港銀家族（中）

上回講到，農業銀行(1288)豪掟50個億(港元，下同)，以破中區甲級寫字樓記錄的價錢，買咗干諾道西50號，唔單止振動香港地產界，在銀行界都好可能非常轟動。
中行(3988)有間中銀香港(2388)，工行(1398)早兩年私有化咗工銀亞洲，建行(0939)H股上市後亦買咗策略股東美銀個香港業務，四大國企銀行當中，農行唯一未在香港銀行界插旗，今日大手筆買件甲級商廈做總部，唔使問阿桂，在香港物色緊擴張機會，包括買件中小型港銀。

國企巨銀為咗顯得架勢啲，花多多錢買嚿磚頭做總部當做巨型招牌都在所不惜，併購香港銀行的話，唔會為買而買，2007年招商銀行(3968)買永隆，當日曾經加入戰團，除咗工行，更意想不到的，仲有中國人壽(2628)，可見國企巨銀對香港金融資產興趣非常濃厚，有銀行放盤，打開本簿任睇，唔買都埋嚟睇吓。

中港金融市場多錢銀往來，在香港插支旗方便做生意，肯定係大趨勢，好簡單咁講，大陸唔少有銀士，將部分家財搬出海外先會有安全感，國企銀行幫客仔做財富管理，在這麼近那麼遠的香港離岸市場，整盤銀號生意，搬出搬入都方便啲，唔通要搵競爭對手幫拖，又或者吓吓搵牛記咩。

近期有唔少內地地產商，有興趣在香港買地皮搞吓事，未必一定扯住打破香港地產霸權的正義旗號，更可能只係因為內地的客戶，在香港買幾件貨，有乜嘢方便得過自己個地盤。連莫財的地產公司都要在香港搵地盤，國企巨銀高層對中港金融資場的市野更濶，咁多人對港銀有興趣，唔會死錯人，退一 步講，霸定山頭，總好過市場機會出現時，先發現自己兩手空空。

買咗間港銀，等如同時買入一班有國際經驗的金融專才，仲要差唔多同聲同氣，對國企巨銀嚟講，屬於好寶貴的無形資產，農行上市時冇引入任何外資策略股東，國際化步伐比較落後，有興趣在香港試水亦無可厚非。

香港銀行同埋中環甲級商廈一樣，都係奇貨可居，個個吊高嚟賣，賣家一樣個個有咁上吓財力及定力。最大分別，間唔中亦會有跳樓貨，大把買家準備接貨之餘，同時有唔少經紀中間人游來游去穿針引線；銀號賣盤的話，唔會有中間人，屋企開得銀行，仲要已經幾代經營，年年賺錢分股息，分分鐘個個已經十億計身家，只不過等緊上車「升呢」做百億級超級富豪，亦即係話，香港銀行賣盤成交，唔似得甲級商廈咁有個客觀估值，只能夠反映賣家有幾貪心。

香港仲係家族式經營的上市中小型銀行，賣一間少一間，而家一隻手數得晒，創興銀行(1111)早前年將自己個招牌斬頭去「廖」，降低家族色彩，萬一賣盤成事，變賣祖業的感覺都冇咁濃厚；永亨(0302)管理層更加多次講到明，甚至出晒上市通告，對於賣盤持開放態度，有誠意隨時可以傾。

永亨及創興，一間太大，一間太細。永亨市值近240億元，市帳率1.4倍，3倍市帳率套現的話，大嗱嗱500個億，國企銀行年年供股集資，有排都冇人食得落；創興市值60億元，折讓近兩成，但係太細粒，而且略嫌有少少化石味道，食之可能冇乜味，買佢不如買干諾道西50號。

去頭去尾，大新銀行(2356)體積在兩者之間，價錢亦最殘，形象及業務都相對國際化，可能係最啱國企巨銀併購的目標，管理層冇乜講過話要套現，傳媒報道所見，就算被兜口兜面問有冇併購賣盤計劃，都冇話顯得特別熱衷，呢種先係最有機會成事的賣家表現。

下回再續。

關連文章:
1. 港銀家族（上）、（中）、（下）

表外風險（下）

(刊於2011年7月22日am730)

上回講到，近排外資投行及信評機構，輪流唱淡中國銀行股，講得最多一個理由，就係資產負債表以外信貸風險，睇真啲的話，工行(1398)「表外」資產，信用風險加權後金額，大約只係總資產半成。

間間國企銀行有本難念的帳簿，建行(0939)將2011年叫做「表外業務管理年」，可能就係因為表外資產特別多，唔計或然租金及資本支出，超過2萬億元(人民幣，下同)，集團仲有8千億「衍生金融工具」，加埋就等如總資產26%。

聽落好得人驚，但係同工行一樣，建行最大嚿表外資產，嚟自未批出去貸款及信用咭額度，衍生金融工具名義金額好似好大，但只係交易量而唔代表風險金額。表外資產，亦唔代表一定高危，建行舊年資產減293億，256億嚟自貸款壞帳，表外資產損失只係佔7.5%。

08年信貨危機爆發之前，絕大部分歐美巨銀，成立咗好多表外SIV，例如花旗就最少有8個，仲要透過發行超短期商業票據融資，買落大量唔流通但又相對高息結構產品，例如次按CDO，短債博長息，高峰期持有近千億美元資產，國企銀行今日表外資產，無論規模定係風險，相對於當年歐美巨銀，只係小巫見大巫。

喺外國，最聰明最古惑金融人才，多數去咗投資行搵真銀，所以永遠道高一呎魔高一丈，中國啱啱相反，最有資歷及牙力，先可以坐到監管機構高位，呢種制度反而相對穩陣。銀監會已經下令，銀行要在今年之內，將表外資產撥返入帳簿，加埋種種新監管要求，各大小銀行帳目，2011年年報將有好大變化，呢個其實係好正面發展，最少畀外界一個訊號，監管當局睇得好緊，國企銀行好難亂嚟。

講到呢度，唔係話國企銀行前景一片光明，只係話冇外資投行及評級機構唱得咁衰，系統風險，亦冇乜能在一兩年內出現，唔好忘記，中國「表內」資產，仍然好豐厚。舉個例，地方債係公共財政一個最大表外風險，但地方政府同時擁有2萬幾間國企，唔少係盈利能力極佳上市公司，剩係出售部分國有資產，已經可以填補巨大資金需要。

外資行成日唱中國金融體系信貸風險乜乜物物，講穿咗，其實因為佢哋唔可以押注中國信貸風險，某程度上，中國金融市場最大問題，唔係負債太多，而係負債太少，債市容量不足，只係股市一半，亦唔夠開放，信貸風險吓吓要銀行硬食，如果發展多啲信貸產品，放寬外資投資限制，肯定好多外國投資者搶都搶唔切，唔會咁得閒唱淡。

關連文章：
1. 表外風險（上）、（下）

表外風險（上）

(刊於2011年7月21日am730)

外國信貸評級機構及投資銀行，近排經常用「表外風險」唱淡中國，表來表往，今期睇睇究竟講緊乜。

所謂「表外」，即係話放喺資產負債表以外(Off-Balance Sheet)，外人睇唔到嘅東東。地方政府融資平台，就係中國公共財政一項最巨型表外風險；銀行放喺帳簿以外、冇話你知坐住嘅資產，亦係一項表外風險。

好諷刺地，外界開始驚覺國企銀行表外資產迅速膨脹，竟然發生喺監管機構及銀行本身，披露水平高咗之後。舊年底中央經濟工作會議，開始提出「社會融資規模」呢個新辭彙，人民銀行今年4月，開始公布季度社會融資數據，今年第1季數據出街之後，即時畀唔少人拎住唱淡。

所謂「社會融資規模」，即係除咗財經傳媒日報夜報嘅「新增貸款」之外，再加埋成個經濟體系透過舉債籌得資金，呢嚿嘢當中，比較容易理解嘅包括債券發行，難明嘅包括「委託貸款」、「信用貸款」及「銀行承兌匯票」，總括嚟講，就係監管機構視線範圍內，傳統銀行及「影子銀行」嘅融資總額。

根據人行啱啱公布數字，上半年社會融資規模達7.76萬億(人民幣，下同)，當中新增貸款4.5萬億，企業債券淨融資6,588億，即係話傳統貸款以外，8成以上融資活動由影子銀行包辦，其中「委託貸款」，即係銀行做中間人抽佣、幫客仔做大耳窿借錢畀第三方嘅貸款規模，按年增加一倍至7,028億。

人行連銀子銀行數據都畀埋你睇，銀監會舊年年報又第一次話你知，中國商業銀行「表外加權風險資產」，總共有5.32萬億，08年全球信貸危機之後，投資者聽見「表外」就即時變驚弓鳥，中國影子銀行膨脹得咁跨張，自然個個嘩嘩聲。

一碌竹唔應該打沉一船人，口噏噏亦冇意思，間間銀行處理帳簿會計手法都唔同，例如工行(1398)已經將金融衍生工具投資，放返入本帳簿，建行(0939)就未做呢個動作，建議大家如果買咗邊間國企銀行股票，下載分年報，然後用「表外」做關鍵字搜索一吓，再同其他銀行做吓比較，就知道大概知道小股東坐住乜嘢表外風險。

如果唔計或然租金或資本開支，工行表外資產，可以喺2010年中文年報215頁睇晒，嚿嘢總值1.65萬億，等如資產總額12%，聽落好跨張，其實冇咁嚴重，因為當中超過一半係未批出去貸款及信用咭額度，風險加權後，表外資產佔比就唔夠5%。

下回再續。

關連文章：
1. 表外風險（上）、（下）

算嚿銀數（下）

(刊於2011年7月8日am730)

上回講到，中國地方政府債務黑洞有幾深，銀行相關信貸風險有幾高，因為缺乏正式官方數據，投資大行班財演個個口噏噏當秘笈，咪埋眼唱淡都吹到似層層。

好多人驚鬼，因為未見過；見過鬼，多數反而唔會再怕黑。同樣道理，市場擔心中國銀行有系統性風險，因為唔知嚿銀債幾大，如果地方政府唔係將條數收收埋埋，如果監管機構能夠提供最新最準確數據，大家唔會覺得件事咁恐怖，呢啲叫做「不明朗因素」。

換句話講，拆除呢個計時炸彈王道正藥，就係提高公共財政透明度，跟住提出重組方案，呢樣嘢，正正發生緊，亦係中國銀行業近排最正面發展。

上個星期，國家審計署公布全國地方政府債務約10.7萬億，大約係中國經濟27%，當中一半嚟自政府融資平台。呢組數字，未必反映所有債務風險，最少係至今為止，中央政府一次最認真「摸底」工作，銀監會其實亦就銀行體系相關風險，一直進行「摸底」工作，如無意外，短期內會有官方數字出街。

中央要徹底「摸底」，其實話你知，阿公正準備拆彈，亦係中國公共財政改革前奏，早排外國傳媒引述銀監會消息，話中央政府「三個月」內會做嘢，可信性不高，但當中提及成立類似當年匯金嘅國投企業吸納銀行部分不良資產、容許地方發債等幾個方案，最少可以反映監管機構幾個重要拆彈思路。星期四國務院例會，亦講咗要「高度重視」地方債問題，要按「分類管理、區別對待」原則，進行整改，並證實會研究建立地方政府舉債機制。

中央政府一邊以阿公身份收陀地，另一邊又做鴕唔準地方政府有赤字及舉債，所以地方政府唯有靠賣地支持公共開支，同埋靠融資平台呢啲表外灰色渠道撲水，如果正式準許地方政府發債，第一件事，就係要大幅提高地方財政收支透明度，如果唔係，邊度會有投資夠膽借錢畀你；第二件事，要開放債券市場，引入更多外國資金，唔係再由國企銀行溏魚飲溏水。

地方地府為發債被迫增加公共財政透明度，引入更多資金分散銀行體系相關信貸風險，呢兩件事，亦係兩個無可避免改革大方向，唔會幾個月內嚟一場全國整改，問題亦唔會忽然一天光晒，但最少成件事唔會咁「不明朗」，到時好似穆迪呢啲二打六，就唔可以再隨便亂噏，投資大行，更可能會排隊唱番好添。

-- 算嚿銀數（上）

伸延閱讀:
#

算嚿銀數（上）

(刊於2011年7月7日am730)

今期開中國銀行系統性風險，再講呢個超悶題目，因為實在頂唔順班財經演員，今次講緊大行分析員，唔知頭唔知路，亂唱中國債務危機。

講真句，大陸政府又認真幫唔落，5月初寫過一篇《城投國債》，講過公共財政能見度，尤其係地方政府層面，幾乎等如零。市場掌握唔到地方政府債務，又掌握唔到銀行體系信貸風險，冇權威性官方數據，呢嚿銀債有幾大，人人都可以口噏噏當秘笈，唱吓唱吓，都唔知乜係真乜係假。

先搵兩份，近排唱得最淡兩份所謂研究報告望吓，第一份，6月20日，瑞銀將中國銀行股投資評級全線調底，因為佢哋個中國研究主管，有個「驚人發現」，警告中國整體信貸佔經濟比例，已經由08年120%，升到今年3月166%！之所以出現呢個「驚人發現」，源於人行今年4月，公布咗一組所謂「社會融資規模」，即係除咗新增貸款之後，債市、仲有銀行資產負債表以外，所有提供融資舉債的總量，瑞信就呢組數字，做咗一大堆假設及推算，整色整水一輪，就出現中國債務佔經濟比例急升呢個結論。

聽落嚇死人，睇真啲，呀唓！過去兩年為咗刺激經濟，中國銀行貸款總額，增加超過6成，信貸佔經濟比例上升，又點會係新聞，銀行表外資產，就算睇開財經茄哩啡都知道，銀監會舊年年報，第一次披露咗總額係5.3萬億元(人民幣，下同)，所以表外債務急增，亦唔係新聞，投行不過是但搵個理由轉軚唱淡。

第二份，今個星期，穆迪，信譽差到冇朋友嘅信貸評級機構之一，加入唱淡大行列。國家審計署上個星期，話全國地方政府債務，總共10.7萬億元，穆迪聲稱，比較過中國銀行監管機構報告之後，「發現」審計署可能低估咗銀行對地方債債務風險，低估金額高達3.5萬億，認為中國銀行體系信用展望可能會轉為負面云云。

大佬，中國銀行監管機構有兩個，一個係人民銀行，一個係銀監會，兩個機構，從來　－　講多次　－　從來未估計過地方政府債務有幾多，財經茄哩啡搲爆頭，都唔知穆迪搵乜嘢官方數據去比較。大家用常識諗吓就知，地方政府盤數透明度等如零，監管機構又點會知道債務有幾大嚿，如果知道，就唔使審計署出動超過4萬人，用超過3個月時間，去做一次全國性審查啦係咪？

中國銀行業，最近有一個正面發展，可能令近月排隊唱淡投資銀行，又排隊轉軚唱好，下回再續，睇睇係乜。

-- 算嚿銀數（下）

伸延閱讀:
#

城投國債（下）

(刊於2011年5月6日am730)

上回講到，中國公共財政存在債務風險，但喺各大小公開帳目，唔會搵到太多線索。

中央政府唔準地方政府發債，要透過財政部代發代還，近年額度大約每年在2千億(人民幣，下同)之間，同時所謂預算法亦規定地方財政唔可以有赤字，於是好神奇咁，所有已公布年度預算地方帳目當中，赤字預算絕無僅有。

點解可以咁神奇，因為好多政府所謂財政預算，唔係成盤數公開，好多大型項目，會以獨立基金帳目形式處理，例如北京搞奧運，上海搞世博，廣州搞亞運，獨立帳目唔會有得睇，亦唔會反映喺年度帳目，同樣道理，中央唔畀地方政府發債，但對地方政府成立幾千幾萬個融資平台，問銀行借錢搞基建甚至搞搞震，隻眼開隻眼閉，唔使問阿季，呢堆融資平台帳目，亦唔會公開。

地方公共財政披露唔全面，上市國企巨銀，情況其實唔好得去邊，四大國有銀行，舊年年報，冇一間將城投債務獨立披露，工行(1398)及建行(0939)管理層，據傳媒報道，倒在記者會披露咗相關債務，相關數目分別5.1千億及5.4千億，建行管理層更表示，最擔心相關鐵路融資債務，鐵道部近排出咗乜事，唔使多講。

一間國企巨銀，地方融資平台資產5千億，唔算太跨張，亦未必全部係高風險爛數，不過如果冇事冇幹，唔會人人將條數收收埋埋，應該有不能說的秘密，甚至可能係資產負債表以外之事，冇辦法有秩序披露。銀監會2010年年報，第一次披露咗，全國商業銀行，有5.3萬億風險加權資產，在資產負債表以下，聽講所有銀行，今年之前要將相關帳目，整合番入自己數簿，到時可以留意，各大銀行條數仲有冇咁靚。

巨型國企銀行，舊年純利繼續增長超過兩成，二三線銀行，增幅更普遍超過4成，過去幾年增長記錄，絕對唔差得過騰訊(0700)，中國科網公司市盈率，可以去到40倍咁跨張，但國企銀行，市盈率有雙位數字已經叫做好叻仔，市場唔肯俾太高估值，一來因為銀行市值已經超級巨型，二來因為唔係咁多人相信，國企銀行真係咁穩陣。

之前講過好多次，中國以前讓小部分人先富起來，而家要和諧社會，多啲人可以分享經濟開放改革成果，即係要扭轉一個30年嚟相對成功管治模式，屬超級高難度動作，好簡單咁剩係睇一樣嘢，地方政府靠土地財政支撐城市建設，而家中央將大量土地變成公營房屋，同時又要大增其他社會福利，暫時睇唔到一個可持續發展模式。

關連文章：
1. 城投國債（上）、（下）

城投國債（上）

(刊於2011年5月5日am730)

今期開中國債務風險。

美國佬失驚無神發現並做低拉登，一個身高六呎四寸大鬍鬚，耐唔耐就拍條片播出街，成為懸紅2500萬美金頭號通輯犯，全球特工加人造衛星追捕愈10年不果，眾裡尋他，那條友卻在，巴基斯坦軍事重地隔離一間比鄰居大八倍巨宅，劇情仲犯駁過香港電視連續劇，難怪拉登已死、未死、幾時死，陰謀論全球滿天飛，分唔清Obama定Osama。

地球是很危險的，唔係話恐怖襲擊，而係講緊全球三大經濟體系，美中日，過去兩個月，國債輪流被信貸評級機構唱衰，歐元區亦唔好景得去邊，有錢真係唔知放喺邊度先安全。拉登之死，如果代表美國要為反恐時代劃一個句號，撤軍削軍費，專心收拾國內爛攤子，重修外交關係制衡中國，對美國經濟係好事，近排求其望吓美國巨企業績，大部分相當靚仔，唔可以太睇少美國政經體系復完能力，全世界掛住喺中國搵銀，亦未必絕對安全。

中國債務最大風險，嚟自公共財政帳目唔係咁多有得睇，就算有得睇，亦唔係好睇得明，好多內地術語唔知講緊乜，每年人大政協幾千人，舉手拍手通過中央財政預算，可以肯定九成九以上代表，唔知盤數講乜。

好多帳目就算有得睇，睇得明，亦睇唔晒，因為唔會成盤數放出嚟，例如好多人講，地方政府融資平台，債台高築，監管機構亦多次提出警示，但就從來冇邊個地方政府，會將呢盤數公開，外界成日估全國城投債務有幾高，有人話7 萬億(人民幣，下同)，有人話十幾萬億，大家估估吓，因為從來未見過正式官方統計，順叔近年搵遍銀監人行大小報告聲明，都搵唔到一個正式數字。

國務院常務會議，今個星期開「推進財政預算公開工作」，表明政府部門及地方政府，近年公開帳目未夠細化，唔清唔楚，同公眾期望仍有差距，要進一步公開帳目範圍。

下回再續，睇睇呢啲債務風險，收埋喺邊度。

關連文章：
1. 城投國債（上）、（下）