初市價的4成溢價,即係每股23.8元,換取利豐股份,不過,淡馬錫有權在到期時以現金結算,還錢唔還股。

呢單刁,如果買家在兩年內冇任何行使權,淡馬錫認真筍到爆,利豐股價暴跌,最多還錢,利豐股價爆升,最多又係還錢,做乜都得,可惜財經茄哩啡冇本事搵個3條A信貸評級,如果唔係,免費免息借幾十億銀玩兩年,認真開心。

淡馬錫賣得筍,即係買家唔筍,應該只有兩類投資者會有興趣,一係大把錢又超級保守,同時又好驚2012係世界末日,買批利豐可換股票據,當係將現金放喺淡馬錫暫時保管,2013年地球仍然存在再算;第二個可能,在另一個極端,幾十億元可換股票據盡入炒家之手,在未來兩年當自己坐住2%利豐股權,當做埋對沖,放心舞上舞落。

利豐對淡馬錫發行可換股債呢個動作,冇公開評論,呢個故事,其實亦話俾散戶知,一間上市公司無論資料披露幾咁透明,大戶要發行足以影響公司股價的投資工具,散戶唔會知道發生乜事,分分鐘相關上市公司亦唔知發生乜事,監管機構更加冇乜嘢可以做。

2008年8月,全球信貸風暴風雨欲來,靠併購收買增長的利豐,A級信貸評級啱啱被列入負面觀察名單,管理層馮氏兄弟人面夠廣,到9月初,雷曼兄弟爆煲前一個禮拜,搵咗淡馬錫泵水,作價每股約11.5元(計埋利豐一折二影響),認購近5%新股,集資近39億元。

利豐成功撲水後兩年,亦即係2008-2010年的「三年計劃」的中後段,繼續四圍掃貨,雖然所謂「金融海嘯」後周街平貨,臨尾更食埋自己個妹利和經銷,但「三年計劃」中,營業額最少增至1,560億元、核心盈利增至最少78億元的目標,仍然雙雙甩轆,3年期考第一次肥佬,難怪當日被稱為「策略投資者」的淡馬錫,今日借啲意變相減持套現。

09年9月一年禁售期後,利豐股價曾經衝上近26元高位,淡馬錫已經減持近億股,利豐算係有交待,淡馬錫透過發售可換股票據集資幾十億元,等如當日入股利豐成本,未來兩年多數唔會沽貨,不過亦間接話咗俾市場聽,淡馬錫心目中的「套現價」係幾多,唔算太睇好利豐前景。

好喇,第二單刁,對散戶嚟講,比較貼身,星期一,零售服飾品牌漢登集團(0448)宣布,由利豐大股東、馮國經家族私人持有的「利豐零售」,提出以現金27億元,全面收購漢登,每股作價2.7元,相對消息公布前漢登股價,溢價近6成。

漢登旗下品牌,包括兩隻腳板十隻腳趾的品牌「Hang Ten」,近年在東南亞擴張極快,至今年9月底,公司已經有796間銷售分店,冇透露當中「加盟店」比例,難以知道近兩年業績強勁增長的虛實,至3月底年度,純利近2.4億元,「利豐零售」即係只需要以往績市盈率約11倍收購,又會咁筍?

漢登主席兼行政總裁叫做陳永燊,已經63歲,據網上未完全核實資料,係全國政協常委陳永棋個堂細佬,陳永棋間YGM貿易(375),亦係漢登主要股東,持股近22%,大家可以留意吓,仲有冇一啲細細粒的香港紡織業或服飾公司,話事人就快退休,第二代又從冇在管理層出現,可能會好啱利豐集團胃口。

下回再續,睇睇再睇睇利豐呢間公司,以前收買競爭對手打橫擴張,今日垂直併購直插下游,買辦變零售,最近搞成點。

關連文章:
1. 利豐雙刁(上)(中)(下)
2. 捻明利豐(上)(下)
3. 私有化學(上)


同場加映:
利豐總裁都啱啱執件「筍嘢」...

2 則留言:

  1. 第一次留意到「漢登」, 係因為隻股而唔係產品, 係因為見到「為你」基金買左呢隻野超過 5%貨, 之後落佢地鋪望下佢地 d 貨, 仲7 過執左笠既 U-RITE, 梗係唔跟,真係唔明「為你」點解要買呢隻。

    直到 L&F 出手, 我終於明白。

    不過以漢登既產品, 唔理利豐打算點搞條鏈,我依然唔看好。

    回覆刪除
  2. 蘋果之前有人寫過篇 , 大家都看下。

    http://hk.apple.nextmedia.com/template/apple/art_main.php?iss_id=20111221&sec_id=15307&art_id=15912142

    不過係亞洲賣衫真係咁好境? 近年咁多過江猛龍, 租金又....
    但2位買家點睇都係高人, 我真係唔明有咩搞作。
    ,

    回覆刪除